31
Izyraeu tõ oepyry ropa tosaka xine
1 Ritonõpo Kuesẽkõ ynara tykase:
— Imeĩpo ẽmepyry oehnõko mana: Izyraeu ekyry tõ emero Esẽme exĩko ase, ypoetoryme exĩko roropa mã toto.
2 Ona tonorẽ po, mokaro pyno exiase, tõsepynanohse aexityã aorikyrykõ wino. Tõserematoh se toehse Izyraeu tõ ahtao,
3 moino tooehse ywy, osenepose eya xine. Moino ro opyno xine exiase, naeroro opyno xine jehtoh enepõko ro ase oya xine, jũme opyno xine jehtoh exikehpyra mana.
4 Izyraeu tomo, oritorỹko ropa ase tynonoke ahnome. Tãporĩ tõ apoĩko ropa matose watohme tãkye oehtohkõke.
5 Uwa zoko tõ arykãko ropa matose ypy tõ po Samaria po. Uwa zoko arykananõ epery apoĩko roropa mã toto.
6 Ẽmepyry oehnõko mana, erase tõ imehnõ kohmãko mã toto ypy tõ po Eparaĩ po: “Osehtoko! Ehmaropa ypy Xião pona, moroto Ritonõpo Kuesẽkõ exiryke,” ãko mã toto.
7 Ynara tykase Ritonõpo:
“Oeremiatoko tãkye oexirykõke Izyraeu poko, imehxo exiketyme tynonoke ahno tõ rãnao.
Oeremiatoko eahmaryme sero:
‘Typoetory tõ typynanohse Ritonõpo a,
Izyraeu tõ akoĩpyry typynanohse eya.’
8 Toto enehnõko ase inikahpoe, imehnõ nono tõ poe, moino sero nono etyhpyry poe.
Imaro xine tonurẽkara oehnõko mã toto, ahmitatyã roropa, nohpo tõ poetoẽme exiketõ maro enurusasaka exiketõ roropa.
Oehnõko ropa mã toto imoihmãkomo, tynonoke imehxo exiketõme.
9 Mokaro enepyryhtao ya, oehnõko mã toto xitãko,
oturũko roropa ya.
Toto arõko ase tuna ehpikoxi iporiry tõ pona, osema kuraraximã poro,
moroto osetapara exĩko mã toto.
Izyraeu tõ zũme ase,
Eparaĩ umũkurume mana osemazuhme aenuruhpyryme.”
10 Ynara ãko ro Ritonõpo mana:
“Ahno tomo, etatoko ke, jotururu, jomihpyry ekarotohme imehnomo a ahmõta tõ po te, nono moe etyhpyry po roropa.
Izyraeu tõ sapararahme aropoase,
yrome toto muhxihmapõko ropa ase,
toto ewomãko ase, kaneru pyno exikety toky tõ pynanopyry samo.
11 Izyraeu pakomotyã tymyhpokase ropa ya,
typynanohse toto ya ahno jamihmehxo exiketõ wino.
12 Oehnõko mã toto eremiase tãkye toexirykõke ypy Xião pona;
atãkyemãko mã toto ynekarory tõ poko eya xine, tiriiku tõkehko, uwa eukuru, azeite, pui tomo te, kaneru tomo, enara.
Tupito tarykasãme exĩko mã toto tuna itamurume nae ahtao,
emero ise toto ehtoh nae exĩko mã toto.
13 Mame oryxiamo wãko mã toto
atãkyemãko roropa,
nuasemãkomo, tamuhpomãkõ roropa oseahmãko mã toto.
Emuhkehkapotorỹko ase,
ixitarykõ myakamãko ase tãkye ehtoh ke,
aemynyhmarykõ myakamãko ase atãkyematoh ke.
14 Oturuketõ nahpãko ase inapyrykõ kurã ke,
ypoetory tomo a emero ise toto ehtoh ekarõko ase.
Ywy Ritonõpo oturuno.”
Typoetory tõ pyno Ritonõpo exĩko mana
15 Ynara tykase Ritonõpo:
“Panaikato osetãko mana Rama po, ixitary yronymyryme.
Rakeu xitãko mana tumũkuru tõ poko;
tõsemuhkehkary se pyra mana,
toorihse toto exiryke emero.
16 Xitara exiko, oxity ikorokako ropa.
Onyrihpyry emero opoenõ poko topehmasẽme exĩko mana;
oehnõko ropa mã toto epetõkara nonory poe.
Ywy Ritonõpo oturuno.
17 Kure ehtoh oeraximãko mana,
moro apoĩko mase imeĩpo;
opoenõ oehnõko ropa mã toto atapyĩ taka.
Ywy Ritonõpo oturuno.
18 “Ypoetory tõ, Izyraeu tõ kerekeremary etãko ase:
Ynara ãko mã toto: ‘Ritonõpo, pui mũkuru sã ynanexiase, ekuremara ro exiketõ samo.
Yrome tamorepase ynanexiase oya, õmiry omipona yna ehtohme.
Yna enehpoko ropa oya, Ritonõpo,
mame oehnõko ropa ynanase oya, yna Esẽme oexiryke.
19 Turumekase yna a omoro,
yrome okynã pyra yna rypyhpyry rumekary se toehse ropa ynanexiase.
Tuãnohse yna ahtao oya,
tupue toehse yna emynyhmaryke popyra ynanyrihpyry pokoino nuaseme ro yna ahtao.’
20 “Izyraeu tomo, amarokõ matose umũkurume nupunato,
opyno xinehxo ase ipunaka.
Oesehtoryhtao ya opoko osenetupuhnõko ase, opyno jexiryke.
