48
Moape enahkatoh poko
1 Ritonõpo Jamihmehxo, Izyraeu tõ Esemy ynara tykase Moape tõ poko:
“Emynyhmatoko pata Nepo põkõ poko, ipatarykõ tonahkase exiryke!
Pata Kiriataĩ tapoise nexiase,
isoutatu tõ tapyĩ jamihme exikety tytahkase,
tomase nono pona, epõkõ typoremãkase.
2 Imehxo Moape tõ ehtopõpyry tonahse.
Hexipõ po, epetõkara osenetupuhnõko mã toto tynyrirykõ poko:
‘Ehmaropa, Moape tõ enahkase!’
Soutatu tõ ytõko mã toto pata Matamẽ poremãkase;
mynyhme rokẽ exĩko moro pata põkomo.
3 Pata Horonaĩ põkõ kohtãko mã toto:
‘Yna etapãko mã toto!
Yna esary enahkãko mã toto!’
4 “Moape nonory tonahkase mana;
poetohti xitãko mana.
5 Etatoko ke ixitarykomo, osema tao pata Ruite pona,
etatoko roropa kui kui katoh moro,
sam karyke osema tao ikurenaka pata Horonaĩ pona.
6 ‘Axiny! Tururume ytotoko osepynanohtohme!’
ãko mã toto, kui ãko mã toto.
‘Epatoko jumẽtu samo, ona po exiketomo, tosẽke pyra exiketomo!’
7 “Moape tomo ajamitunuru ipune mekaroatose omõkomory roropa oewomatohkõme repe,
yrome seromaroro typoremãkasẽme exĩko mase.
Oritõ Kemo tarosẽme exĩko imepỹ nono pona, otuisary poenõ maro oritõ poko oturuketõ maro.
8 Apatary tõ emero osewomara exĩko,
tonahkasẽme exĩko mã toto; jakanahmã tomo,
ona maro somohmã tõ maro typahsẽme exĩko mã toto.
Ywy Ritonõpo oturuno.
9 Topu imenekatoko aorihtyã ekepyry zonẽtohme, Moape tõ kyryryme, ynara exiryke,
okynã pyra sero nono tonahkasẽme exĩko;
ipatary tõ patãpome exĩko, tytaõke pyra.
Ahno pyra exĩko mã moroto.”
10 Popyra ehtoh enehpoko mokyro ajoajohpe rokẽ Ritonõpo nyripohpyry poko exikety!
Popyra ehtoh oehnõko mokyro a soutatume ahtao
yrome onuopyra ynororo ahtao!
Moape tõ patary tõ enahkatoh poko
11 Ritonõpo Kuesẽkõ ynara tykase:
— Moino ro Moape tõ osetapara toh nexiase, towomase toh nexiase, epetõkara a anaropyra toh nexiase imehnõ poetoryme, inonory poe. Uwa eukuru sã mã Moape tomo tukurãkase ahtao, onywyrywyrymara ahtao, anarykara roropa ahtao imepỹ ẽ aka. Tomepore aexihpyry atahnikara nexiase, onytyoromara nexiase.
12 — Naeroro etatoko pahne, imeĩpo, ãko Ritonõpo mana, imehnõ ahno enehpõko ase Moape tõ enahkatohme, uwa eukuru kuamyry sã nono pona ipoko erohketomo a. Moape tõ kuãnõko sã mã toto, ẽ tõ akuhmõko mã toto.
13 Mame Moape tõ ehxirõko mã toto tyneponãmarykõ Kemo poko, Izyraeu tõ ehtopõpyry samo toehxirose toto ahtao Peteu poko towomanekõme enetupuhxĩpo eya xine.
14 Orutua komo, Moape põkomo, ynara kasaromepyra matose:
Orẽpyra ynanase, jamihme ynanase osetapary poko,
kasaromepyra matose.
15 Moape tomo, ipatary tõ maro tonahkase mã toto;
ipoenõ, nuasemãkõ totapase mã toto.
Ywy ase Tuisa, oturũko ase.
Jesety Oesẽkõme mana, Jamihmehxo Exikety.
16 Sero ahno poremãkatoh ameke pyra oehnõko mana;
okynã pyra oenahkatoh oehnõko mana.
17 Emynyhmatoko Moape tõ poko, ameke pyra exiketomo; mokyro esety waro exiketomo.
Ynara kahtoko:
“Orẽpyra oehtohkõ tonahse,
imehxo oehtopõpyry nenahno.”
18 Amarokõ, Tipõ põkomo, yhtoko tuisame exiketõ esary poe;
oporohtoko nono pona, putoh katoh pona.
Moape poremãkane tooehse mana;
soutatu tõ tapyĩ tõ jamihme exiketõ tahkãko mana.
19 Pata Aroea põkomo, osema ehpiõ po eraximatoko;
ekaropotoko mokaro epaketomo a: “Otara toehse?”
20 Ynara ãko ezuhnõko mã toto:
“Moape nonory põkõ typoremãkase mã toto.
Ixitatoko mokaro poko tonahkase toto exiryke.
Zuruko toto tuna Aranõ ehpikuroko Moape poremãkatopõpyry poko.”
21 Ona po pata tõ wãnohtoh toehse mana: Horõ wãnohtoh te, Jasa te, Mepaate te,
22 Tipõ te, Nepo te, Pete-Tipirataĩ te,
23 Kiriataĩ te, Pete-Kamuu te, Pete-Meão te,
24 Keriote te, Posora, enara. Moape tõ patary tõ porehme moe exiketomo moe pyra exiketõ roropa emero tuãnohsẽme exĩko mã toto.
