112
Tãkye mã mokyro Ritonõpo omipona exikety
1 “Kure mase, Ritonõpo,” sykatone!
Tãkye mã mokyro Ritonõpo omipona exikety.
Mokyro zamaro mana,
Ritonõpo nyripohpyry omipona toexiryke!
2 Mokyro mũkuru tõ orẽpyra exĩko mã toto
Ritonõpo nekarohpyry po,
ipakomotyã roropa kure rokẽ exĩko mã toto.
3 Itapyĩ tao mõkomo kurã nae mana pitiko rokẽ pyra,
tytineruke exikehpyra exĩko mana jũme.
4 Ezuru saereh ãko mana ikohmamyry ao, zae ehtoh poko exiketomo a te, kure ehtoh poko exiketomo a, imehnõ pyno exiketomo a, enara.
5 Tãkye mã mokyro imehnõ pyno exikety, tytineru ke toto akorehmãko mana aekurãkatohkõme ropa, zae osepekahnõko zae ekamõko roropa mana!
6 Zae exikety mã poremãpyra exĩko, ipoko jũme wenikehpyra exĩko imehnõ mana.
7 Popyra ehtoh oepyry poko omi zuno pyra mana; jamihme Ritonõpo enetuputyryke tyya.
8 Torẽtyke pyra mana, zuno pyra roropa mana;
topetõkara poremãkary eraximãko rokẽ mana.
9 Tymõkomokãkara akorehmãko mana pitiko
rokẽ pyra, kure exikehpyra mana jumãme.
Orẽpyra exĩko mana,
aomiry etary se exĩko roropa imehnõ mana.
10 Moro eneryke popyra exiketomo a tohne
exĩko mã toto; mokyro se pyra toh mã repe,
osenahkãko rokẽ mã toto.
Popyra exiketõ ise ehtoh enahnõko rokẽ mana,
arypyra exĩko ropa mana.