20
Jeremia maro oturukety Pasua
1 Mame Pasua, Imea mũkuru oturuketyme nexiase, erohketõ tuisaryme Ritonõpo tapyĩ tao. Jotururu totase eya morohne poko,
2 naeroro typipohpose ywy eya, tymyhse roropa exiase keti ke ãpuruhpyry tao Omõtoh Pẽjamĩ pũto Ritonõpo tapyĩ tao.
3 Yrokokoro tymyhpokase ropa jahtao Pasua a ynara ase eya:
— Ritonõpo a oesety tymyakãmase, Pasuame pyra mana; “Iiryhmane emero rokẽ po!” me mana.
4 Ritonõpo ro ynara tykase: “Pasua, iiryhmaneme orĩko ase oya ro; oepe tomo a roropa. Toto etapary enẽko mase emero porehme epetõkara a. Juta tõ emero ekarõko ase Papironia tuisary a ipoetoryme toto ehtohme; zokonaka arõko mana tynamotome tynonory pona, imehnõ etapãko mana.
5 Sero pata mõkomory kurã aropõko ase emero, oepetõkara a Papironia pona. Juta tõ tuisary tõ kyryry kurã maro, emero arõko mã toto Papironia pona.
6 Omoro, Pasua, oekyry tõ maro emero tapoisẽme exĩko matose. Tarosẽme exĩko matose Papironia pona. Moroto orihnõko mase, tonẽsẽme exĩko mase oepe tõ maro emero, eya xine ajohpe ehtoh mekaroase tuhke rahkene.”
Ritonõpo kerekeremãko Jeremia
7 Ritonõpo, kuenekunopyase,
tonekunohse exiase rahkene.
Jamihme mase ymotye,
typoremãkase ywy oya.
Jeunohnõko mã toto emero porehme,
ypoihtory poko kohmãnõko mã toto.
8 Tahxime jotururuhtao kohtanohpõko mase ya,
“Oryhmatorỹko! Oenahkatorỹko!”
Ritonõpo, ypoihtõko mã toto, jeunohkehpyra mã toto õmiry ekaroryke ya.
9 Yrome ynara karyhtao ya:
“Wenikehnõko ase Ritonõpo poko, oturupyra ase exĩko aomiryme,”
õmiry tapurusẽme exĩko ukurohtao mana,
apoto sã mana tukase mya ukurohtao.
Etaehnõko ase ikurãkary poko tũtara ehtohme repe,
yrome mynyhme ehsaromepyra ase.
10 Imoihmãkõ omiry etãko ase puti puti ãko:
“Emero rokẽ po erehtoh nae, enahkatopo!
Eropa, Jeremia sekarotone tuisa tomo a!” ãko.
Jepe tõ roropa josetapary eraximãko. Ynara ãko:
“Otarame ahno apoitoh taka omõnõko mana;
mame apoĩko sytatose, emỹpõko sytatose,” ãko.
11 Yrome omoro, Ritonõpo, ymaro mase, jamihme mase, orẽpyra exiketymano.
Yyryhmary se exiketõ osetapãko mã toto,
torẽsẽme exĩko mã toto.
Ehxirõko mã toto typoremãse toexirykõke
jũme otupikehpyra exĩko mã toto,
moro poko wenikehpyra exĩko imehnõ mana.
12 Yrome, Ritonõpo Jamihmehxo Exikety, zae rokẽ yna kuhnõko mase.
Yna osenetupuhtoh enẽko mase, yna kurohtao roropa.
Ajohpãme sã jepetõkara wãnopyry enery se ase,
osekaroase oya jexiryke.
13 Eremiatoko Ritonõpo netaryme!
Kuesẽkõ eahmatoko, tymõkomokãkara, typynanohse eya oexirykõke popyra exiketõ jamitunuru winoino.
14 Popyra moro ẽmepyry tyripoko jenurutopõpyry!
Owenikehtoko moro ẽmepyry poko, aja a tonuruse jehtopõpyry!
15 Popyra mokyro tyripoko papa zuruhpono atãkyemapory se exikety moro omi ekaroryke eya:
“Orutuame mana! Tumũkue mase!”
16 Mokyro ripory se ase moro pata tõ samo,
Ritonõpo a tonahkase aexityã sã ipunaka.
Ah pusuhkatoh netano ẽmepyryhtao, sam katopo,
ah kui kui katoh netano osetapary poko tãxiahtao,
17 jetapara tokurehse aexiryke enurupyra ro jahtao!
Ahtao aja wakuru ao jekepyry zonẽtoh toehse exiry,
ywy enurupyra exiry.
18 Oty katoh jenuruase?
Otarame tãkye pyra jehtohme rokene, jetũ roropa jehtohme, orihtohme roropa yporemãkatopõpyry ke.