34
Kure Ritonõpo ehtoh poko
Tuisa Apimereke ẽpataka Tawi ahtao rowohpã samo
1 “Kure mase, Ritonõpo Jesemy,” kakehpyra ase;
Oeahmary poko kohmãnõko ase.
2 Eahmãko ase inyrityã kurã pokoino.
Ah taosanumasã moro poko netã toto, atãkyematohme!
3 Oximaro imehxo Ritonõpo ehtoh sekarotone
imehnomo a; oximõme Kuesẽkõ seahmatone!
4 Tõturuse ywy Kuesẽkomo a jakorehmatohme,
mame tozuhse ywy eya;
typynanohse ywy joserehtopõpyry tõ poe.
5 Typynanohnekomo a eramaketõ atãkyemãko mã
toto; jũme atasamara exĩko mã toto.
6 Takorehmaneke pyra jahtao tykohtase ywy;
totase Ritonõpo a, mame typynanohse ywy eya
yyryhmatoh tonõ poe emero.
7 Ritonõpo nenyokyhpyry osesarĩko mana
aomipona exiketõ zomye, toto ewomãko mã
ynororo toto onyryhmara imehnõ ehtohme.
8 Anusasame Ritonõpo Kuesẽkõ ehtoh
ikuhko tuaro oehtohme kure aexiry poko.
Tãkye mã mokaro, imaro osewomaketomo.
9 Imehxo Kuesẽkõ enetupuhnanõ,
aomiry omipona ehtoko, emitapãpyra mã toto,
aomiry omipona exiketomo!
10 Reão tõ omise exĩko, emitapãnõko mã toto,
yrome Kuesẽkõ omiry omipona
exiketõ mã emitapãpyra mana.
11 Osehtoko, jepe tõ poetohti, kuetatoko ke,
ãmorepatorỹko ase kure Ritonõpo Kuesẽkõ ritoh poko oya xine.
12 Oseahmary se hmatou isene ehtoh poko?
Okynahxo isene oehtohkõ se hmatou,
tãkye roropa oehtohkõme?
13 Ahtao omi xihpyry ke oturupyra ehtoko,
ajohpe pyra ehtoko roropa.
14 Popyra ehtoh irumekatoko,
zae ehtoh poko oehtohkõme;
osepeme ehtoko kure rokẽ oehtohkõme oximaro.
15 Zae ehtoh poko exiketõ pyno Kuesẽkõ mana,
aomirykõ etãko mana ekaroporyhtao eya xine.
16 Yrome popyra ehtoh poko exiketõ
akorekehkãko mana; naeroro toorihse toto ahtao axĩ toto poko wenikehnõko mã toto.
17 “Kuakorehmako, Jesemy!” tykohmase ahtao
zae ehtoh poko exiketomo a, etãko Ritonõpo mana,
toto pynanohnõko mana aetuarimatohkõ wino.
18 Sekese pyra exiketõ wino moe pyra Kuesẽkõ mana, atasamaketõ pynanohnõko mana.
19 Zae ehtoh poko exiketõ etuarimãko roropa mana, yrome morara toehse ahtao toto
pynanohnõko Kuesẽkõ mana.
20 Toto ewomãko mana, ipunaka;
jehpyry onyhmopyra exĩko mana emero porehme.
21 Popyra ehtoh poko exiketõ orihnõko mã toto
tynyrityã xihpyry pokoino.
Kurãkõ zehno exiketõ mã tuãnohsẽme exĩko mã toto.
22 Typoetory tõ pynanohnõko Kuesẽkõ mana;
Eya ytoketõ osewomapose,
mokaro pynanohnõko mana.