10
Bingot tarioh mthamoahat fasoh nefm Bro Nkifrar nhai yak thurmoarm
1 Tamohmpno Jisasr nohmor? Mna yuhat inji korht. Bingot Bro Nkifrar Mosesrpno yihato boririfhu nuhasmohat boririfhu nuhasmorr Bro Nkifrarpno kfo bruttna inji naneft. Kfo hta nuhasmorrn Judam nd mrokfo yuhat hikmoum. Nd rom boririfhu nuhasmo yuhat hikhato kfo tatomoahat memoum, “Ka tot tu hifa rhu nmbuha yakyuk yihotat.” To nhai. Tu hifa rhu nmbuhathu yakyuk yihotat tot rirhumout. Rom be inji mkndh wuna tanymoumt tu yihota yuhat. Rpa rpa gunyjimm rmont yihato Bokis Kontrakt rim frppri wunamoahat yimaroh fasoh nefm nhai yak thurmoarm.
2 Nd rim frppri wunamoa kkut Bro Nkifrar ndt htihato yimaroh fasoh nefm bi ayak thuherm, nhai tfit duka krho hanyhato wompam yi hatohrfotm. Nhai. Bi nd rpa yispno yak thuhefotrm nd tarioh mtha hingrneft be myafhonirfomt.
3-4 To nhai, gunyjim gunyjimm kkupam yakhato Bokis Kontrakt thu ppri wunamoahat Bro Nkifrar nhai yak thurmoarm. Nhai. Nd fasoh nefm rhumoatm tfit waduka thu waduka thumoumm.
5 Ndnatn Jisasr yuhre bbinysoft nia yibon hanyetrn Jisasr sinyahato Bro Nkifrar kfo memorr,
“Yeshri mhta hihato tarioh mthamohat
nhai hti wofnrmonm.
Yemro skurn gbefr nhai wofnrmonr.
Inji hti hhrekhato wakfomotn bbinysofthu yimaroh thatipt kanjo fak nhombra-nimoya.
6 Yemrom yakhato tarioh kandhi gunahato krn gbefr muhwohat
ndm nhai mthatihato yindhor-kahn.
Yemro kkut yakhato thu pprimoahat
Bokis Kontrakt nhai ndm htihato yima yuhur yindhorrmoarn. Nhai.
7 Bro Nkifra, wahtina. Na asoya.
Ni tamoh dukefm korhwomn, mirahn aduka kinyakiya.
Tunhu bro rfa borngt kfomo yuhatn kanga,
‘Nann anohkahta nanhu kkut htihato
yimaroh fasoh nefm yak thuhiyanm, nhai mrokfom.
Na yibonwa nohneft.’ ” Sng 40.6-8
8 Nd ror barkof wukfonamo mrokfot tfit wompam kfo memor, “Yeshri mhta hihato tarioh mthewohat nhai hti wofnkahnm. Yemro skurn gbefr nhai wofnkahnr. Yemrom yakhato tarioh kandhi gunahato krn gbefr muhmohat ndm nhai mthatihato yindhorrmoa. Yemro kkut yakhato thu pprimoat Bokis Kontrakt nhai ndm htihato yima yuhur yindhorrmoarn. Nhai.” (Nd nd nefm Mosesr Bro Nkifrarpno yakhato yimam hikmoa nefm nhai yak thurmoamm yimam namoa fasoh nefm.)
9 Ndnatn Jisasr kfo memor, “Bro Nkifra, wahtina. Na asoya. Ni tamoh dukefm korhwomn, mirahn aduka kinyakiya. Tunhu bro rfa borngt kfomo yuhatn kangn, ‘Nann anohkahta nanhu kkutn htihato yimaroh fasoh nefm yak thuhiyanm nhai mrokfom. Na yibonwa nohneft.’ ” Ror inji kfomohat to nd nkifra hingrneft nkifram hingrnamoat fak thumort. Tfit turhu nfri hingrnef yuhat fak htamor.
