12
Ritonõpo zuzenu nekarory poko
1 Wekyry tomo, ynara matose, “Oty ekarõko Ritonõpo zuzenu nae kyya xihne?” matose pape poko. Naeroro Zuzenu kurã nekarory tõ poko ourutorỹko ase, zae zuaro oehtohkõme.
2 Jezu poetoryme exipitopyra ro awahtao xine joroko tõ eahmary poko mexiatose, Ritonõpo myakãme repe. Yrome opynanopyrykõ waro pyra mokaro mana, ritõ kuhnanõme rokẽ toexirykõke. Toto poko oexirykõke kokoro rokẽ oenekunopyase xine.
3 Yrome seromaroro ynara kananõ nae, “Ritonõpo poe ase senohne rĩko,” kananõ nae mana. Yrome Ritonõpo zuzenu poe toto ahtao, “Jezu popyra mana,” kara toh mana ipunaka. Ritonõpo zuzenu poe ynara ãko mã toto, “Jezu jesẽme mana,” ãko Ritonõpo zuzenu nae exiketõ mana. “Kuesẽkõme mana,” ãko mã toto. Imehnõ mã morara kasaromepyra mã toto. Moro waro awahtao xine Ritonõpo poe oturuketõ nymyry waro matose. Ajohpe exiketõ waro roropa matose.
4 Tuhke rokẽ Ritonõpo zuzenu nekarory tõ kyya xine mana. Yrome toiro rokẽ ekarohpõ mana.
5 Tyotyoro poko tuhke erohnõko sytatose Kuesẽkõ omipona. Yrome toiro rokẽ Kuesẽkõ mana.
6 Tyotyorõ poko emese kure sytatose orẽpyra kuehtohkõme Ritonõpo nyrohmanohpotoh poko. Yrome toiro rokẽ Ritonõpo mana. Ipoe rokẽ emese kure sytatose, tyjamitunuru ekaroryke kyya xine, inyrohmanohpotoh poko kuehtohkõme.
7 Tyjamitunuru ekarõko Ritonõpo kyya xine mana imehnõ Jezu poetory akorehmatohme kyya xine.
8 Tyjamitunuru ekarõko toitoine typoetory tomo a emese kure toto ehtohme zae omi ekarory poko imehnomo a. Imehnomo a tyjamitunuru ekarõko mana emese kure toto ehtohme imehnõ amorepary poko Ritonõpo omiry poko, zuaro toto ehtohme.
9 Imehnomo a tyjamitunuru ekarõko mana yronymyryme Jezu enetupuhtohme eya xine. Imehnomo a tyjamitunuru ekarõko mana kurãkõkara kurãkatohme eya xine.
10 Imehnomo a tyjamitunuru ekarõko Ritonõpo zuzenu mana imehxo Ritonõpo ehtoh enepotohme imehnomo a. Imehnomo a tyjamitunuru ekarõko mana tõmiry ekarotohme imehnomo a. Imehnomo a tyjamitunuru ekarõko mana Ritonõpo zuzenu poe exiketõ waro toto ehtohme, typoe rokẽ ytoytoketõ waro roropa toto ehtohme. Imehnomo a tyjamitunuru ekarõko mana imehnõ omiryae oturutohme. Imehnomo a tyjamitunuru ekarõko mana mokyro zurutopõpyry enetupuhtohme ekarotohme ropa kuomirykõae.
11 Tuhke ekarõko Ritonõpo zuzenu kyya xine mana. Yrome toiro rokẽ ynororo. Tamoreme ekarory se exiryke tyjamitunuru ekarõko kyya xine mana.
Typokõke tuhke kuokokõ mana
12 Kuokokõ tuhke typokõke mana. Moro saaro Kyrixtu enetupuhnanõ tuhke mã toto. Yrome toiro zokome sã sytatose Jezu enetuputyryke kyya xine.
13 Tuhkãkõ Jezu Kyrixtu enetupuhnõko mana. Juteu tomo, juteutõkara roropa enetupuhnõko mã toto. Tosẽke exiketomo, tosẽke pyra exiketõ roropa enetupuhnõko mã toto. Enetuputyryke kyya xine tukurãkase sytatose Ritonõpo zuzenu a Jezu Kyrixtu zokome sã kuehtohkõme. Ritonõpo jamitunuru nae sytatose Zuzenu kukurohtao xine exiryke.
14 Ynara exiryke, toiro rokẽ pyra kuokokõ pokõ mana. Tuhke typokõke mana.
15 Kupupurukõ ynara kara mana, “Tyoro jexiry se ase. Omame se ase,” kara mana. Pupume ro mana, myaro tokorõmero.
16 Morararo kypanarykõ ynara kara mana, “Onume pyra jexiryke zoko pokõme pyra ase,” kara mana. Kuokokõ pokõme ro mana. (Kuokokõ pokõ mã oxikerekeremara mana Ritonõpo netaryme. Tãkye rokẽ mã kehko toerohtohkõ poko.)
