12
Jeremia oturupotoh Ritonõpo a
1 — Ritonõpo Jesemy, kure jehtoh poko osezukuruhtao ya, zae rokẽ oehtoh enepõko mase ya. Yrome oya ekaropory se ase zae ehtoh poko: Oty katohme popyra exiketõ tytineruke exĩko nae? Oty katoh ajohpe exiketõ orẽpyra toh nae tynyrirykõ poko?
2 Otyro sã toto arykãko mase, imity jamihme exĩko; ahtãko mã toto, eperytãko. Oturukehpyra mã toto kure oehtoh poko, yrome ajohpe pyra: oty kara mã toto azamaro ehtoh poko.
3 Yrome omoro, Ritonõpo juaro mase; ynyriry enẽko mase, ose jehtoh waro mase. Ritonõpo, mokaro itywyhmako kaneru samo etapatoh taka; toto apiakako ikurãkatohme toto etapatoh pona.
4 Otãto jeimamyry ise ro tonore rokẽ sero yna nonory exĩko nae? Otãto ise ro onahpoty zaremãnõko ona po emero? Onokyro tõ orihnõko mã toto torõ tõ roropa, popyra sero nono põkõ exiryke, ynara karyke eya xine: “Onenepyra Ritonõpo mana, kynyrirykõ onenepyra mana.”
5 Ynara tykase Ritonõpo:
— Jeremia, tapotũkehse awahtao tururume oytory poko orutua kõ motyẽkary poko, otara exĩko mah tururume oytoryhtao kawaru tõ maro? Tupime oya ahtao owomyry jarao osetapara ahtao, otara tyrĩko mah apotũkehpyra oehtohme itu htao tuna Joatão ehpio?
6 Oekyry tõ ro, atapyĩ taõkõ oewokaneme toehse mã toto. Oepetõkara maro okerekeremãko mã toto. Osenekunohpopyra exiko eya xine, kure rokẽ aotururukohtao ro amaro osepeme sã repe.
Ritonõpo emynyhmary typoetory tõ poko
7 Ynara ãko Ritonõpo:
“Ypoetory tõ Izyraeu turumekase ya;
ynymenekatyã se pyra toehse ywy.
Mokaro pyno jexityã ekaroase epetõkara a.
8 Ypoetory tõ, ynymenekatyã yzehno toehse mã toto;
reão samo itu htao aryry tykase toto jerehtohme,
naeroro toto se pyra ase ipunaka.
9 Ypoetory tõ torõ sã mã toto tapuruse ahtao piano tomo a etonatohme.
Onokyro tõ enehpoko otuhtoh konõto pona!
10 Tuhke rokẽ kowenatu tõ a imehnõ nonory poe ynarykahpyry uwa zoko tõ tonahkase,
utupi tõ tytũtũmase toto,
ynonory tõ kurã patãpome tyrise eya xine.
11 Ynonory kurã tonahkase eya xine,
turumekase mana yneneryme,
patãpome toehse, ona tonorẽ samo.
Yrome ‘otara’ kara mã toto.
12 Somohmã poro imoihmãkõ oehnõko mana imehnõ enahkatohme.
Ywy Ritonõpo etonatoh enehpoase sero nono enahkatohme;
ahno osepeme ehsaromepyra mã toto.
13 Tiriiku puhturu tarykase ypoetory tomo a, omoxino rokẽ tapoise eya xine;
toerohse toto itamurume repe,
yrome epehpyry anapoipyra tokurehse toto.
Toto zehno yronymyryme jexiryke tonahsẽ anapoipyrahme sã toehse mã toto.”
Imehnõ nonory põkõ Izyraeu tõ pũto
14 Ynara ãko Ritonõpo mana:
— Seromaroro oturũko ase popyra exiketõ poko Izyraeu tõ zomye, moro nono popyra tyrise eya xine, ynekarohpyry ypoetory tomo a. Mya mokaro arõko ase inonorykõ poe, otyro samo touse ahtao. Juta tõ roropa pynanohnõko ase mokaro winoino.
15 Yrome, imeĩpo tarose toto ahtao mya, toto pyno exĩko ropa ase. Toto enehnõko ropa ase inonorykõ pona ropa.
16 Mame mokaro emero amorepapory se ase jenetupuhtohme ypoetory tõ samo juaro toto ehtohme, ypoko ynara katohme: “Ritonõpo Isene Exikety kuakorehmatorỹko mana,” katohme eya xine ypoetory tõ tamorepase sã eya xine Paau poko. Moro sã toto ahtao ypoetoryme exĩko mã toto. Kure rokẽ toto rĩko ase.
17 Yrome jomihpyry omipona se pyra exiketõ oũko ropa ase porehme otyro samo imity tõ maro toto enahkatohme. Ywy, Ritonõpo, oturuno.