141
Oturutoh Ritonõpo a kokonie pukuro
Tawi nymerohpyry.
1 Ritonõpo, okohmãko ase;
axĩ ke osehko jakorehmase!
Jotururu etako okohmaryhtao jakorehmary ekaroporyhtao.
2 Joturutoh apoiko ixtaratu samo ynekaroryme oya, jemary anymyry roropa ynekaroryme kokonie pukuro.
3 Ritonõpo, ỹtary erase tyriko,
aomi popyra oturupyra jehtohme.
4 Kukurãkako zae pyra ehtoh poko se pyra jehtohme,
popyra exiketõ maro oximaro pyra jehtohme
iirypyrykõ poko.
Kuakorehmako ytopyra jehtohme jũme
toto otuhtoh konõto pona!
5 Otarame zae exiketõ juãnohnõko mã toto,
otarame jupokãko roropa mã toto
ypynotome toto ahtao;
yrome popyra exiketomo a jeahmary
se pyra ase ipunaka.
Oturukehpyra ase Ritonõpo a popyra ehtoh poko
exiketõ akorekehkatohme eya.
6 Mokaro tuisary tõ tomase ahtao
ypy topu poe, kaino;
enetupuhnõko mã toto,
zae jomihpyry ehtopõpyry poko.
7 Apotopokõ takohse ahtao, tyrakase roropa ahtao,
moro saaro mokaro zehpyry tõ typahse
exĩko zonẽtopõpyrykõ eutary pũto.
8 Yrome, Ritonõpo Jesemy, oenetupuhnõko ase,
amaro osewomãko ase. Jorihmapopyra exiko.
9 Kypynanohko tarãpa tõ wino tyrise ahtao
popyra exiketomo a japoitohme.
Kypynanohko popyra ehtoh poko exiketõ
jarakapyhpyry tõ wino, inapurupotoh tae.
10 Ah popyra exiketõ nepukã toto apoitoh taka,
tynyrihpyrykõ aka, jeparyhtao josewomatoh taka.