25
Kuakorehmako, kuewomako, katoh Ritonõpo a
Sero saumu tymerose Tawi a.
1 Ritonõpo Jesemy, oya jotururu se hano.
2 Jesemy, oenetupuhneme ase.
Kypynanohko eporemãkapopyra jehtohme,
ehxiropyra jehtohme;
jepetõkara anãkyemapopyra exiko,
yporemãkapory se exiketomo.
3 Oenetupuhnanõ ehxiropyra exĩko mã toto,
toto onyporemãkapopyra oexiryke.
Yrome mokaro orumekary se exiketõ
poremãketõme exĩko mã toto.
4 Ritonõpo, kuamorepako zae onyriry tõ poko!
Oesemary tõ kurã enepoko ya.
5 Kuamorepako zae ehtoh poko jehtohme,
zae rokẽ oexiryke,
Jesẽme mase, Ritonõpo, Ypynanohne.
Jũme oenetupuhnõko ase.
6 Ritonõpo, wenikehpyra exiko kure
oehtopõpyry poko yna a,
yna pyno oehtopõpyry, moino ro
moro menepoase yna a.
7 Moino ro iirypyryme toehse ywy,
poetome ro jahtao azahkuru
jehtopõpyry poko owenikehko.
Yna pyno oexiryke, kure roropa oexiryke
wenikehpyra exiko ypoko, Ritonõpo, Jesemy!
8 Zae Ritonõpo mana, kure roropa,
naeroro iirypyryme exiketõ amorepãko mana
zae ehtoh poko toto ehtohme.
9 Imehnõ motye kure osekaropyra exiketõ arõko
Ritonõpo mana zae ehtoh esemary ae.
Toto amorepãko mana ise toehtoh poko.
10 Tõmihpyry anamonohpyra mana,
kypyno xine toexiryke aomihpyry onurumekara
exiketõ amorepãko mana,
Ritonõpo omiry omipona se exiketomo.
11 Ritonõpo Jesemy, õmihpyry omipona exiko,
yyrypyry tõ ikorokako, tuhke toehse exiryke!
12 Ritonõpo enetupuhnanõ tosẽkõme
ipoe tuaro exĩko mã toto
tosemarykõ poko zae toehtohkõme.
13 Kure rokẽ osesarĩko mã toto osa kurã po,
ipoenõkõ roropa moro nono kurã esẽme exĩko mã toto.
14 Ritonõpo Kuesẽkõ, osepeme mana
Tosẽkõme enetupuhnanõ maro.
Toto amorepãko mana tõmihpyry poko,
tynyripohpyry poko eya xine.
15 Ritonõpo wino tahxime enẽko ase,
ypynanohnõko mana popyra ehtoh winoino.
16 Ritonõpo, kueneko; ypyno exiko,
toiroro jexiryke towomaneke pyra roropa jexiryke!
17 Torẽtyke jehtoh ikorokako ukurohtao,
kypynanohko popyra ehtoh winoino emero porehme.
18 Jetuarimatoh eneko, sam katoh ya roropa,
yyrypyry tõ ikorokako emero porehme.
19 Jepetõkara eneko tuhke toto exiry waro oehtohme;
yzehno toto ehtoh eneko roropa.
20 Kuewomako, kypynanohko roropa;
yporemãkapopyra exiko jyhxiroryino.
Oya oehnõko ase josewomapotohme.
21 Emese kure oehtoh enetuputyryke ya
kuewomako ajohpe pyra jexiryke,
zae ehtoh se jexiryke.
22 Ritonõpo, opoetory tõ Izyraeu tõ ipynanohko
popyra ehtoh wino emero porehme.