11
Porr niwa nefmi giaman aposerm niwa nefm
1 Na wom mrokfom afo faso kfo mmoni hanitanme, afo wawany marsisafo hanyswokma. Bi mirahko finji akfonom.
2 Bro Nkifrarhu bro yima yuhur duka kangr dodh met yindari bugam be rorrparhu yinhitn atohm. To Bro Nkifrar dukewa kanjo to nanhu bro yima yuhur duka kanga niko Kraisrpar wahik mif mifko. Kanga Kraisrpno ayak htakahtanko Kraisrn ayakrko. Wom met tmaht tafi wom yimarpno yi juha be yifammam yakhato yindarirpno yak htiwa kanjo kanga inji kanjo ayakkahanko Kraisr-pno ayak htayanko.
3 Tmift Tndhrn kakrmitanko. Ror tu mfro yima frnhehet nandomer. Bingot to rorn Ift yihato frnhehmotrt suhmot. Ndtn na kakrmitanko. Kanga inji kanjo yimam nieruhamn mfrnhehakruhatmko rroh yuhat mhikakniruhakomn Kraisr myafhonirahkomr.
4 Na nhai be sfno yakrmikahanko. Wahtiko! Tom wom yimam nikompno niewamn Jisasrhu gutnius mrokfot nom kfo pthiwat tfit yak kekutnewamt tfit romn nndo kfo pthewumt. To niko wanukahat, nhai afo mrokfot yak nhtakahkomt. Niko wanukahat, be yudbat rroh mrokfo yuhatn mitohnitko. Mitohnihato tfit nfri yafothat yo nfri gutnius kekwoko. Nd barkof yakyuk Bro Nkifrarhu Yafothat myak htafonitkomt yo nom barkof kfo nuhasyuk gutnius mrokfot myak htafonitkomt.
5 Wawanyko. Nd yimam niko kfo yamuka, “nmoh aposerm,” rom nhai nanhu duka tungunefr kanjo rroh duka tungunefr rhukahr.
6 Mrokfo pthanefrpat nhai ptha marnyakaha. Bro Nkifrarhu mrokfothu duka tungunefr, ndr nhai yimam na kfokfot. Nd duka tungunefr na bi fakmoyanr. Nd duka tungunefr na yakitohwar niko bi htimokomr.
7 Na gutnius mrokfot nikmoha yi kfo pthamohat, na nhai kfo marimoya wawiknatwokma. Nhai. Nikmoh gutnius mrokfothu yi kfo ptha nuhas-neftn na yufapa duha yimam kanjo yi hingrna furatamoya. Na inji namohate ka fasoh neft namoya?
8 Na nikmoha tohhato hingrnamohat, wom nndoh kmiroh siosroh maruhaye wiknamoatma na nikmoha gutnius mrokfot kfo ptha nuhasmoyanko. Nhai nikomn wiknar-mokma. To ndte ka fasoh neft namoya?
9-11 Na brio maruha duha, yeshri duha yo hmbresha duha rhumohat, na nhai marimoya nikomn krhopam hiruha nd tamoh tamohroh yak hanyeft. Nhai. Wur nndo Masedoniako tohtany niayuk yimamn marut, yeshrt, yo hmbresham hnahemoma. Na nd rom hnayuk shrkamn rhumoya. To nikom-pno kfo tndau duha yimohat, nhai wom dukefmpno inji narmoya. Nhai mif mif. Bro Nkifrar hti mifwora. Nanhu yima yuhur nikompno rhu mifwor. Be duka memoya, nhai krhopam hirhotanm nanhu tamoh tamohroh yak hanyeft, ndnetann ariham yo kto wom yiha wom yiham toh hnayukm nhai kfo mirhota nikomn yak hirahkma na tamohm myak kkopenakneft. Nhai mif mif. To na gutnius niko he furamo nmbuhatpno na kfo grhaneft nhai wom Akaia thofrn kfo raforhotra.
12 Na nikompno yi hingrnaneft na nhai maruha yak hakurhotanko. Bi inji rinakmoya to be inji nahanyruha. Inji narhota nd wom giaman aposerm nhai tfit turoh yufam kfo grhahato kfo miruhatm, “Nom Porrom Korint niwa nef yuhat hikwonom.”