25 Moape orẽpyra ehtoh takurihmose, ajamitunuru tonahkase mana. Ywy Ritonõpo oturuno.
Moape ehxirotoh sero
26 Ynara ãko ro Ritonõpo mana:
— Toetỹse Moape tõ tyripotoko, turumekase jexiryke eya xine, Ritonõpo, toto Esẽkomo. Tonarutatopõpyry aka omõnõko Moape tõ mana. Toto zurõko imehnõ mana.
27 Moape tomo, wenikehpyra hma Izyraeu tõ zurotopõpyry oya xine? Mokaro tyrise oya xine omato kõ samo tapoise ahtao.
28 — Moape põkomo, apatarykõ irumekatoko, ytotoko osesarise topu tõ rãnaka. Utuku sã ehtoko. Tymỹkõ rĩko mã toto topu emory ehpiõ po.
29 Moape tõ epyrypaketõme mã toto. Imehnõ motye kure osekarõko mã toto. Typoko xine rokẽ osenetupuhnõko mã toto.
30 Ywy Ritonõpo, imehnõ zehno Moape tõ ehtoh waro ase. Epyrypãko mã toto toiparo rokẽ tynyrirykõ poko. Okynã pyra tonahse mã toto.
31 Morara exiryke xitãko ase Moape põkõ poko emero, Kia-Here põkõ poko roropa.
32 Xitãko ase itamurumehxo Xipima põkõ poko, Jazea põkõ poko roropa, yrome itamurume hkopyra. Pata Xipima, uwa zoko sã mase; ãmoriry tõ ahtãko tuna konõto Aorikyhpyry epozakoxi mya pata Jazea pona. Yrome seromaroro oepetõkara a anarykatyã tonahkase tiriiku tõkehko, uwa zoko tõ roropa.
33 Tãkye ahno ehtoh tonahse, atãkyematoh roropa tonahse Moape nonory kurã po. Uwa eukuru onyripyra toehse mã toto. Eukuru rinanõ pyra mana, kui kananõ pyra roropa mana tãkye ehtoh ke.
34 — Mokaro pata Hexipõ põkomo te, pata Ereau põkõ roropa kui ãko mã toto, toto kui katoh etãko imehnõ mana Jasa po. Osetãko roropa pata Zoa põkomo a te, mya roropa Horonaĩ põkomo a, pata Tyrisenã Ekerate põkomo a roropa. Iporiry Ninirĩ roropa tãpaise.
35 Moape põkomo a tynekarorykõ zahkakehpõko ase ypy tõ emory po. Inekarorykõ zahkakehpõko ase eya xine toto ritõ tõ eahmaryme. Ywy ase Ritonõpo, oturuno oya xine.
36 — Morara exiryke emynyhmãko ase, xitãko ase ukurohtao Moape tõ poko, pata Kia-Here põkõ poko roropa, rue etone sã ase ahno hnamoryme ekepyry zonẽtoh poko; ikyryrykõ emero tonahkase exiryke.
37 “Zũsetykõ tysahkase emynyhmaryme, tõsetypokase roropa mã toto. Typihpyrykõ tysahsahkase ihnamoryme eya xine tomarykõ poko, upo topuxiximã tamuruse eya xine.
38 Zara po emero tapyi tao, xitãko mã toto, pata esemary tõ ae roropa, Moape tyhmose ya exiryke oripõpo samo yzamaro pyra toehse ahtao,” ãko Ritonõpo mana.
39 Ihnamõko mã toto: Moape tõ tytahkase sã mã toto! Ehxirõko mã toto! Inonory tonahkase mana, eunohnõko mã toto imehnõ nonory põkomo, zomye exiketomo. Ywy Ritonõpo oturuno.
Osewomasaromepyra Moape tõ exĩko
40 — Ywy Ritonõpo ekaroase: Imepỹ ahno oehnõko osetapase Moape tõ maro. Piano sã oehnõko mana yhtose Moape pona, taporihke.
41 Ipatarykõ tapoisẽme exĩko mã kehko soutatu tõ tapyĩ jamihmãkõ maro. Moro toehse ahtao Moape tõ soutatu tõ oserehnõko mã toto nohpo samo jetũ toehse ahtao enururuhtao.
42 Moape tonahkasẽme exĩko, tynonoryke pyra exĩko mã toto, turumekase jexiryke eya xine.
43 Enaromỹke ehtopo, eutary tõ nono ao, ahno apoitoh roropa Moape tõ eraximãko. Ywy Ritonõpo oturuno.
44 Epaketõ enaromỹke eutary aka epukãko mã toto, eutary ae tutũtase exiketõ apoitoh taka omõnõko mã toto, Moape tõ enahkatoh tymenekase Ritonõpo a exiryke, Moape tõ enahkapotohme.
45 Imehnõ epãko mã toto, tapotũkehse, osewomatoh zupĩko pata Hexipõ po repe. Yrome Hexipõ, tuisa Seõ patahpyry zahnõko mana. Moape nonory ehpio tyahkase, ypy tõ emory roropa, osetapary se exiketõ esary.
46 Moape tomo myhene! Tyneponãmarykõ Kemo eahmananõ tonahkase; imũkuru tomo, ẽxiry tõ roropa tarose imehnõ poetoryme.
47 Yrome imeĩpo Moape tõ enehpõko ropa ase, apitoryme toto ehtopõpyry sã toto ehtohme ropa.
Moro sã Moape tõ wãnohpõko Ritonõpo Kuesẽkõ mana.