9
Tozuhse Jo a
(Jo 9—10)
Ritonõpo onezuhsaromepyra ahno mana
1 Mame tozuhse Jo a; ynara tykase ynororo:
2 “Moro waro ase, yrome otãto zae jehtoh enetupuhpõko ha Ritonõpo a?
3 Ritonõpo onezuhsaromepyra ahno mana.
Ekaropotoh miu motye ekaropõko mana, onezuhsaromepyra kymarokomo.
4 Tuarohxo Exiketyme mã ynororo, Jamihmehxo Exiketyme roropa.
Atatapoiry se ahno ahtao imaro, onyporemãkasaromepyra mana.
5 Tokare pyra ypy tõ syryhmãko mana esarykõ poe,
zehno tahtao toto enahkapõko mana.
6 Nono tykytyky kamexipõko mana,
tykytyky ãko nono mana.
Sero nono apõ kywyh kywyh kamexipõko mana.
7 ‘Xixi tũtara exiko,’ ãko mana.
Mame saerehkara mana.
Xirikuato tõ ezehkãko roropa mana zemime pyra aehtohme koko.
8 Takorehmane maro pyra kapu tyrise Ritonõpo a.
Toiroro pohkane poro ytoytõko mana tuna konõto kuao.
9 Xirikuato tõ tyrise eya kapu ao oximõme:
Uusa Zumohxo, Oseruao Maria tomo, 7me xirikuato tõ puripurikaneme, xirikuato tõ roropa ikurenaka.
10 Onenetupuhsaromepyra sytatose emero Ritonõpo nyrityã kurano.
Inyrityã poko osenuruhkãko sytatose.
Inyrityã tyjamitunuru ke enahpỹme mana,
ikuhpỹme roropa mana.
11 Upũtokoxi Ritonõpo ytoryhtao onenepyra ase.
Ytoytõko mana yrome inyriry osenepyra mana ya.
12 Okyryry arory se Ritonõpo ahtao, anaropopyra ehsaromepyra mase.
Onoky ekaropõko eya: ‘Oty poko mah?’
13 Zehno toehse Ritonõpo ahtao eramara ropa mana;
epetõkara, ihpory Raape akorehmananõ epukãko mã toto ipupuru myhtokoxi.
Zae ase, ajohpe pyra
14 “Naeroro ime pyra ase ipunaka,
otãto Ritonõpo ezuhnõko ha?
Otoko omi enẽko hano osezuhtohme imaro?
15 Zae rokẽ jahtao ro onezuhpyra jexiry.
Japiakaneme mana;
‘Ajohpãme samo, ypyno exiko,’
ãko rokẽ ase.
16 Otarame Ritonõpo kohmaryhtao ya apiakatoh taka ytotohme,
mame toytose ynororo ahtao, ynara enetupuhnõko ase:
jomiry onetara Ritonõpo exiry mana.
17 Tyryrykane konõto ke jetapãko Ritonõpo mana,
popyra ehtoh poko pyra jahtao ro
jutuarimãko mana itamurumehxo.
18 Joseremanohpopyra mana.
Sam kakehpyra ase isene ro jahtao.
19 Jamihme ehtoh kuhnõko ha?
Jamihme Exiketyme mana.
Ikohmaryhtao apiakane ẽpataka,
onoky Ritonõpo enehpõko nae apiakane ẽpataka?
20 Zae ase ajohpe pyra,
yrome jomiry jyhxirõko mana,
popyra jekarõko mana.
21 Zae ase, yrome moro poko oty kara ase;
typenekehse ywy isene jehtoh poko.
22 Ya, emero rokẽ oxisã mana;
morara exiryke ynara ãko ywy:
kurãkõ enahkãko Ritonõpo mana popyra exiketõ samo.
23 Popyra ehtoh toehse ahtao axiny,
ahno kurã orihmapose,
Ritonõpo exianãko mana.
24 Sero nono tokarose Ritonõpo a popyra exiketomo a,
apiakane tõ enuru tapuruse eya
zae ehtoh onenetupuhpyra toto ehtohme.
Moro onyripyra Ritonõpo ahtao onoky a morohne tyrise?
Zae jekaropyra Ritonõpo mana
25 “Ẽmepyry tõ ytõko mana axihxo,
tururume ytokety motye epãko mã kehko
tãkye ehtoh onenepyra ro ahtao.
26 Isene jehtoh enahnõko mana,
kanawa axihxo exikety ytory samo,
piano yhtory samo onokyro apoise.
27 Ikuhnõko ase.
Wenikehnõko ase mokyro kerekeremary ya.
Tãkye pyra jehtoh rumekãko ase, tãkye jehtohme ropa.
28 Yrome jetuarimatoh tonõ jenẽko mana,
ynara zuaro jexiryke:
zae pyra jekarõko Ritonõpo mana.
29 Iirypyryme Ritonõpo jekaroryhtao toiparo rokẽ erohnõko ase ekurãkatohme.
30 Sahpau jakorehmara yyrypyry kurikary poko.
Sahpau jamihmehxo exikety ynyrihpyry xihpyry onukurikasaromepyra mana.
31 Ritonõpo jẽmãko mana eutary aka, ikurepato htaka.
Jupõ yse pyra sã mana, nuriame jexiryke.
32 Ysã pyra Ritonõpo mana, ahnome pyra.
Morara exiryke eya onezuhsaromepyra ase,
ytosaromepyra ynanase apiakane ẽpataka atae pyra yna ehtoh zurupotohme.
33 Yna a asakoro, apiakane pyra mana,
yna atae pyra ehtoh apiakatohme:
ywy, Ritonõpo maro, atae yna ripotohme.
34 Ritonõpo, juãnohpyra exiko!
Ouno pyra kyriko, enaromyra jehtohme.
35 Morarame oturũko ase oya,
enaromyra ase zae jehtoh ukurohtao waro ase.