13 Nd yimam nndoh giaman aposerem. Rroh nefm yak kekutnewamm yuwi kangm niko htiruhakomn duka mirahko tu Krais-rhu aposer mif mifem. Ndm yuwi nikmoh frnhehakneftn inji newum.
14 To niko rom nayuk nefm htineft, to mirahko htihato bok dukefm ayaknom. Niko tawisafwoko. Satanr kangr afrnhehakanm ndnetrn rorhu nefm yak kekutwarm tfit fnhuyet mounmotr kanjo kak dborhewur.
15 Ndnettn Satanrhu hingrna yimam to inji inji newum, rroh nefm yak kekutwamm tfit dborioh nefthu hingrna yimaroh nefm kanjo newum. Nom inji htineft, to bi bok dukefm bi yak duha. Kto tum niwa nefroh krhopam yakrahm.
Porr aposer hingrneft hingrnahato yakmo krhoparoh mrokfot
16-17 Na nhai wofnkaha tfit wompam wompam nanhu nefmi yo na hingrnewa hingrnefthu mrokfot be wapthathu wapthathu hasoneft. To tfit womt akfoyanko. Nd nanhu tohefti nanhu hingrneft tuka kfo grha yindhorwante, to mirahko akfo amanyom, “Ndr nhai bi Bror kfiwa yuhat hikkahr, bi mmom kanjo bi kfo mumiwur.” Mirahko bi inji akfakninom. Niko inji htitwokma o wanukwokma, afo wahti marsisatwokma.
18 Niko inji newuko, wom yiham wom yimam nayuk nefmpnon o tum hingrnayuk hingrnefmpno bro yindhoreft yakhato yihof href yiho href kfo ptha yindhor thombat, niko to be rompno brbo rhuhato wany yakitoh yindhor hasi-wukomm. Na tfit wawanyswako na ka inji tukanhu nefmi tukanhu hingrnefm kfo yindhor grharuhan o na tu yafothet mrokfot kforuha?
19 Wawanyko. Niko hifa dborioh dukefeteko. Yimam kfoyuk mrokfom kak nhta marnyewukomm. To tfit tamohmpno nd faso faso kfo mmo bammoyetroh mrokfom mfrhamumi-watmko niko be rroh mmo yuhatn mhikaknitako?
20 Ar mmohari kpt. Niko to rpat mmo bugewakomn rom niewamn mfrhammo bohamumiwamko, niko riwany yakiowakhato nikmoh wuskenm kak rhoptakni bugahukmko. Inji mnewamko tfit turohko yitamn turoh yufam yura yura htahato niko tfit yiro wahtewumko. Ndt dborioh neft newumko? Nikmoh kusmm mfrsrfewohat niko to be dukiasroh nyingam kanjo karmt hasiwukomm, nhai wom mrokfom kfokahkomm.
21 Na nhai mfro inji narmoyanko. To niko finji dukewako, na dborioh neft namoyan o nhai?
Ndnettn rom kangm tum niwa nefm o hingrnewa hingrnefm akfo ptha yindhornomm, to nhai mrokfom. To nanhum to kfo ptha yindhorruhanm. Awi nhai, ka inji kfiwohat kanga ka bi faso kfo mmoni hanita.
22 Rom kfo kangm, “Nom Hibruyenom,” yo kfo kangm, “Nom Abraham frikef yuhat niayukenom,” yo kfo kangm, “Nom Isrerenom.” To na froha? Na to Hibruya, na Abraham frikef yuhatuha, yo na Isrera. To finji kforuhaf?
23 Kfo kangm, “Kraisrhu hingrna yimayenom.” To rom fitha bi Kraisrhu hingrna yimam tohhato bi wonk wonk krhopam bi yakrom? Wawanyko. Asoya yimaya Kraisrhu hingrneft tohhato bok krhopam yakyuk yimaya. Rom bi hingrnarotm kalabus htaromm? Yo wife smbhoromm? Yo nohyuk tkitt bi tohrom? Na asoya Kraisrhu hingrneft tohhato kalabus tohyuka, yo wife smbho bosmbhoyeta, yo nohyuk tkitt bi toheta. Ndm nhai be tukanhu yufathu yura htaneft kfokahanm. Nhai. Be kanga akfo nuhaskohtanko wawanyko.
