21
Nupoleibul Wabul Heven Uli Nupoleib Amnab
1 Douk enyudak nyanakuk ali yek yatiku nupoleibul wabul heven blanu nupoleib amnab chape. Blalik uli wabul heven blanu balik uli amnab chanu yous chanubu chanak chawichuk ali watak enech chupe e.
2 Wakuli yek yatiku abuldak dudukabul wabul Jerusalem. Ababul douk blapeli agundak God napemu ali blatukemaguk iluh heven blape blagluki. Abuldak wabul douk chaginohwabul kobi douk onok almatok douk kwanoginoh kwonek dudukeh atih luseh ali kwapemu kwunu okwokwinu alman chunasupaluli.
3 Ali yek yemnek anagu nigu agnabuk enyudak nebenyi sia nyakus umu. Ali enyudak elpen nyeyagwlehi uli nyakli, “Ipak pumnek! Nameitu God douk a nanu elpech chape atugun! Ali anan eke nunech chupe ali echech eke chupe ananich atich elpech. Ali anan eke nupe echechinu nebenali God.
4 Ali anan eke nunubul-umechuk abih echechis nabes ali echech eke kobi wata chugak ati, wak. Ali echechiluh apaluh eke kobi wata yoweluh ali chumnek eneh nyih ali chuleh, wak. Nyanatimaguk enenyi enen douk seiwak nyape nyatoglomu elpech uli douk anyanubu nyanak nyawichuk.”
5 Wakuli anudak nape enyudak nebenyi sia uli nakli, “Ipak pumnek! Nameitu yek yenek chanatimaguk enechi enech echudak chape iluh atap uli chatoglu nupoleich!” Ali anan wata chopuk naklipe nakli, “Nyak nyuwemu enyudak balan douk dukwechuk nyemneken uli anap chup. Umu moneken, enyudak balan douk nyanubu adulin ali nyanokwnumu elpech chumneken ali chuhwen dadag chugipechen.”
6 Ali anan naklipe chopuk nakli, “Echudak enechi enech douk achatoglu chatuh! Seiwak bawagas umu chanatimaguk enechi enech echudak watak enech chutoglu chupe e wakuli yek ayape. Ali kwali chopuk eke ipe aliga hugikuk uli nyumnah hutoglu. Ali meinyi elpen abal blugahogen uli, yek eke iken anabal abal nyubalah meyoh. Enyen kobi nyutalubal, wak. Abaldak abal douk blakih atap meyoh uli. Ababal douk eke elpech chubalah ali chupe kalbu eheh nyumneh uli.
7 Ali meinyi elpen douk nyiyotu dodogowin atin nyunek wanoh nyubo yowenyi nyubihuk uli, enyen eke nyuglemu chunatimaguk yekich yopichi echudak. Ali yek eke ipe enyen nyenek lotumeuli God, ali enyen eke nyupe yekin batowin.
8 Wakuli echebuk douk elgeich ali wata chatanamu chenek yowenyi uli, chunu echebuk douk wo chusuh yekin balan dadag chugipechen uli e, chunu echebuk douk chenek enenyi enen yowenyi uli, chunu echebuk douk chabo kipaichi elpech chagak uli, chunu echebuk douk chanasonukeh umu chanak hwaloh uli, chunu echebuk douk chenek ouluh uli, chunu echebuk douk chenek enenyi enen yowenyi marila uli, chunu echebuk douk chenek lotumu echudak douk wo adulimi god omi uli e, chunu echebuk douk chenek lohumech uli, echech chunatimaguk eke chunak chupe agudak bobigu douk nyihihichihi nyih hape hanuiagali. Agudak bobigu agag douk eke elpech chubih ali wata chugak anah alagun umu.”
Nupoleibul Wabul Jerusalem
9 Ali enen ensel umu echudak 7-poleich enselahas douk chasuh chanubu chagikuk uli 7-poleich chanubu yowechi echudak uli nyanaki ali nyaklipe nyakli, “Nyak yowi ali igilapenyu Nugan Sipsip enyenyik almatok.”
10 Ali God ananin Michin nyatoglome dodogowin atin ali agnabuk yek kobi douk yonobek yomnis umu. Ali enyudak ensel nyalawe wanak walto ananu nebenali lounali maunten. Ali enyen nyogilape abuldak God ananibul dudukabul wabul Jerusalem. Ababul douk blapeli agundak God napemu ali blatukemaguk iluh heven blape blagluki.
11 Ali agundak douk God nanubu dodogowinu ali nohiyatik umu gnohiyatik numun abuldak wabul. Ali ababul blaglak anagun sik kobi douk anam dudukam utam douk chatalum nebebali utabal uli moglak umu. Ali chopuk, ababul blaglak kobi douk anam utam jaspa manu glas chaglak umu.
12 Ali asudak banis douk sene banis umu abuldak nebebuli wabul uli douk sanubu nebebesi ali loulousi salto gani iluh. Ali 12-poleich duahas chape asudak banis. Ali chopuk, 12-poleich enselahas cheyotu chenek was umu echudak 12-poleich duahas. Ali asudak 12-poleis awilasich elpech douk saitaki Israel uli asasich yeguh chetemu echudak 12-poleich duahas.
13 Ali 3-poleich duahas chape gani woblahahis umu banis douk sape satik aun nakihumalimu. Ali 3-poleich chape chatik saut, 3-poleich chape chatik not, ali 3-poleich chape chatik aun nabuh umu.