17 Kuokokõ tytororo onume rokẽ ahtao otato pyra sehtory. Morararo paname rokẽ kuokokõ tytororo ahtao eunatara sehtory.
18 Yrome toiro rokẽ pyra kuokokõ pokõ tyrise Ritonõpo a. Tuhke kypokõkõ tyrise eya kuokokõme tytororo kuehtohkõme. Morara tyrise kymarokõ Ritonõpo a tõsenetupuhtopõpyryae ro.
19 Toiro rokẽ kypokõkõ ahtao tokoke pyra sehtory.
20 Yrome zoko pokõ tuhke tyrise toiro tokoke kuehtohkõme.
21 Naeroro kuenurukõ ynara kara mana kuemarykomo a, “Ose pyra ase,” kara mana. Kupuhpyrykõ ynara kara mana kupupurukomo a, “Ose pyra ase,” kara mana. (Moro saaro, “Mose se pyra ase,” kara sehtone imepỹ Jezu poetory poko Jezu Kyrixtu enetuputyryke kyya xine.)
22 Kuokokõ tyrise Ritonõpo a. Kure pyra kuokokõ pokõ toehse ahtao ise ro sytatose. Oxisã kuokokõ pokõ jamihme se sytatose. Kuokokõ pokõ toiro touse ahtao, etuarimãko sytatose otarãme orihnõko sytatose.
23 Kuokokõ pokõ xihpyry nae sytatose. Kyya xine xihpyryme mã repe. Yrome ipyno ro sytatose. Ehxirõko sytatose kuokokõ pokõ jarao tõsenese ahtao, yrome ipyno ro sytatose.
24 Mãpyra kuokokõ pokõ kure potu kyya xine ahtao, ipoko pyra sytatose kure exiryke. Etatoko pahne, otarãme ehxirõko sytatose xihpyryme kuokokõ pokõ ahtao repe. Yrome Ritonõpo ehxiropyra mana kypyno xine toexiry poko. Kuokokõ pokõ emero tyrise eya kuokokõme.
25 Kuokokõ pokõ tyorõ pokona atapiakara mana. Morohno poko rokẽ mana. Kuokokõ pokõ tuhke roropa repe. Yrome oximaro erohnõko mã kehko toiro tokoke exiryke. Moro saaro atapiakara sehtone. Kuesẽkõ omipona rokẽ sehtone.
26 Mame toiro kuokokõ pokõ jetũ ahtao, tytororo kuokokõ samũ ãko mana. Morararo kure rokẽ kuokokõ pokõ ahtao tytororo samũ kara mana, toiro kuokokõ exiryke. Jezu enetupuhnanõ kuokokõ sã mã toto. Kuepekõ etuarimary eneryhtao kyya xine, emynyhmãko sytatose. Kure kuepekõ riryhtao imehnomo a tãkye sytatose kuepekõ poko.
27 Kymarokõ emero Kyrixtu zoko sã sytatose. Tuhke kuokokõ pokõ tyrise Ritonõpo a kuokokõme. Tõsenetupuhtopõpyryae ro morara tyrise sytatose. Moro sã kymarokõ emero Jezu Kyrixtu zoko sã sytatose. Kyrixtu zoko pokõ sã sytatose.
28 Naeroro Kyrixtu enetupuhnanõ tyrise Ritonõpo a imehnõ akorehmaneme. Apitoryme ynara tykase ynororo, “Umũkuru poko omi kurã ekaronanõme matose,” tykase. Imehnomo a, “Jomiry poko urutõme matose,” tykase. Imehnomo a, “Jenetupuhnanõ amorepaneme matose,” tykase. Imehnomo a, “Yjamitunuru ke ynyripohpyry tyritoko,” tykase. Imehnomo a, “Kurãkõkara ikurãkatoko ropa,” tykase ynororo. Imehnomo a, “Imehnõ akorehmatoko jurumekara toto ehtohme,” tykase. Imehnomo a, “Imehnõ esẽme ehtoko roropa,” tykase. Imehnomo a, “Imehnõ omiryae urutõme ehtoko roropa,” tykase, enara.
29 Emero pyra toitoine rokẽ Ritonõpo nymenekahpyryme mã toto, Tumũkuru poko imehnõ amorepatohme. Toitoine rokẽ urutõme roropa mã toto. Toitoine rokẽ amorepatõkõme mã toto. Toitoine rokẽ Ritonõpo jamitunuru nae mã toto orẽpyra inyrohmanohpotoh ritohme.
30 Toitoine rokẽ kurãkõkara kurãkãko ropa mã toto. Toitoine rokẽ roropa imehnõ omiryae oturũko mã toto. Toitoine rokẽ roropa mokaro nurutopõpyry imehnõ omiryae ekarõko ropa mã toto kuomirykõae.
31 Naeroro Ritonõpo nekarory kurã poko openetatoko.
Yrome tyorõ poko ourutorỹko ase seromaroro. Sero kure kuhse mana.