10 Jisas Kraisr Bro Nkifrar kfomo yuhatn hikmorn nohmor. Nhai bok yiha noh hatohrmor. Nhai. Rpa noht nohmohat to be. Nd yiharpa nmoh fasoh nefm rorn yaknihato mhanohmotrm nom sfno yimanomn Bro Nkifrar htihato yindhorwor. Nhai be sfno, bi Jisasrn mhanohmorm nmoh fasoh nefm.
Kraisr nohmo yuhatn tot tu fasoh nefroh yak thu yuhat
11 Prism tarioh mthaneft hwe fnah hwe fnah tarioh mthewum. Nd rom tarioh mthewa yemrom nhai wom nndohtet nndohtet yemrom yakhato tarioh mthakahm. Nhai. Be rpahtet yemrom yakhato tarioh mthewum. Rom inji newohat Bro Nkifrar nhai nd tarioh narotwa gbefr mthatihato yak thuhikahrm fasoh nefm.
12 Prism yiha yiha tarioh mtha hatohmoum. Jisasr ror nhai inji na hatohrmor. Ror rpa noht nohmohat to be nd yiharpa yima bugaroh fasoh nef bugam yakni buga hemorm rorn mhanoh bugamorm. Mhanohhato be mrhumor Bro Nkifrarhu tu bro yufa yahuka tirmifko.
13 Mrhu-hato afo garitr Bro Nkifrarn, kangr, “Nd yimam na Jisasa tone dbombha hatohwa yimam afo Bro Nkifrarn nanhu yinhitn ahtarm.”
14 Ndnatn Kraisr rpa nohtpno yimaroh fasoh nefm nohmohat to be rroh yima yuhumio wutham rhumom. Nhai wom tamohm wom rhu hasormom. Bi wuthamn Bro Nkifrar frwus hasiwurmio yima yuhum. Kangr turhu ruheft kanjo aruh hasom.
15 Nd Bro Nkifrar yimaroh fasoh nefm yak thumo nmbuhat, to mirahko ka turpar pthamort nd mrokfot. Nhai. Tu Bro Nkifrarhu Yafothat to be rpa yuhat kfo hikmof. Nd Bro Nkifrarhu Yafothat kfo memot,
16 “Bro Nkifrar kfo memor, ‘Tfit kto rompno kndhakruha nfri yihotarhu hingrneft tfit nndo rhuraht. Nanhu boririfhut yimaroh yima yuhumn rhuraht. Yimaroh yima yuhum rhuruhatt nd boririfhutn yak hta bohtarahtm na Bro Nkifraya hikneft.’ ”
17 Tfit wom kfot kfo memor, “Rom wommpno nayuk tamoh tamoh nefm nann yuhuwafhato yak thuhiruhanm. Rom nayuk fasoh nefm nhai tfit duka-rhotanm.”
18 Bro Nkifrar bi mong trohefirm nd yimam nayuk fasoh nefm nhai tfit yemrom yaknihato mtarioh mthakfot. Nhai. Ror to be bi mong trohrm nhai tfit wom dukakahrm.
Bro Nkifrarhu dukefrparn rhuhato Bro Nkifrarpno brbo yikfot
19 Barenko, Bro Nkifrarpno brbo yinyeft, bi nhai wom mrokfom. Jisasrhu kkut bi yohnemotn nmoh fasoh nefm bi fak thumorm. Mirahko tfit wom aduka kinyaki hanynom Bro Nkifrar yorhwa tkitt yinyeft.
20 Nd Bro Nkifrar rhumoa tu Nngrajoh Hnaru Gnar bro yikop rmonthar hir rafomourr. Nhai yimam yihom fnahnikfot. Jisasr nohmo yiha nd rmonthar buha wuyoh tnehakmorn myoh tnehnimorn mku mku rim hir mhirmof. Nd yiha Bro Nkifrar rhumoa tkitt yihotett riruhakmot. Bingot nhai yihotett rhurmot. Jisasrn nd nfri yihotar fak nukakmorr. Tor tu Bro Nkifrarpno yita yihotar.
21 Jisasr nd nfri yihotar hingrnahato ror yimorn hefenrhu bro tohak prisr tohwor. Tohhato Bro Nkifrar hikwa yimam rorn tohukatohhato kukatohworm.