14 Abuldak nebebuli wabul ababulis banis agundak atapis umu douk setemu 12-poleibal utabal umu blahwas satau dadag uli. Ali enyudak Nugan Sipsip enyenyim 12-poleim aposel douk likuk enyen nyataliham umu hunak huklipech God ananin balan uli amamich yeguh chetemu abaldak 12-poleibal utabal.
15 Ali enyudak ensel douk nyane weyagwleh uli nyasuh anagu stik douk chenekagu gol ulimu chape chasuh wikah umu echudak agali. Enyen nyakli nyusuh wikah umu abuldak nebebuli wabul blunu asudak nebesi banis sunu echudak duahas douk chape banis uli.
16 Abuldak nebebuli wabul loubul umu blanu agundak nebebul umu douk blanubu alagun ati. Ali enyudak ensel nyaku enyenyigu stik ali nyasuh wikah umu abuldak wabul. Ali douk enyen nyasuh wikah ali blanatimaguk agundak loubul umu blanu nebebul umu blanu agundak atap blalto iluh umu douk blanubu alagun ati. Ali chasuh wikah umu, ababul douk blanubu louloubuli halakatimu 2,200 kilomita.
17 Ali enyen nyasuh wikah umu banis chopuk. Ali agundak atap salto iluh umu douk halakatimu 144 mita. Agudak stik enyen nyasuh wikah umu asudak banis uli douk agudakmali douk elpech isave chasuh wikah umu echudak ulimu.
18 Ali asudak banis douk chenekas abaldak utabal atubal douk chohwalabal umu jaspa uli. Ali wabul ababul yet chenekabul chakwu yopuli gol douk laglak ali lohiyatik kobi glasumali.
19 Atapis umu asudak banis douk chenekas umu chunek banisumu abuldak wabul uli douk chenekas dadag. Ali chaginohwas wolobaibali silisili ibal dudukabal utabal douk chatalubal nebebali utabal uli. Malik uli utam douk makus atap umu masuh asudak banis uli douk jaspa. Ali namba 2-im douk blupoleimi douk chohwalam umu sapaia uli. Ali namba 3-im douk chagalihwimi douk chohwalam umu aget uli, ali namba 4-im douk grinpoleimi douk chohwalam umu emeral uli.
20 Ali namba 5-im douk anagunim umu owichibalim ali anagunim umu chagalihwim. Amam douk chohwalam umu sadonikis uli. Ali namba 6-im douk owichibalimi douk chohwalam umu konilian uli. Ali namba 7-im douk okigwanaluhimi douk chohwalam umu krisolait uli, ali namba 8-im douk sik grinpoleimi douk chohwalam umu beril uli. Ali namba 9-im douk anam sik okigwanaluhimi douk chohwalam umu topas uli, ali namba 10-im douk anagunim umu grinpoleim ali anagunim umu okigwanaluhim uli. Ali amam douk chohwalam umu krisopres uli. Ali namba 11-im douk anam sik blupoleimi douk chohwalam umu haiasin uli, ali namba 12-im douk anam sik owichibalimi utam chohwalam umu ametis uli.
21 Ali echudak 12-poleich duahas douk chenekech chakwu 12-poleib chagalihwibi nebebebi weyoub douk chatalub nebebali utabal uli. Ali echudak duahas atin ati chenekech chakwu atutu ati nebegwi weyoubig douk chohwalab umu pel uli. Ali ahudak nebehi yah douk hape abuldak nebebuli wabul uli douk chenekah dudukal gol ali ahah hape kobi glas umu.
22 Ali yek wo itik God ananitu nebetali wilpat tutau abuldak wabul e, wak. Umu moneken, Diginali God anan douk nanubu Dodogowinali uli nanu Nugan Sipsip amam yet hape kobi God ananitu wilpat umu.
23 Ali abuldak wabul moul eke kobi enen umu wah hutau hutulubul umu o wabinu aun nuglak ali hwalalagun umu, wak. Umu moneken, agundak douk God nanubu dodogowinu ali nohiyatik umu, agagun yet eke gnunek blunatimaguk abuldak wabul bluglak ali hwalalagun. Ali chopuk, enyudak Nugan sipsip enyen yet nyaglak kobi douk lam umu ali nyenekagun hwalalagun abuldak wabul.
24 Ali chanatimaguk elpech chape wolobainyi kantri uli eke abuldak wabul bluhiyatik-umech ali echech eke chunatulugun ali chulahe. Ali amam king douk hape apudak atap uli eke hulau amamibal utabal blunu chunatimaguk enechi enech amamich yopichi echudak hunak huwich abuldak wabul umu hakli hutuk God ananin yeul nyukih.
25 Ali nyumnegwih, abuldak wabulich duahas eke chunejik chupe namobuk ati. Umu moneken, agnabuk webus eke kobi anabus, wak.
26 Ali chanatimaguk elpech chape nyanatimaguk kantri uli eke chulau echechibal utabal blunu yopuhi jah chuwich abuldak wabul umu chutuk God ananin yeul nyukih.
27 Wakuli chunatimaguk enechi enech chabosusih uli yowechi echudak, chunu echebuk elpech douk chenek enenyi enen yowenyi uli, chunu echebuk douk chenek loh umu kipaichi uli eke kobi chuwich abuldak wabul, wak. Wakuli echebuk elpech douk echechich yeguh chetemu Nugan sipsip enyenyik buk uli echech atich eke chuwich abuldak wabul. Okwudak buk okwok douk echebuk elpech douk eke chupe kalbu eheh nyumneh uli echechiguh yeguh hwotemeyokwi.