8
Mitianita tõ poremãkatopõpyry
1 Mame Eparaĩ tõ orutua kõ tõturupose Kiteão a, ynara tykase toto:
— Oty katohme yna onykohmara mexiase mitianita tõ maro etonatohme toytose awahtao? Oty katohme moro sã toehse omoro?
Opore tõsezusezuhse toto Kiteão maro.
2 Yrome ynara tykase ynororo:
— Ynyrihpyry kuepekõkara maro pitiko rokẽ nexiase. Onyrihpyrykõ itamurumehxo, ynyrihpyry motye kuhse. Onyrihpyrykõ, Eparaĩ tomo, pitiko nase oya xine repe, yrome Apieze ekyry tõ nyrihpyry emero motye nase.
3 Mitianita tõ tuisary Orepe, Zeepe maro tokarose oemahpokoxi xine Ritonõpo a. Otara tyrise ya? Ynyrihpyry moro sã pyra mana, tykase.
Morara tykase Kiteão ahtao zehno hkopyra toehse Eparaĩ tomo.
4 Morarame Kiteão tõ toytose 300mãkõ maro tuna Joatão pona. Tãtakuohse toto. Totaehse toh kynexine repe. Yrome topetõkara ekahmãko ro toh kynexine.
5 Mame tonahsẽ tokaropose Kiteão a Sukote põkomo a. Ynara tykase ynororo:
— Mitianita tõ ekahmãko ro ynanase: Zepa, Saumuna, enara. Mokaro ymaro exiketõ totaehse mã toto. Ajohpame sã tonahsã ekarotoko eya xine.
6 Yrome tozuhse ynororo Sukote tamuximãkomo a:
— Otyme kure tonahsẽ ekarory yna a opoetory soutatu tomo a? Zepa tõ Saumuna maro anapoipyra ro matose!
7 Ynara tykase Kiteão eya xine:
— Ỹ, kure, oty kara. Yrome Zepa tõ, Saumuna maro tokarose ahtao Ritonõpo a ya opũ ixihkãko ase omoxino ke, ona po exiketõ ke.
8 Mame Penueu pona toytose Kiteão, tonahsẽ tokaropose orutua komo a, morotõkomo a repe. Yrome onekaropyra, Sukote põkõ omihpyry saaro tozuhse ynororo eya xine.
9 Naeroro ynara tykase Kiteão eya xine:
— Tooehse ropa jahtao, kure rokẽ jahtao sero tapyi kae exikety kararahnõko ase! tykase.
10 Karakoa po Zepa tõ kynexine Saumuna maro tysoutatu tõ akoĩpyry maro. 15 miume rokẽ tõxinamase ona tonorẽ põkõ soutatu tomo. 120 miume totapase.
11 Tokare pyra Kiteão tõ toytose osema ae, ona ehpikuroko, Nopa poe xixi tũtatoh wino, Jokopea poe roropa. Tuaro pyra topekõkara ahtao totonase toto imaro xine.
12 Zepa tõ toepase repe, Saumuna maro, mitianita tõ tuisary tomo. Yrome tokahmase toto eya xine, tapoise toto. Soutatu tõ porehme typoremãkase eya xine.
13 Mame toytose ropa Kiteão, Joaxi mũkuru, osetapakehxĩpo onuhtoh Here esemary ae.
14 Nuase tapoise eya Sukote pono, oturupotohme eya. 77me esetykõ tymerose eya Sukote tuisa tomo tuisamãkõ maro.
15 Mame Sukote tõ orutua kõ zuruse toytose Kiteão. Ynara tykase ynororo:
— Tuaro ro hmatou jyhtomary se oehtopõpyry poko oya xine? Tonahsẽ onekaropyra mexiatose, ysoutatu tomo a totaehse toto ahtao ro, Zepa tõ Saumuna maro anapoipyra ro jexiryke. Ỹ, kure, taro moxiamo!
16 Mame omoxino ke Sukote tuisary tõ tuisamãkõ maro tuãnohse eya.
17 Tapyi kae exikety Penueu po tykararahse roropa eya. Orutua kõ moro pata põkõ totapase roropa eya.
18 Mame tõturupose Zepa tomo a Saumuna maro:
— Onoky sã nexiase toto, mokaro orutua komo, totapase oya xine Tapoa po?
