22
Ritonõpo omiry Juta tõ tuisary ekyry tomo a
1-2 Mame Ritonõpo a tonyohse exiase Juta tõ tuisary tapyĩ taka, Tawi parỹpyryme nexiase ynororo, oturuse eya tamuximãkõ maro, Jerusarẽ põkõ maro aomiry etatohme eya xine, ynara tykase ynororo:
3 — Ywy Ritonõpo ynara ãko ase oya xine: zae ehtoh tyritoko, ajohpe pyra ehtoko. Tyyryhmase exiketõ ewomatoko iiryhmananõ wino. Imehnõ nonory poe exiketõ onyryhmara ehtoko, toto onenekunohpyra ehtoko, poetõpo tomo te, pytỹpo tõ roropa; ahno zae exiketõ onetapara ehtoko sero pata kurã po.
4 Sero jomiry omipona awahtao xine otuisarykõme Tawi pary tõ exikehpyra exĩko mã toto. Oehkehpyra mã toto sero tapyi konõto omõtoh ae, typorohse kahu tõ ao te, kawaru tõ po roropa, takorehmananõ maro, typoetory tõ maro.
5 Yrome jomiry omipona pyra awahtao xine, ywy roro ynara etapõko ase oya xine, sero tapyi konõto tykararahsẽme exĩko, topu tõ kaetokohxo exĩko mana. Ywy Ritonõpo oturũko ase.
6 — Sero tapyi, Juta tõ tuisary tapyĩ konõto enekure mana Kireate nonory samo, ypy tõ Ripano sã roropa, yrome ona tonorẽ sã moro rĩko ase, patãpome tyrĩko ase roropa.
7 Orutua kõ enehpõko ase sero enahkatohme. Wywy tõ enehnõko mã toto, tapyi manatyry kurã, apupari xikihme exiketõ akohnõko mã toto apoto htaka ematohme.
8 — Moromeĩpo imehnõ nonory põkõ tuhke moro kuroko ytõko mã toto, ekaropõko mã toto oseya rokene, oty katohme morohne tyrise Ritonõpo a sero pata konõto pokona?
9 Mame ynara ezuhnõko mã toto, Ritonõpo omihpyry turumekase oya xine exiryke, onetapohpyrykõ roropa ya, Ritonõpo Oesẽkomo, imehnõ neponãmary eahmatohme oya xine.
Ritonõpo omiry Joakaze poko
10 Juta tomo, xitara ehtoko tuisa Joxia poko,
onyhnamopyra ehtoko aorihtopõpyry poko.
Yrome imũkuru, Joakaze poko oxitatoko yronymyryme.
Mokyro arõko mã toto,
jũme oehpyra ropa mana,
jũme tonurutopõpyry onenepyra ropa exĩko mana.
11 Ynara ãko Ritonõpo Kuesẽkõ mana Joakaze, Joxia mũkuru poko, tumy myakãme Juta tõ tuisaryme:
— Toytose mã ynororo taroino jũme, oehpyra ropa ehtohme.
12 Orihnõko mokyro mana moroto inarotopõpyry po, jũme sero nono onenepyra ropa exĩko mana.
Ritonõpo omiry Jeoakĩ poko
13 Popyra ehtoh oehnõko mokyro a myhene, tytapyĩ riryhtao zae pyra ehtoh ke, imehnõ enekunopyry ke,
topehke pyra typãnary tõ rohmanohpõko,
aerohtamitu onepehmara ynororo!
14 Tuãnohsẽme exĩko mokyro, ynara kahpono:
“Tapyi amõko ase, inunomo, nyhtoh ke zumo pohto roropa zara po kae!”
Mame osenuhmatoh rĩko mã ynororo,
apupari rĩko apuru tõ pokona, tonohse kamirarame.
15 Tuisame osekarõko mah tapyi tyrise oya exiryke apupari ke, imehnõ tapyĩ tõ motye kure?
Omy Joxia tynahke nexiase tõkuke roropa;
zae exikehpyra nexiase, ajohpe pyra ipunaka.
