14
Tonorẽ konõto
1 Ynara tykase Ritonõpo ya tonore konõto poko:
2 “Juta tõ ihnamõko mana, xitãko.
Ipatarykõ orihnõko mã kehko,
ahno tapotũkehse mã toto,
imihme nono pona, ihnamoryme,
Jerusarẽ põkõ takorehmanekõ kohmãko mã toto.
3 Typoetory tõ aropõko tytineruke exiketõ mana tuna enehse repe.
Pẽkamã tõ pona ytõko mã toto,
yrome tuna onenepyra ekurehnõko mã toto.
Oehnõko ropa mã toto ẽ tõ maro, tuna maro pyra ipunaka.
Ehxirõko mã toto, otupĩko,
tupuhpyrykõ zõtõko mã toto ihnamoryme.
4 Tupito poko erohketõ roropa tupuhpyrykõ zõtõko mã toto ihnamoryme,
torẽtyke mã toto yronymyryme, konopo oehpyra exiryke, nono tonore exiryke roropa.
5 Ona po kapau tõ typoenõ nomõko mã toto onahpoty pyra exiryke.
6 Jumẽtu tõ tosẽke pyra exiketõ etypohnõko mã toto somohmã emory po.
Oserematoh pyra exiryke erohnõko mã toto oserematohme kaikuxi tõ samo.
Popyrahme sã osenuhmãko mã toto onahpoty pyra exiryke.”
7 Ypoetory tõ ynara ãko mã toto:
“Ritonõpo, yna Esemy, yna hxirõko yna rypyry tõ mana,
yrome: ‘yna akorehmako õmihpyry ae ro yna a.’
Tuhke rokẽ kurumekatose,
yna rypyry poko toehse yna oneneryme.
8 Omoro rokẽ mase Izyraeu tõ pynanohneme,
yna pynanohnõko mase popyra ehtoh toehse ahtao yna pona.
Oty katohme katonõme sã rokẽ mahno Izyraeu tõ nonory po, imehnõ nonory põ samo?
Oty katoh ytokety sã mahno toiro rokẽ ẽmehnõko yna esary po?
9 Oty katohme osenuruhkãko sã mahno, soutatu samo tapotũkehse ahtao imehnõ onewomasaromepyra ynororo ahtao?
Yrome omoro Ritonõpo yna maro mase, opoetoryme ynanase.
Yna onurumekara exiko!”
10 Ynara tykase Ritonõpo sero põkõ poko:
— Toytorykõ se rokẽ mã toto typenetatohkõ poko, zae ehtoh poko se pyra mã toto. Morara exiryke yzamaro pyra mã toto, tãkye pyra ase ipoko xine. Wenikehpyra exĩko ase popyra toto ehtopõpyry poko, toto wãnohnõko ase iirypyrykõ emetakame.
11 Mame ynara tykase Ritonõpo ya:
— Mokaro anakorehmapopyra exiko ya.
12 Otuhpyra toto ahtao ro tõtururukõme ya aomirykõ onetara exĩko ase. Okyno tõ etaparyhtao eya xine tynekaroryme ya tiriiku tõkehko maro, morohne se pyra exĩko ase. Osepeme exipyra ekurehnõko ase, yrome mokaro enahkãko ase etonatoh ke te, omise konõto ehtoh ke te, tyrohsẽ ke, enara.
13 Mame ynara tykase ywy:
— Ritonõpo, Jesemy, tuaro mase: urutõ kõ nae ynara ãko ahno a: “Etonatoh exipyra mana, omise konõto ehtoh exipyra roropa mana. Õmihpyry omi poe, osepeme ehtoh exĩko mana sero nono po,” ãko mã toto.
14 Yrome ynara tykase Ritonõpo:
— Mokaro urutõ kõ ajohpe oturũko mã toto jomi poe samo. Toto anaropopyra exiase: “Ynara kahtoko,” kara exiase eya xine. Oturupyra exiase imaro xine ipunaka. Toto nenepohpyrykõ ajohpe rokẽ mana. “Ynara exĩko mã,” karyhtao eya xine, typoe xine rokẽ morara ãko mã toto; typahsẽme rokẽ aomirykõ mana; oturũko mã toto onekunohto ehtohme rokene.
15 Ywy, Ritonõpo ynara ãko ase oya: ynara tyrĩko ase mokaro urutõ komo a, jomi poe pyra aehtyamo a, yrome tõturuse toto jomi poe sã repe, ynara ãko toto: “Etonatoh exipyra mana te, omise konõto ehtoh oehpyra mana sero nono po.” Mokaro etapãko ase etonatoh tao te, omise konõto ehtoh ke, enara.
16 Mame mokaro, ajohpe urutõ kõ omiry etahpõkõ orihnõko roropa mã toto etonatoh tao te, omise konõto ehtoh ke, enara. Mokaro ekepyry tõ tomasẽme exĩko osema tao Jerusarẽ po; ahno pyra exĩko mã moroto mokaro ekepyry tõ zonẽtohme, ipyxiãkõ maro, imũkuru tõ maro, ẽxiry tõ maro. Moro popyra ehtoh ekarõko ase eya xine iirypyrykõ emetakã epehmatohme.
17 Mame tonyohse ywy Ritonõpo a jemynyhmary ekarotohme ahno a. Ynara ase:
“Saereme, koko roropa jenuru tõ poe yxity kuãnõko mana.
Yxitakepyry se pyra ase, itamurume wekyry tõ tyyryhmase exiryke,
tyhtomase mã toto yronymyryme.
18 Ona pona jytoryhtao, ahno ekepyry tõ enẽko ase,
orutua komo totapase aexityamo etonatoh tao;
pata tõ taka jytoryhtao ahno enẽko ase orihnõko omise konõto toexirykõke.
Erohnõko ro urutõ komo te, oturuketõ roropa,
yrome tynyrirykõ waro pyra mã toto.”
Tyyrypyrykõ ekarõko Ritonõpo a
19 “Ritonõpo, yna Esemy, Juta tõ turumekase oya yronymyryme?
Xião põkõ se pyra mexino ipunaka?
Oty katohme yna tyhtomase oya itamurumehxo, ekurãkasaromepyra yna ehtohme?
Osepeme kuehtohkõ eraximãko ynanexiase repe.
Yrome kure ehtoh oehpyra tokurehse;
ekurãkãko sytatose tõsenetupuhse yna repe.
Yrome erehtoh rokẽ toehse.
20 Ritonõpo iirypyryme toehse ynanase oneneryme:
yna rypyry ekarõko ynanase oya, yna tamuru tõ rypyhpyry roropa.
21 Õmihpyry poko wenikehpyra exiko,
typahsẽme rokẽ yna onekaropyra exiko,
Jerusarẽ onyporemãkapopyra exiko, onymenekahpyry Tuisa Konõtome oehtoh apõ esaryme exiryke.
Omihpyry onetapohpyry yna a omipona exikehpyra exiko.
22 Imehnõ nonory põkõ neponãmarykõ emero konopo onenehposaromepyra mã toto;
tamoreme kapu tuna onemasaromepyra mana nono pona.
Oeraximãko ynanase Ritonõpo yna Esemy, omoro rokẽ morohne riry waro oexiryke.”