22 Bi Jisasrn nohhato nd nom hta rafomoa nefm bi rorhu kkutn frwus bowus thumotm. Frwus bowus thumottm bi mong troh bugamonomm. Mong trohhato baftaismonom. Ndnettn nom Bro Nkifrarpno yinyeft be rorrparn duka duka yikfot. Nom Bro Nkifrarpno yinyeft duka kinyaki hany juha. Bro Nkifrarpno brbo ainyom.
23 Bro Nkifrar bi kfomor hifa rhu nmbuhat hanyeft. Ror kfoyuk mrokfom nhai kfo furakahrm. Kangnom hefenrko he mifrahrnom nd hifa rhu nmbuhat. Ndnettn nmoh dukefm nd Bro Nkifrar kfoyuk mrokfotn duka duka rhu hasokfot.
24 Nom Bro Nkifrar hikwanom tunom nahti duka nahti dukakfot. Womr tamoh nefeter, ni womn yihato womr hti dukakfot. Tawo womr ninhu neft htihato ror nd yuhat hikrahr. Tunom inji rinahtiyak rinahtiyak narahnom be nd nefrpat rhurahtnom.
25 Wanyakmoya memom, “Rhu rifinyneft nhai rpat sinya bugahato rpat rhu rifinykahko.” Womm turoh kunymn korh hasiwum, womm nndo nndo hutraf habriwum. Ndt nhai hifa neft nakahko. Jisas Kraisrhu nia yihar bi brbohwor. Ndnettn tuko rpat rhuhato Jisasrhu mrokfom nakfo bmta nakfo bmtakfot. Nakfo bmta-ruhakomn Jisasrhu mrokfot nhai yafho thuruhatkomt.
Bro Nkifrarhu Yonr mong troh duha
26 Nom bi Bro Nkifrarhu fipet mrokfot wanyetnom ni womn mirahn frfnahnihato akfo amiya, “Bro Nkifrarhu mrokfot afo niko womrpako warihikaf hanykomt. Na afo wurhat rim yau-efiwa.” Ni yima inji wany sany hany-hato mong trohnirahnr, na kfiwann, be tu yohrafo tanyrahnt tfit tunhu niayuk yihotat. To fitoh yuhat tfit nieruha? Bro Nkifrar nhai tfit wom yakmiyak-ruhatrn.
27 Be bro yakrme dukefrpno Bro Nkifrarhu bro kotkfot toh gari hasorahn. Toh gari hasohato nd bro kotkfotn ni nd Bro Nkifrarhu mrokfom mong trohyuk yimani rorpno nahti dbnotwa yimam rpat yakruharko tu bro funa nanyjaret kahtn yiho turahrko.
28 Afo yatk yuhat yimam tohmohat Mosesr kfo nuhasmorm Bro Nkifrarhu boririfhut. Nd boririfhut wom yimar kfo hanyjbornanihato yifirn wom neft rim netrt, husf o husfirpa yimam htihato kfo nriyafmr, nd yimar nhai yuhuwafhato rhurmoar. Nhai. Kotkfot tohnihato was hehur thumoumr.
29 Nd yatk boririfhut hanyjbornamoa yimam inji namoumm. To tfit arihat Jisasr htamo nfri yiho-tarhu boririfhut yimam hanyjborna-nineft ka hifa rhurahm? Na kfiwanko nd yimam be tu bro krho nmbuhat yakrahm. Wom yimar Jisasrhu kkupamn yihotar yak nukektmr rorhu fasoh nefm Jisasrhu kkupaye yuk kifsa thunihato tfit kto mtoh kekuthato Jisasrhu kkupam kfo famurm, “Nd Jisasrhu kkupam be kkupa furayem. Nhai yafotha duhatem.” Nd yimar inji kfoyukr bro krho nmbuhat yakrahr. Yo womt, inji nd yimar kfo famur, “Nd Jisasr hingrnamo hingrneft nhai tu Bro Nkifrarhu Yafothatpno hingr-narmor. Fasoh tahi yifonroh bbukeft-pno hingrnamor.” Nd yimar Bro Nkifrar yak tutfarahrr.
