24
1 Morarame kure rokẽ Izyraeu tõ riry se Ritonõpo ehtoh tonetupuhse Paraão a. Naeroro mya ytopyra nexiase enetupuhpotoh eraximase Ritonõpo poe. Toeramase rokẽ ynororo ona amerehmã wino rokene,
2 Izyraeu tõ enese. Tõsesarise, oxiekyrymãkõ oximõme, tosarykõ po. Mame Ritonõpo Zuzenu poe tõturupitose Paraão:
3 Ynara tykase ynororo Ritonõpo poe:
“Sero nase Paraão nekarory, Peoa mũkuru,
ynekarory sero jenuru kure rokẽ osenuhmaryhtao,
4 kure rokẽ Ritonõpo omiry etãko roropa.
Jesekumuru po typorohse ywy,
jenuru tõ onetõ sã,
Ritonõpo a tyripose,
Jamihmehxo Exikety enepotohme.
5 Enekure potu oesarykomo, Izyraeu tomo!
Enekure atapyĩkomo!
6 Airiki panõ tõ sã mã toto,
tarykase exiketõ samo atakenaka,
tupito po sã tuna ehpio, tykyrysã samo
tarykase ahtao Ritonõpo Kuesẽkomo a,
apupari tõ samo ahtãko tuna tõ ehpio.
7 Konopo itamurume nae Izyraeu tõ exĩko aukurukõme mana te,
otyro puhturu ehxikatohme tarykase ahtao eya xine.
Ituisarykõ jamihmehxo exĩko mana,
Akake motye, tuisamehxo exĩko roropa mana tuisa tõ rãnao.
8 Izyraeu tõ tonehse Ritonõpo a Ejitu poe
epetõkara poremãkapõko mana pui orutua itu htaõ
samo. Topetõkara enahkãko mã toto,
Toto zehpyry akuakuhmõko mã toto,
ipyrekõ tahtahkãko mã toto.
9 Reão jamihmã sã Izyraeu mana:
tynyhse ynororo ahtao
ipakary zuno mã toto.
Kure rokẽ Izyraeu tõ ripory se exiketõ,
kure rokẽ exĩko mã toto.
Popyra Izyraeu tõ riponanõ,
popyra tyriposẽme exĩko mã toto.”
10 Mame Parake tyekĩtapãse Paraão poko. Tomary totapase eya zakorõ ke zehno toexiryke, ynara tykase ynororo:
— Kykohmase ooehtohme popyra jepetõkara ripotohme. Yrome kure rokẽ toto tyripose oya oseruao.
11 Seromaroro ytoko ropa atapyĩ taka. Oepehmary se exiase repe. Yrome Ritonõpo, Oesẽ oepehmapopyra mana.
12 Ynara tykase Paraão:
— Õmiry aronanomo a oturuase, ynara ase eya xine,
13 parata ke topehmase jahtao oya, uuru maro emero atapyĩ tao exikety, Ritonõpo, Jesẽ nyripohpyry omipona pyra ehsaromepyra ase. Mokaro zuruase: jamoreme emero rokẽ onyrisaromepyra ase, Ritonõpo omi poe rokẽ oturũko ase.
Paraão omiry etyhpyrymano
14 Ynara tykase Paraão Parake a:
— Seromaroro ytõko ropa ase wekyry tomo a; yrome osemazuhme ekarory se hano Izyraeu tõ nyriry poko opoetory tomo a imeĩpo.
15 Mame ynara tykase ynororo imeĩpo ehtoh poko:
“Sero nase Paraão otururu, Peoa mũkuru,
ynekarohpyry sero jenuru kure osenuhmaryhtao,
16 kure rokẽ Ritonõpo omiry etaryhtao,
tuaro ehtoh apoitohme Imehxo Exikety wino.
Jesekumuru po typorohse ywy,
jenuru tõ onetõ sã Ritonõpo a tonepose ya, Jamihmehxo Exikety.
17 Imeĩpo ehtoh enẽko ase,
Izyraeu tõ enẽko.
Tuisa konõto, xirikuato saeremehxo
exikety sã exĩko mana mokaro wino.
Tonesã samo oehnõko mana Izyraeu tõ poe.
Moape tõ tuisamãkõ poremãkapõko mana.
Mokaro ahno epyrypaketõ enahkapõko mana.
18 Izyraeu tõ epetõkara poremãkãko mana, etomita tomo.
Mokaro nonory apoĩko mana Izyraeu tõ nonoryme ehtohme.
Tyjamitunuru enepõko Izyraeu tõ mana.
19 Jako pakomotyã wino,
orẽpyra exikety exĩko mana;
pata põkõ enahkapõko mana.”
20 Mame moro enepotoh ae amarekita tõ tonese Paraão a, naeroro ynara tykase:
“Amareke tõ imehnõ motye orẽpyra toh nexiase repe.
Yrome etyhpyryme tonahkasẽme exĩko mã toto jũme.”
21 Mame enepotoh ae keneu tõ tonese Paraão a, ynara tykase ynororo:
“Oesarykõ jamihme mana, omyny ewomahpyry sã topu konõto ao.
22 Yrome tonahkasẽme exĩko matose tarose awahtao xine axirio tomo a typoetory tõme.”
23 Ynara tykase roropa Paraão:
“Onokãkõ mokaro ahno oximõnõko inikahpozakoxi?
24 Xipere poe epetõkara oehnõko mã toto tywapukõ ae.
Axirio tõ poremãkapõko mã toto,
Hepea tõ maro.
Yrome imeĩpo tonahkasẽme exĩko mã toto, jumãme.”
25 Moromeĩpo tãtakimase ropa Paraão toytotohme tytapyĩ taka ropa. Parake roropa toytose ropa.