15
Ritonõpo Tapyĩ taka ytokety
Sero saumu tymerose Tawi a.
1 Ritonõpo, onoky Atapyĩ taka ihximyra
omõnõko nae?
Onoky enaromyra oesary kurã taka
ytõko nae oeahmase ypy kurã po?
2 Mokyro mã Ritonõpo omipona rokẽ exikety,
zae rokẽ exikety imehnõ poko,
aomiry ajohpe pyra roropa mana.
3 Imehnõ onykerekeremara exiketyme mana,
tope tõ onyryhmara roropa exikety,
imeimehnõ anaomihtopyra roropa mana.
4 Kure rokẽ Ritonõpo omipona exiketõ rĩko mana,
tõmihpyry anamonohpyra exiketyme mana
tyriry tupime toehse ahtao ro,
yrome popyra exiketõ se pyra mã ynororo ipunaka.
5 Tytinerũ ke imehnõ akorehmãko mana,
imotye onepehmapopyra ropa mana,
ajohpãkõ nekarory anapoipyra mana
zae pyra ehtoh epehpyryme.
Morara awahtao jũme orẽpyra exĩko mase, enara.