SALIK ULI PAS DOUK JON NENEKAS ULI
Banenyi balan umu enyudak balan Jon nalik neneken uli
1:1-4 Jon naklipech God ananin balan ali nechuhul umu chunehilau
1:5–2:29 God anan douk nanubu nehiyatiki. Ali apak imas mupe hwalalagunmu, umu agundak munek duldulinyi pasin ali ulkwip punosuh chunatimaguk elpech umu
3:1-24 Apak douk mape God ananipu batowich. Ali nameitu apak imas ulkwip punosuh apakich sachich owachich. Wakuli chenek yowenyili elpech douk Satan ananich ali chape chenek yowenyi namudak ati
4:1-6 Apak imas munek skel umu chunatimaguk elpech ali mudukemech umu echech God ananin Michin nyapenyich waka Satan ananin nyapenyich
4:7–5:21 God nakagasi ananinu nuganinu nanaki apudak atap umu nugilapapu enyudak pasin umu ulkwip punosuh elpech umu. Apak imas munek bilip umu anan ali munek pas anan atunu umu nunekapu mupe kalbu eheh nyumneh
1
Krais Anan Douk Bawagas Umu Elpech Chupe Kalbu Eheh Nyumneh Umu
1 Apak monekumepu balan asudak pas ali maklipepamu anudak alman douk nonohwalamu Balan uli. Anudak alman Balan, elpech douk eke chulawanu ali chupe kalbu eheh nyumneh. Seiwak susubati watak bawagas umu anudak alman Balan douk nape. Ali apak douk amemnek umu agundak anan neyagwleh umu ali amatulunu apakis nabes. Adul apak douk matulunu ali masusuhwanu apakis wis.
2 Anan douk anatoglu yopugunmu ali matulunu. Ali apak douk meyagwleh adulin atin balan umu anan ali maklipu ipak umu anan douk bawagas umu elpech chupe kalbu eheh nyumneh umu. Seiwak nanu Aninu hape ali douk anatoglu yopugunmu matulunu.
3 Apak douk amatulunu, memnekanamu neyagwleh umu ali douk maklipu ipak chopuk. Maklipepamu ipak punu apak munubu mupe atugun musuh atin. Ali apak munu apakinu Aninu God nunu ananinu Nuganinu Jisas Krais mupe atugun musuh atin.
4 Apak mowemu enyudak balan umu apak munu ipak eke munubu munehilau mulikuk.
Apak Imas Munubu Mupe O Mulahe Hwalalagunmu Atugun
5 Enyudak balan douk apak memnekanu naklien uli douk enyudak nameitu maklipepumen. Balan enyudak. God anan douk kobi lait umu. Nanubu yopuyopunu ali wo kwalowi eneh yomotokweh hupenyunu kobi nenek enen yowenyimu e, wak meyoh.
6 Sapos apak mukli apak manu God mape atugun masuh atin, wakuli ababuk nyultab apak wata kobi mape yomotokweh umu agundak monek enenyi enen yowenyimu, namudak douk monek loh. Wak mugipech adulin atinyi balan e, wak. Ali enenyi enen mape moneken uli wak adulin e, wak.
7 Wakuli sapos apak mulahe hwalalagunmu, umu agundak munek enenyi enen yopinyi kobi anan nape hwalalagunmu nanubu yopunamu, namobuk adul apak manubu mape atugun masuh atin. Ali ananinu Nuganinu Jisas ananig butog gwaklupu apakiluh apaluh ali nenekapu matoglu yopupali wak enen yowenyi nyupenyupu e, wak.
8 Sapos apak mukli apak enenyi enen yowenyi wak enen nyupenyupamu e, namudak douk manubu monek loh umu apak yet. Monek loh ali aduligeinyi balan douk wak enen nyupenyupu e, wak.
9 Wakuli sapos apak muwoleh enenyi enen apakin yowenyi muklipu God umu, anan douk yopunali ali eke nugipech ananin adulin atinyi balan seiwak naklien uli. Eke nunubu nunek duldulin moul umu kobi nunosuh apakin yowenyi nupe, wak. Eke nukwleyenyuk ali nugabeyapu nunekapu munubu mutoglu yopupali elpech.
10 Sapos apak mukli apak wo munek enen yowenyimu e, namudak douk makli God anan napemu nenek loh uli. Ali ananin balan douk wo nyupe apakiluh apaluh e, wak.