40
Eremiatoh Ritonõpo eahmaryme
Sero saumu tymerose Tawi a.
1 Eraximase, atarypopyra exiase Kuesẽkõ
eraximary poko, jakorehmatoh eya eraximase.
Mame ya toeramase ynororo yxitary etatohme,
jomiry totase eya.
2 Janymyase oramã xihpyry ae,
ikurepato tahxikurẽ poe, purapuramã orihmatõ poe.
Topu jamihmã pona jaroase, jewomatohme.
3 Jamorepase eremiatoh tyrisenã poko,
eremiatohme Kuesẽkõ kurã eahmatoh poko.
Moro eneryke tyya xine tuhkãkõ enetupuhnõko mana,
Kuesẽkõ enetupuhnõko mã toto tosẽkõme.
4 Tãkye exiketõ mokaro Kuesẽkõ enetupuhnanomo,
eramara roropa mã toto
imehnõ neponãmarykõ pokona.
Oximõpyra roropa mã toto mokaro maro
imehnõ neponãmarykõ poko exiketõ maro.
5 Ritonõpo, yna Esemy, tuhke kurãkõ tyrise
oya yna akorehmatohme.
Apanõ pyra mana! Õsenetupuhtoh mã tuhke,
kure yna ritohme.
Emero õsenetupuhtoh kukuruhtao ya
tuhke exiry waro jehtohme ekuhpỹme mana.
6 Okyno tõ etapary ynanekaroryme ise pyra mase,
tiriiku tõkehko maro.
Okyno tõ zatyry apoto apõ po onekaropopyra mase
yna a yna rypyry korokatohme.
Yrome ypanary totapuruhmakase oya,
õmiry etatohme ya.
7 Naeroro kuezukuase: “Taro ase;
Õmiry ya tymerose nase pape pokona, onyripotyamo.
8 Õmihpyry omipona sehxo ase, Ritonõpo Jesemy!
Jamorepatopõpyry oya ukurohtao mana.”
9 Ritonõpo, opoetory tõ oximõmãkõ ẽpataka
õmiry kurã ekaroase yna pynanopyry poko oya.
Moro omi kurã onekarokehpyra ase, zuaro mase.
10 Õmiry kurã yna pynanopyry poko
ononẽpyra exiase.
Zae oehtoh poko yna akorehmatopõpyry
poko roropa oturuase.
Imoihmãkõ rãnao mynyhme pyra exiase amonohkara
oehtoh poko opoetory tõ poko,
toto pyno oehtoh poko, enara.
11 Ritonõpo, zuaro ase ypyno exikehpyra mase.
Ypyno oexiryke amonohkara roropa
oexiryke jũme jewomãko mase.
Oturutoh Ritonõpo a takorehmapotohme
(Saumu 70)
12 Tomyehmase ywy yyryhmatoh ke tuhke.
Ikuhpỹme mã toto.
Yyrypyry tõ pokoino otupĩko ywy tonurẽkara samo.
Jũsety motye jupuhpyry po yyrypyry tõ toehse tuhke, naeroro typoremãse ywy.
13 Ritonõpo Jesemy, kypynanohko!
Kuakorehmako seromaroro!
14 Jetapary se exiketõ iporemãkapoko,
tuaro pyra tyripoko toto.
Tãkye exiketõ jetuarimary poko iramapoko
ropa toto epatohme ropa aehxirotohkõme.
15 Ah ypoihtonanõ notupĩ toto;
Xẽ! Xẽ! kananomo typoremãkase toexirykõke.
16 Ah tãkye nexĩ toto emero oehketõ oya,
ah noseahmã toto.
“Ritonõpo rokẽ mã imehxo Kuesẽkomo,” nykã toto
mokaro tãkye exiketõ typynanopyrykõ poko.
17 Ywy ase jamihme pyra te, tytineruke pyra;
Ritonõpo axĩ ke osehko ya! Ypynanohneme mase,
Jesẽme mase. Axĩ ke kuakorehmako, Jesemy!