7
Oxiekyry tõ tuisary tõ nekarotyamo
1 Morarame tõtyhkase Moeze ahtao Ritonõpo Tapyĩ riry poko, Ritonõpo Tapyĩme Kurã typopase eya, Tapyi mõkomory maro, apoto apõ mõkomory maro. Morohne tapiakase eya Ritonõpo poko rokẽ ehtohme.
2 Mame oxiekyrymãkõ tuisary tomo a, tamuximehxo toexirykõke, Moeze akorehmaneme roropa toh nexiase tyekyry tõ kuhtopõpyry poko,
3 tynekarorykõ tonehse Ritonõpo Tosẽkomo a: 6me kahosa tomo, pui tõ maro 12me. Asasakoro tuisa tõ a toiro kahosa tokarose, toiro tuisa a toiro pui tokarose roropa. Morohne emero tyrise eya xine Tapyi ẽpataka.
4 Ynara tykase Ritonõpo Moeze a:
5 — Kahosa tõ apoiko pui tõ maro erohtohme Tapyi poko. Morohne ekaroko rewita tomo a toto akorehmatohme toerohtohkõ poko.
6 Naeroro rewita tomo a moro kahosa tõ tokarose Moeze a, pui tõ maro.
7 Jeresõ pakomotyamo a asakoro kahosa tõ tokarose eya 4me pui tõ maro mokaro erohtoh pokoino.
8 Merari pakomotyamo a, toto erohtoh pokoino, 4me kahosa tõ tokarose Moeze a 8me pui tõ maro. Mokaro erohtoh esẽme Itamaa nexiase, oturukety Arão mũkuru.
9 Yrome Koate pakomotyamo a morohne onekaropyra Moeze nexiase, Ritonõpo mõkomory kurã toto motary tõ po rokẽ tupuimapose exiryke Ritonõpo omi poe.
10 Tuisa tomo a tynekarorykõ tonehse oseahmatohme, apoto apõ ekarory poko Ritonõpo a ikyryryme kurano. Morohne enepyry se toehse toto ahtao apoto apõ pona,
11 ynara tykase Ritonõpo Moeze a:
— Kaxiko eya xine 12me toto exiryke 12me ẽmepyry ae tynekarory tõ enehnõko mã toto. Atakenaka toiro ẽmepyry ae toiro tuisa tynekarory enehnõko mana moro apoto apõ apiakaryme ykyryryme kurano.
12-83 Ynara tynekarory tonehse eya xine atakenaka:
Ẽmepyry apitorymã po Juta tõ tuisary Nasõ, Aminatape mũkuru.
2mã po Isakaa tõ tuisary Netaneu, Zuaa mũkuru.
3mã po Zepurõ tõ tuisary Eriape, Herõ mũkuru.
4mã po Rupẽ tõ tuisary Erisua, Seteua mũkuru.
5mã po Ximeão tõ tuisary Serumieu, Zurisatai mũkuru.
6mã po Kate tõ tuisary Eriasape, Teueu mũkuru.
7mã po Eparaĩ tõ tuisary Erisama, Amiute mũkuru.
8mã po Manase tõ tuisary Kamarieu, Petasua mũkuru.
9mã po Pẽjamĩ tõ tuisary Apitã, Kiteoni mũkuru.
10mã po Tã tõ tuisary Aiezea, Amisatai mũkuru.
11mã po Asea tõ tuisary Pajieu, Okarã mũkuru.
12mã po Napatari tõ tuisary Aira, Enã mũkuru.
Mokaro nekarotyã oxisã kehko nexiase: toiro paratu parata risemy 1,5 kirume; toiro paxiha parata risemy 800 karamame; tuisa konõto kuhtoh ae ro. (Moro paratu, paxiha roropa tonehse eya xine pehme tiriiku ke azeite maro, tynekaroryme) te, paratu uuru risemy 115 karamame ixtaratu ke pehme te, toiro pui mũkuru te, toiro kaneru te, toiro kaneru mũkuru 1 anome exikety zahkatohme apoto apõ po te, toiro poti zahkatohme iirypyry korokapotohme te; osepeme, 2me pui tomo, 5me kaneru tomo, 5me poti tomo te, 5me kaneru mũkuru tomo toiro jeimamyry nae exiketomo.
84-85 Atapona Izyraeu tõ tuisary tõ nekarohpyry moro apoto apõ apiakary poko Ritonõpo nyripohpyry poko ynara nexiase: 12me paratu tomo parata risemy te, 12me paxiha tõ parata risemy te, atapona omoxinety 27,5 kirume nexiase;
86 12me paratu tõ uuru risemy, omoxinety 1 kiru 380 karamame (Moro paratu tõ pehme kehko nexiase ixtaratu ke);
87 tynekarorykõ zahkatohme tytororo: 12me kaneru tomo te, 12me kaneru mũkuru tõ 1 anome exiketomo te, tiriiku tõkehko maro moro tynekarorykõ maro ehtohme; iirypyry korokapotohme, 12me poti tomo te,
88 tynekarorykõ osepeme ehtohme, 24me pui tomo te, 60me kaneru tomo, 60me poti tomo te, 60me kaneru mũkuru tõ toiro jeimamyry nae exiketomo, enara.
89 Mame tomõse Moeze ahtao Ritonõpo maro Oturutoh taka, oturuse Ritonõpo maro, Ritonõpo omiry totase eya. Oturũko nexiase, aomihpyry ẽ apuru poe, mokaro kerupĩ tõ rãnae. (Moro sã tõturuse Ritonõpo Moeze maro.)