149
Eremiatoh sero Ritonõpo eahmaryme
1 “Kure mase, Ritonõpo,” sykatone!
Eremiatoh kasenato ke eremiatoko Kuesẽkõ eahmaryme. Eahmatoko ipoetory tõ anamonohpyra exiketõ oximõtoh tao.
2 Atãkyematoko, Izyraeu tomo, Ritonõpo Oesẽkõ poko. Oseahmatoko, Jerusarẽ põkomo, Otuisarykõ poko.
3 Ritonõpo eahmatoko, Kuesẽkomo,
awatoko mokyro eahmaryme; pãteru tõ etory ke rira tõ etotoh ke roropa.
4 Kuesẽkõ zamaro ipoetory tomo; imehnõ motye osekaropyra exiketõ orẽpyra tyripõko mana.
5 Ah Ritonõpo poetory tõ tãkye nexĩ toto
topetõkara typoremãkase tyya xine exiryke, tãtãkyemarykõme tõseahmarykohtao.
6 Ah Ritonõpo eahmã toto opore toremiarykõme, tytapemãkõ taere exiketõ ke tomahpo xine
7 imehnõ nonory põkõ poremãkatohme, ahno tõ wãnohtohme;
8 ituisary tõ myhtohme keti tõ ke, kowenu poko
erohketõ roropa kurimene risẽ keti tõ ke;
9 ahno tõ wãnohtohme Ritonõpo nyripohpyry ae ro!
Moro sã orẽpyrahxo ipoetory tõ exĩko mana,
anamonohpyra exiketomo.
“Kure mase, Ritonõpo,” sykatone!