5
Tepora eremiatopõpyry Parake maro
1 Moro ẽmepyry ae Tepora toremiase Parake maro, Apinoão mũkuru maro. Ynara toremiase toto:
2 Ritonõpo eahmatoko,
Kuesẽkõ Imehxo Exikety!
Tõximõse Izyraeu tomo etonatohme,
tãkye rokẽ tõximõse toto.
3 Etatoko, tuisa tomo!
Otato ehtoko kowenatu tomo!
Rue etõko ase, eremiãko roropa ase,
Ritonõpo, Izyraeu tõ Esẽ eahmaryme.
4 Ritonõpo Imehxo Exikety ypy Seia poe tutũtase awahtao,
tooehse awahtao roropa Etõ nonory poe, nono tykytyky tykase.
Konopo itamurume tooehse kapu ae.
5 Ypy tõ tykytyky tykase Ritonõpo ẽpataka,
tykytyky tykase ypy Xinai roropa,
Ritonõpo Izyraeu tõ Esẽ ẽpataka.
6 Isene ro Sãkaa ahtao, Anate mũkuru,
isene ro Jaeu ahtao,
Ytoytoketõ pyra kynexine osema tao,
imehnõ esemary ae rokẽ toytose ahno.
7 Izyraeu patary tõ po, ahno pyra kynexine;
Typõke pyra toehse, joehtopõpyry pona,
omoro roropa Tepora,
ahno ẽme Izyraeu tõ nonory po.
8 Imehnõ neponãmarykõ tymenekase Izyraeu tomo a,
naeroro etonatoh toehse esarykõ po.
40 miume orutua kõ ahtao ro,
tywaratake pyra toh kynexine,
osewomatoh pyra ipunaka!
9 Soutatu tõ tuisary tõ eahmãko ase,
Izyraeu tõ tuisary tomo,
ahno maro, tãkye osekaroketomo.
Ritonõpo eahmatoko, Kuesẽkomo!
10 Moro poko ekãtotoko,
jumẽtu karimutumã po ytoketomo,
typorohse exiketõ, oeky tõ mypary po,
pupu po ytoytoketõ roropa.
11 Etatoko ke! Imoihmãkõ, panaikato exiketõ,
tuna pẽkamã tõ zomye exiketõ,
oturũko mã toto orẽpyra Ritonõpo nyrityã poko,
topetõkara poremãkatopõpyry poko Izyraeu tomo a!
Mame Ritonõpo poetory tõ tyhtose typatarykõ pona.
12 Owõko, Tepora, owõko!
Owõko! Eremiako! Owõko!
Ytoytoko, Parake, Apinoão mũkuru,
oepekõkara aroko anamoto tõme, anapoihpyrykomo.
13 Mame toytose toto,
enetuputyhpõkomo tutuisarykõ esaka,
Ritonõpo Kuesẽkõ poetory tomo,
tõsetapatohkõ eraximaryme,
mame toytose toto oseporyse Parake maro.
14 Eparaĩ poe tutũtase toto, Amareke tõ nonohpyry poe,
toytose toto jakanahmã pona.
Pẽjamĩ tõ mykapo, imoihmãkõ maro.
Makia poe tuisa tõ tyhtose,
Zepurõ poe roropa soutatu tuisary tõ tooehse.
15 Isakaa tõ tamuximãkõ Tepora maro toytose.
Aõ, Isakaa tõ toytose, Parake roropa.
Tokahmase ynororo eya xine jakanahmã pona.
Yrome Rupẽ tõ atae pyra toh kynexine;
tõsezusezuhse toto,
mame ytopyra tokurehse toto.
16 Oty katohme tehme se rokẽ toehse toh nae moroto kaneru tõ maro?
Kaneru erase omiry etatohme, toky tõ kohmary poko?
Ỹ Rupẽ tõ atae pyra toh kynexine;
tõsezusezuhse toto,
mame ytopyra tokurehse toto.
17 Kate tõ tehme toehse toh kynexine
tuna Joatão poe xixi tũtatoh wino,
Tã tõ roropa ona po tokykõ nahpatoh po.
Asea tõ totypohse roropa tuna konõto ehpio,
isawã po, tuna ehpio tehme toehse toh kynexine.
18 Yrome Zepurõ tõ toorikyrykõ zuno pyra toh kynexine, Napatari tõ maro;
toytose toto etonatoh pona.
19 Tuisa tõ toehse, tõsetapase toto Taanake po, iporiry Mekito pũto.
Kanaã tuisary tõ roropa tõsetapase,
yrome parata anapoipyra tokurehse toto, topetõkara wino.
20 Xirikuato tõ roropa tõsetapase:
aytorykohtao kapu kuroko
Xisera takorekehkase eya xine.
21 Zue a epetõkara tarose, tuna Kisõ, zueme exikety a.
Moino ro mase tuna Kisõ.
Ytoytõko ase, orẽpyra exiketyme ytoytõko ase.
22 Mame kawaru tõ tooehse, tururume.
Tururume ytõko, nono tũtũmãko, tupupurukõ ke.
23 “Pata Meroze popyra tyripoko,” ãko Ritonõpo nenyokyhpyry;
“Popyra tyripoko, moro pata põkõ popyra tyripoko,
oehpyra toto exiryke Ritonõpo akorehmase,
soutatume oehpyra tokurehse toto
osetapase Ritonõpo poetoryme.”
24 Tãkye kuhse mokyro nohpo, Jaeu,
Hepea pyty, keneume exikety.
Imehnõ nohpo tõ tytapyĩ taõkõ motye,
tãkyehxo mã ynororo.
25 Tuna tokaropose Xisera a,
yrome pui suhsuru tokarose eya;
isuhsuru risẽ tonehse eya kasana kurã ao.
26 Mame wewe suimano tapoise eya tomary ke,
morararo mate tapoise roropa tomary akorõ ke.
Mame Jaeu a totapase Xisera zupuhpyry pokona,
takurihmose,
typosohkase roropa, zupuhpyry.
27 Toepukase ynororo tosekumuru po, ipupuru myhtokoxi.
Imihme toepukase nohpo myhtokoxi.
Imyhtokoxi, tosekumuru po toepukase;
nono pona, toorihse.
28 Xisera eny tõsenuhmase,
osenuhmatoh ae, tytapyĩ tae,
Okynahxo tõsenuhmase, kamisa moino,
osenuhmatoh ae, ynara tykase:
“Oty katoh okynahxo oehpyra hnae ikanary?”
“Oty katoh eky tõ kawaru, axĩ pyra oehnõko nae?”
29 Epe tõ, tuaro exiketomo a tozuhse,
Tyya rokẽ morohne tozuhzomose ropa,
tyya rokẽ tõsezuhse ynororo.
30 “Otarame mõkomo apiakãko mã toto,
tynapoityã apiakãko:
Otarame nohpo tõ roropa tapoise,
toiro otarame asakoro soutatu tõ punero.
Upo kurã roropa tapoise Xisera a tupõme.
Kamisa kure exikety tapoise eya tuisa pyty a ekarotohme.
Ipymyry pokona tyritohme.”
31 Ritonõpo yna Esemy,
morararo oepetõkara norihno toto, emero porehme,
yrome ah oepe tõ saereme exikety sã orẽpyra sã nexĩ toto, xixi tũtary samo!
Mame etonara toehse toh kynexine 40me jeimamyry pune.