Tozuhse eya xine:
— Asã toh nexiase ipunaka. Tuisa mũkuru tõ sã toh nexiase.
19 Ynara tykase Kiteão:
— Jakorõ tõ nexiase toto, aja mũkuru tomo. Ynara ãko ase oya xine Ritonõpo netaryme, typynanohse toto oya xine ahtao, ywy roropa oetapara xine exiry, opynanohtorỹko ase.
20 Tumũkuru apitorymã Jetea a, ynara tykase ynororo:
— Aimo owõko, moxiã etapako. Yrome tytapemã anoupyra imũkuru kynexine, enaromỹke toexiryke, wãtara ro toexiryke.
21 Mame Zepa tõ Saumuna maro ynara tykase Kiteão a:
— Osehko ty, yna etapako omoro orẽpyra oexiryke.
Naeroro Zepa tõ Saumuna maro totapase Kiteão a. Ikyryrỹpyry tõ typyne exiketõ tapoise eya, nuno panõ kõ kuhsamo, kameru tõ esenao exiketõ tapoise.
22 Mame ynara tykase Izyraeu tõ Kiteão a:
— Yna tuisaryme exiko typynanohse yna exiryke oya mitianita tõ winoino. Imeĩpo omũkuru omyakãme tuisame exĩko, apary roropa tuisame exĩko.
23 — Otuisarykõme exipyra ase, umũkuru roropa tuisame exipyra mana. Ritonõpo Kuesẽkõ otuisarykõme exĩko mana, tykase Kiteão.
24 Tõturuse ro eya xine:
— Toiro se rokẽ ase oya xine, panasere tomo, uuru risẽ anapoityã enehtoko ya, tykase.
Mokaro mitianita tõ typanarykõ pokona panasere tyrise uuru risemy, ona tonorẽ põkõme toto exiryke.
25 Ynara tykase Kiteão soutatu tomo a:
— Tãkye ynanase morohne ekarory poko oya.
Kamisa tyrise eya xine nono pona, epona panasere tõ ritohme, mame typanaserenỹpyrykomo tonehse eya xine, tynapoityãkomo mitianita tõ winoino.
26 Atapona uuru omoxĩ exiry 20 kirume exisasaka kynexine. Morohne maro: osenao tõkehko, uuru risẽ emeporyme, upo tõ roropa, tuisa tõ zuponỹpyry te, kameru tõ pymyry kyryry emeporyme, tapoise roropa eya.
27 Moro uuru ke oturukety zupõ panõ tyrise Kiteão a. Moro tyrise eya typatary, Opara po. Mame Izyraeu tomo a Ritonõpo eahmary turumekase morotona toto ytotohme, Kiteão nyrihpyry eahmatohme tyya xine. Morara exiryke Izyraeu tõ typoremãse Kiteão maro ro emero, inyrihpyry eahmaryke eya xine.
28 Mitianita tõ typoremãkase Izyraeu tomo a. Mame okynahxo oehpyra ropa toehse toto osetapase imaro xine. 40me jeimamyry, isene ro Kiteão ahtao, etonara Izyraeu tõ toehse.
Kiteão orihtopõpyry
29 Mame toytose ropa Kiteão tytapyĩ taka ropa.
30 Tumũkue ynororo 70me, typye tuhke toexiryke.
31 Toiro pytyme exikety nae roropa kynexine Xikẽ po, toemũkuase ynororo Apimerekeme.
32 Mame toorihse Kiteão, Joaxi mũkuru, tamuhpõme toehse ahtao. Ekepyry tonẽse Jumy Joaxi zonẽtopõpyry aka, Opara po, Apieze ekyry tõ esary po.
33 Toorihse Kiteão ahtao Ritonõpo turumekase Izyraeu tomo a. Kanaã põkõ neponãmary toahmase eya xine. Paau-Perite tapoise eya xine eahmatohme Ritonõpo myakãme.
34 Axĩ tosẽkõ Ritonõpo omipona pyra toehse toto, topekõkara winoino typynanohtopõpyrykõ poko tuenikehse ropa toto.
35 “Kure mase” kara roropa toh kynexine Kiteão tomo a. Tuenikehse toto emero Kiteão nyrihpyry poko kure Izyraeu tõ ritopõpyry poko eya.