2
Brorhu nrfa htiyak yuhat
1 Bro Nkifrarhu Yonr be tu bro yufa mift fakmor. Ndnettn nd Yonr kfoyuk mrokfot yakitoh kihkfot. Yakitoh hrufrehrahkomt to be yak frikatiyafrahkomt.
2 Bingot nkiframpno mounmotm Mosesrpno yimomn kfo borsisha nuhasmomr. Nd borsisha mrokfom Mosesr yakmom tu bro borsisha mrokfom yakhato kfo nuhas-mourm. Yimam nd borsisha mrokfot hanyjbornamoahat tu Bro Nkifrar kfomo yuhatn kak tutfamourm.
3 Tfit ndar yihat nfri dfa tik yuharhu mrokfot Jisasr kfo nuhaswat yimam hik duha yinyeft, to be finji kafrohruham? Nd Bror yimam nrfa htiyekwa nmbuhat bi turn kfomotr womm wanyhato kfo nuhasmomnom. Ndnettn to mirahko ka kfo furakfoyet.
4 Tu Bro Nkifrarn thu nawohmoatrm wonk wonk nefm na bugamoumm. Bro Nkifrar yimamn mthu nawohhato pthamoahat duka memour, “Inji yak nuhaskahtanm yimam htiruhamn mirahm, ‘Mrokfom tu fipet mrokfot wanuknom.’ ” Tu Bro Nkifrarhu Yafothatn rpa rpa nefm kak htamourm rpa rpa yimam.
Jisasrhu yufat tohekwot
5 Bro Nkifrar king toh thombat mounmotm nhai tfit hingrnefm yakitohnhokfot. Nhai.
6 Bro Nkifrarhu rfa borngtn wom yimar kfo memor,
“Yimanom tamohtetnomn ni Bro Nkifraye be mfro dukewannom?
Nom yima furayenom. Tamohm-pno yamuka, ‘Adukayanm?’
7 Nom yimanom ninn hingrna-monnom.
Be dfik yiham mounmotroh yufamn afo mfrfnahnimom.
Tfit kto nomn bro yufat hemonnom.
8 Nmoh yinhitn hta bugamohat wuskam, nhai wom tamoht rim tohtarmot.” Sng 8.4-6
Tamoh tamoh shrenm nmoh yinhitn hta bugamorm. Nmoh yinhit htamohat arihat tafi nmoh yinhitn wuskam rhukahtm htikahnomm. Nhai.
9 Tot wom yimarhu yufat riyorhwot. Nd yimar bbinysoft tohmohat afo mounmotroh yufatpno rorhu yufat ritohtamout. Tfit arihat nohnihato rorhu yufat mfrfnahnihato tohekwot. Nd yimar Jisaser. Nd mounmotroh yufam mfrfnahnimohat duka memor, “Afo bbinysofthu yimaroh tkitt nann yakrhoyantn nohruha. Rroh nohyuk tkitt nann yakrhotant Bro Nkifrar ndt htihato yuhuwafhato yakrahrm.” Ndnetrn Jisasr be tu bro krhopam yakhato nohmor. Nd krhopam ror yakhato nohmom, Bro Nkifrarn thu bmtamotrr ror toh bmtahato nohmor. Kto Bro Nkifrar tfit kasinyamorr. Kasinyafhato bro yufat hemorr.
10 Bro Nkifrar tor tu ndar bbinysoft yakitohwa yimar. Tur kangr, “Finji finji ayak hta bohtayant, nhai mro-kfom.” Ndnetrn duka memor, “Bbiny-softhu yimam newa fasoh fasoh nefm Jisasrn yiruharn rorn nd bbinysofthu yimaroh tkitt yakhato nohrahr. Nohruhatr yimam ndt htiruhamn tfit nann hikrahm.” Jisasr nd krhopam yakmohat nhai nd krhopamn hta kasuhrmomr. Nhai. Nd krhopam frdbruf thuhato tohmor. Nd krhopam yaknihato dfa tik yuhar htakmorr. Nd dfa tik yuhar yauwa yimam turn nyingako tohekworm.
11 Froh frohm Jisasr bi fak wus bowusrm, nd yimami Jisasr bi rpa yifemetem. Jisasr kangr, ayutayanm nmemrom, nhai mrokfom. Bi rpa yifemetmn hti yindhorworm.
12 Kfo memor,
“Bro Nkifraye, ni hingrnamo hingrneft nanhu nmemrom kfo ptha srh nuhasruhanm.
Bro rifiny swirmn yufat yutahato kfo ptha yindhorruhant.” Aisaia 8.17
13 Tfit kfo memor,
“Nanhu bro dukeft kanga nd Bro Nkifrar kfoyuk mrokfot amhikakniya.
Na afo asoya tohwa Bro Nkifrar hemo yonmpno.” Aisaia 8.18
Nom tamoh nefm yakneft Jisasr toh nuhaknerahrnom
14 Nd Jisasr kfo memo, nanhu nmemroyem, ndm ndar bbinysoft tohwa yima mifthet met yindarim kfomor. Jisasrhu toh nmbuhat rom kanjo toh nhombramor. Memor, “Rom kanjo toh nhombrakahann kto nohhato nd Satanr yakitohwa noh yafothat yak thuruhant.
15 Rorn kfo yakrmitatrm yimam kakrmitwom nohneft. Noheft yakrmitatm Satanrhu fasoh dukeftn kak hikwom. Nann noh nuhasrhotanm nhai wom yakrmiruhatm nohneft.”
16 Jisasr nd krhopam yakhato nohmohat nhai mounmotm dukahato nohrmor. Nhai. Abrahamr tohmo kanjo tohet yimam dukahato nd krhopam yakhato nohmor.
17 Bro Nkifrar kfo memorr, “Bbinysofthu yimam kangn hifa tkitt ayak htayanm, btn ndhtet neft afo rompno yihato rom tohwa tkitt watohnhokahnm rom krhopam yakneft ni htiruhann hti yuhuwafrahnm. Ninhu yuhuwaf nmbuhat rom hti dukaruhamn rom tamoh krhopam rhunefm ni prisroh bro tohak prisn kanjo rroh krhopam mhiruhatmn tfit ninn yakhato nann yuwa hirahn. Ni be buha tohhato rroh fasoh nefm yak tuhafhikahtnm nanpno nierahm.”
18 Jisasr yimanom kanjo tohhato wom yiham memour, “Bro Nkifrarhu dukeft ahika,” to nhai, mduka nhitamour. Turn wabbuka sinyahato memour, “Nd Bro Nkifrarhu dukeft ahika,” krhopam fakmour. Ndhtet nefm ror bi mhtiyafetrn btn nom tamoh nefm yakneft bmbri toh nuhaknerahrnom.
Mosesrhu bro yufat Jisasrhu bro yufathu yinhitn korht.
(Sapta 3.1—4.13)