Ukurohtao oeahmary se ase,
awãnohpyra exĩko ase rahkene.
Ywy Ritonõpo oturuno.
21 Osema esety menuru tyritoko osema tõ po;
oesemarykõ enetoko kure, oytorykohtao.
Osehtoko ropa, Izyraeu tomo, apatarykõ pona,
atapyĩkõ taka osehtoko ropa, onurumekahpyry pona ropa.
22 Jẽxiryme jomiry omipona pyra exikety sã matose.
Otara ahtao jenetupuhpyra oehtohkõ rumekãko matou?
Ywy Ritonõpo tyorõ sã yriase sero nono po,
orutua ewomãko nohpo mã rahkene.”
Kure rokẽ Ritonõpo poetory tõ ehtopo
23 Ritonõpo Jamihmehxo Exikety, Izyraeu tõ Esẽ ynara ãko:
— Izyraeu tõ enepyry ropa ahtao ya inonorykõ pona ropa, ynara ãko ropa mã toto Juta tõ nonory po, ipatary tõ po roropa:
“Ritonõpo a kure rokẽ oripory se ase,
ypy kurã Jerusarẽ esary,
moroto mã Ritonõpo Zae Exikety esaryme!”
24 Moroto Juta po, ipatarykõ po emero, ahno exĩko; tupito poko erohketomo, kaneru tõ poko erohketõ roropa.
25 Totaehse exiketõ sekese toto ripõko ropa ase, tonahsẽ ekarõko ase omise exiketomo a roropa emero.
26 Mame typakase ywy tõseremase, kure nexiase jynyhtopõpyry ya.
Ynara tyrĩko ase, katopõpyry Ritonõpo a
27 — Ywy Ritonõpo ynara ãko ase, imeĩpo ahno emãkapõko ase, okyno tõ roropa Izyraeu nonory pehme ehtohme, Juta nonory roropa.
28 Morarame tomeseke jehtopõpyry sã, toto mity ouru poko, toto akotyry poko, toto ryhmary poko te, toto itahkary poko, toto enahkary poko roropa, moro saaro tomeseke sã toto emãkapõko ase tupito arykary samo te, tapyi amory sã toto rĩko ropa ase. Ywy Ritonõpo oturuno.
29 Morarame moro ẽmepyry toehse ahtao ynara kara exĩko mã toto:
“Uwa tõ exipyra ro exiketõ tonahse jũkomo a,
yrome ipoenõ zery jetũ toehse.”
30 Mãpyra mokyro uwa tõ exipyra ro exiketõ enapyryhtao, ynororo zery jetũ exĩko mana; ahno emero tyyrypyry poko rokẽ tuãnohsẽme exĩko, toorikyry ke epehmãko mana.
31 Ritonõpo ynara tykase:
— Imeĩpo ẽmepyry oehnõko mana, jomiry kasenato etapõko ase Izyraeu tomo a, Juta tomo a roropa.
32 Sero jomiry jomihpyry pakato sã pyra exĩko mana, ynekarohpyry itamuru tomo a emarykõ tapoise ahtao ya, toto tarose ahtao roropa ya Ejitu nonory poe. Mokaro pyno exiase, typyty pyno inio ehtoh saaro, yrome jomihpyry omipona pyra toh nexiase.
33 Moro ẽmepyry toehse ahtao ynara tyrĩko ase Izyraeu tomo a, jomiry kasenato etapõko ase eya xine: jomiry merõko ase ikurohtaka xine, eanokõ pokona samo. Toto Esẽme exĩko ase, ypoetoryme exĩko mã toto. Ywy Ritonõpo oturuno.
34 Typãnarykõ anamorepara exĩko mã toto, tyekyrykõ roropa anamorepara exĩko mã toto, ynara kary se pyra exĩko mã toto: “Ritonõpo enetupuhko oesẽme.” Juaro exĩko mã toto emero porehme, tamuximãkomo, poeto tõ roropa. Popyra toto nyrihpyry korokãko ase, jũme zae pyra toto ehtopõpyry wenikehnõko ase. Ywy Ritonõpo oturuno.
35 Xixi tyrise Ritonõpo a saerehkatohme ẽmepyryme ahtao,
nuno tyrise eya xirikuato tõ roropa saerehkatohme koko.
Tuna konõto tyripõko mana zehno exikety samo, panaikato, pohkane roropa;
esety Ritonõpo Jamihmehxo Exiketyme.
36 Tõmiry etapõko mana:
morohne inyrityã enahpyra ahtao, moro saaro Izyraeu tõ enahpyra mana,
tynonoke ahnome exikehpyra mã toto.
37 Zuaro toehse ahno ahtao,
kapu zumo ehtoh kukuru waro toehse ahno ahtao,
nono apõ enery waro toehse toto ahtao,
morara ahtao rokẽ Izyraeu tõ rumekãko Ritonõpo mana, popyra inyrityã pokoino.
Ritonõpo Oesẽkõ oturũko mana.
38 — Ẽmepyry oehnõko mana, ãko Ritonõpo mana. — Sero pata tyrisẽme exĩko ropa mana, tapyi kae exikety Hananeu poe Omõtoh Wazahmatoh pona.
39 Moro poe apiakatoh eary ytõko ypy Karepe pona, morotoino ytõko Koa pũtokoxi.
40 Mame jakanahmã porehme: aorihtyã ekepyry tõ maro, oruno maro, tupito tõ maro emero iporiry Keterõ moinakoxi Omõtoh Kawaru pona xixi tũtatoh wino jesary kurãme exĩko mana. Mame Jerusarẽ etahkara ropa exĩko, onenahkara ropa mana jumãme.