30 To tamohmpno yak tutfaruharr? Mrokfot Bro Nkifrar bi kfomort. Kfo memor, “Hanyjborniwa yimam na tuka htiruhanm. Nhai wommn. Na tuka.” Wom mrokfot kfo memor, “Tuha kot tohyuk tkittn tukanhu met yindariroh nefm yak nhtaruhanm.” Tot inji Bro Nkifrar kfomo tngt.
31 Bro Nkifrar tu bro nanyjaret Nkifrayer. Ror namburhato afrwon-tarnom, nhai toh bmtaruhatnom. Mirahm, “Nndo kkr ritmn rim wuttho yibuknewum.”
Bro Nkifrar yakitoh kihhato tohkfot
32 Niko tuko wadukako niko barkof Bro Nkifrarhu mrokfot wanyhato rihikakmohat kmi thofm htihato nambur memom, “Tamohmpno nd Jisasr hikwam?” Inji namburhato memom, “Wom nefm anakahtnom tfit mkekutakrahm.” To nhai. Niko hifa nhai wohsisrmoko. Hifa toh bmtamoko.
33 Wom yiham yima rifiny buhamn kfo sinou bosinou, kfo yimtna boyimtna, kuninfar wuna inji namoumko. Wom yiham womm bi inji newumme niko womko rpat yihato rpat womm tohnuhaknimoakomm rpat kfo nyingo fnah inji namoumko.
34 Niko toh hasohato yimam niahato nikmoh womm mkitumakhato kalabus hanymoahat niko womko nhai yakrme trohrmoa-komm o be yukatohrmoakomm. Nhai. Rom finji namoumm niko womko brbo toh tkaf inji namoukomm. Krhopam rpat fakmoukomm. Yo yimam niahato nikmoh wuskam myak rhoptakni hemoahat nhai namburhato tone hik inji narmoakomm. Nhai. Niko be hifa yindhor yima yuhumpno kfo memouko, “Nhai mrokfom, ayaknimm. Nom nhai namburkoft.” Nikmoh dukefm duka memouko, “Tamohmpno nd fasoh wuskampno anamburnom? Nmoh tu dborioh wuskam Bro Nkifrar kfomom yura hefenrn korhwom. Nd fasoh wuskam ayaknimm.” Ndhtet dukefmpno rhumouko.
35 Niko hifa Jisasr fak hiknamokomr. To tfit mirahko tfit ayafhoninomr. Yakitoh kihhato toh bmta hasorahko, tur yimayer hti dukarahrko. Nd ror kfomo hifa dborioh rhu nmbuhat hirahrko.
36 Bro Nkifrar kfoyuk yihota yuharpat yak hik hasokfot. Inji yak hik marnya hasorahkomr, be nd Bro Nkifrar kfoyuk hifa rhu nmbuhat wuroh yiharn yakrahkomt.
37 Kraisrhu yawihna yihar nkifram yakitohmo rfa borngtn kfo memot, “Nd yawihnayuk yimar bi brbohwor yawihnaneft. To mirahko ka wukuknarahr yawihnaneft. Brbo htiyekwokomr.
38 Yimam nanhu yima yuhurn rhu hasiwamn ror fawihner, na yindhorhato yakrhoyanm nanpno toh nkifranirahm. Yimam nanhu yima yuhur rhu hasohato tfit kto nd yima yuhur fafho thunimr, be nd yimam ror yawihna thombat na nhai yindhorrhotanm.”
39 Awi nom nhai mrokfot. Mirahko aduka kinyakinom. Nom hifa. Nom nhai wom yimam newa kanjo Bro Nkifrarhu yima yuhur rhu hanyhato tfit kto yafho thukahnomr. Nhai. Nmoh yima yuhum Bro Nkifra hikwa yimaroh yima yuhum kanjo korhm. Ndnetnomn nom Bro Nkifrar yakruharnom rorpno toh nkifrarahnom.
Bro Nkifrar yakitohhato toh bmta kihkfot.
(Sapta 11—13)