Inyrihpyry emero kure toehse nexiase.
16 Zae rokẽ nexiase tymõkomokãkara poko, etuarimaketõ poko roropa,
naeroro emero kure toehse eya.
Moro riryhtao ahno a enetupuhnõko mase,
juaro mokyro mana.
Ywy, Ritonõpo, oturũko ase.
17 Yrome omoro ise oehtoh rokẽ enẽko mase,
openetatoh poko mase.
Ahno kurã etapãko mase,
oekyry tõ ryhmãko mase jamihme oexiryke.
18 Morara exiryke ynara ãko Ritonõpo mana Jeoakĩ, Juta tuisary, Joxia mũkuru poko:
“Xitara exĩko mã toto emero Jeoakĩ orihtopõpyry poko,
ynara kara mã toto:
‘Popyra ehtoh toehse oya myhene!
Popyra ehtoh moro, jepe!’
Onyhnamopyra mã toto,
ynara kara mã toto:
‘Yna tuisary! Yna Esemy!’
19 Ekepyry tonẽsẽme exĩko jumẽtu zonẽtoh samo toorihse ahtao;
tytywyhmasẽme exĩko ematohme jarãnaka pata Jerusarẽ omõtoh ae.”
Jerusarẽ ynara exĩko mana
20 Jerusarẽ põkomo, ytotoko Ripano pona kohtase,
Pasã nonory pona ytotoko kohtase opore.
Okohtatoko ypy tõ poe Moape nonory po,
oepe tõ nonory emero typoremãkase!
21 Tõturuse Ritonõpo oya kure ro awahtao etuarimara awahtao,
yrome etary se pyra mexiase.
Moro sã mexiase moino ro poetome awahtao,
toipe mexiase Ritonõpo omipona pyra.
22 Otuisary tõ taroposẽme exĩko sapararahme tyryrykane a,
oepe tõ tarosẽme exĩko mã toto imehnõ namotome tapoisẽme etonatoh tao.
Apatary typoremãkasẽme exĩko,
ehxiroketyme sã exĩko roropa mana popyra ehtoh tyrise oya exiryke.
23 Omoro, towomase exikety, torẽtyke pyra mase apupari risẽ tao,
Ripano poe tonehse aexihpyry;
yrome pusuh ãko mase myhene, takarah katoh toehse ahtao, jetũ toehse ahtao nohpo samo aenururuhtao!
Joakĩ wãnohtopo
24 Ynara tykase Ritonõpo Kuesẽkõ, Juta tuisary Joakĩ a, Jeoakĩ mũkuru:
— Jomiry etapõko ase oya, ywy ase Ritonõpo, Isene Exikety. Jemahtao awahtao jemary poko apotunuru wino, omoro oũko ase.
25 Oekarõko ase oetapary se exiketomo a, mokaro zuno mase, tuisa Napukotonozo a, Papironia esemy, isoutatu tõ maro.
26 Oemãko ase asa maro imepỹ nonory pona, moroto enurupyra mexiatose, moroto orihnõko matose.
27 Ononorykõ poko omuhpe exĩko matose repe, yrome morotona oehpyra ropa matose.
28 Mame ynara tykase ywy:
— Otarame tuisa Joakĩ oripo sã toehse, tyhmose aexihpyry, typahse aexihpyry, ise pyra toehse aexihpyry? Oty katohme tarose ynororo ipoenõ maro tomase roropa imepỹ nono pona, zuaro pyra aexihpyry pona?
29 Nono, nono, nono! etako ke Ritonõpo omiry:
30 “Mose tuãnohsẽme exĩko mana tumũkue pyra ehtohme,
orẽnõko mana.
Typakõke pyra exĩko mana tuisame ehtohme, Tawi ehtopõpyry samo, Juta tõ tuisaryme.
Ywy Ritonõpo oturũko ase.”