54
Kuewomako Ritonõpo
Tawi nymerohpyry, inekarohpyry eremiaketõ tuisary a.
1 Ritonõpo, kypynanohko ajamitunuru ke!
Kuanỹko jamihmehxo oexiryke.
2 Jotururu oya etako ke, Ritonõpo!
Otatõme exiko jomiry poko.
3 Ahno oehnõko, epyrypaketomo, etonatohme ymaro.
Orutua kõ zehnotokõ jetapary se mã toto.
Ritonõpo omipona pyra exiketõme mã toto.
4 Yrome Ritonõpo Jesẽ mã jakorehmaneme mana,
Jewomaneme roropa mana, zuaro ase.
5 Jepetõkara nyrihpyry popỹ ke
toto wãnohpory se ase Ritonõpo a.
Zae Ritonõpo mana, morara exiryke
toto enahkapõko mana.
6 Tãkye jexiryke ynekarory ekarõko ase
oya, Ritonõpo. “Kure mase,” ãko ase,
oeahmaryme, kure oexiryke.
7 Kypynanopyase popyra ehtoh wino emero,
jepetõkara poremãkatopõpyry tonese ya.