24 Judam wife wife smbho bosmbhomoma, 5-pela yiham. Nd 5-pela yiham 39 taim 39 taim smbho bosmbhomoma.
25 Yo Romrhu gafmanr 3-pela taimkfot kfomotr kumbuhe kumbuhe yenyoh bonoh-moma. Yo tfit wom yiha tahiye tahiye febhoh gumoma. Yo na hingrneft yihato kmbrenimoa sifm, husfirpa sifm wifor toh bu mingrm fak mundhu-motmm yohnemom. Womt wifor toh bu mingrm yak mundhuhato yoh-nemohat na tu sifthu pran mkutn yura mhutahato rpa yifungri rpa marr buha maromb danyuha furatn hir yifah-tamoya.
26 Bok yiham na fitoh yuka skitm yimoahat yakrmenano be yakrme yima yuhurpno kaumoa. Tekm miptkoneft yakrmihato tekm be yakrmenano yimoanm, yo raskorm yakrmihato yihotam yaumoahat o fitoh tkitm rhumoahat be yakrme yima yuhurpno rhumoa, yo tu Judam, tukanhu kmi thofmn yihotat rhu rafakhato memoum awasnomr, ndnetann be yakrmenano rhumoa, yo yima tangimn tabotakhato kalabus htaneft kfomoatm na be yakrmenano rhumoa. Na taunm tohmoahat o wom yuke skitm yimoahat, krhopam be inji hajohmoatm na be inji yakrmes rhumoa. Sifm yaknihato marombt tone hanymoahat be yakrmenano yimoa. Yo giaman Kristenm memoum yahr kmimpno hndhnarahnomr, ndnetann be yakrme yima yuhurpno rhumoa.
27 Wonk wonk hingrnefm hingrna hingrna hingrna yifungmoa. Nhai hwermoaya. Wom yiham yatinoh minysafnimoa. Wom yiham sfno nuwa ye juha tohmoa. Bok yiham frfon minysafmoa. Nhai kor siotham frfon yiham hmbreyukm.
28 Wom wom krhoparoh dukefm rom tom korhwom, tmift na kasinya hanyuk Kristen siosroh yak hta bohta yuharoh dukefmn tu bro dukeft korhwoma.
29 Wom Kristenrhu bbuka nanyjar rifhur bi riyohniyekwor, na to inji, tuka yironiwa na hatoh hasoyuk bbuka nanyjar rifhur yohniyaknitr. Yo wom tamoh nefmpno wom Kristenr msuhneft, nanhu yima yuhur nhai hwe marnyakahra. Na tfit namburwa inji wanyneft.
30 Na nhai tuka kfo grha yindhor mekfot na nd nahnamo nefm tukanhu duka tungunefrpno nahnamoyanm yo na hingrnahnamo hingrnefm tukanhu duka tungunefrpno o bbukefrpno hingrnahnamoyanm. Nhai. Na ndhtet yimena, be nanrpayann finji narmoyanm tamoh nefm o finji hingrnarmoyanm tamoh hingrnefm. Bro Nkifrar toh-nhomotra nd tamoh tamoh nefm namoyanm o hingrnefm hingrna-moyanm. Ndtpno na Bro Nkifrar kfo grha yindhorwanr.
31 Nd Bro Nkifrar, Bro Nungothet Jisasrhu Yifemr, nom nd yura yura kfo yuta hagrhewar, na nd Nkifrar tawisafwora, na kfo hnayuk mrokfom nhai kfo nhehkohanko.
32 Damaskusn king Aretasrhu yinhit tohyuk gafanar nanhu yakyuk mrokfot soldiampno htamotrt soldiam taun rim fnahnitn toh hajohmoum.
33 To nhai. Wom Kristen yimam yuke mtitofe ttafet kpt mihmbremota taun gnathu windua yuhatn kpeta yafuhafmotma bbinysoft mitohnihato fakrmenimoya.