56
Ritonõpo ymaro mana
Tawi nymerohpyry, inekarohpyry eremiaketõ tuisary a.
1 Ritonõpo, ypyno exiko, osetapãko mã toto ymaro;
yyryhmakehpyra jepetõkara mana.
2 Japoijapoiry poko kohmãnõko mã toto,
tuhke mã mokaro osetapaketõ ymaro.
3 Enaromỹke jahtao oenetupuhnõko ase,
Ritonõpo Jamihmehxo Exikety.
4 Ritonõpo enetupuhnõko ase,
eahmãko roropa ase aomihpyry pokoino,
kymaro xine toexiry poko.
Enetuputyryke ya enaromyra exĩko ase.
Yyryhmasaromepyra ahno mana.
5 Jepetõkara jakorekehkary poko kohmãnõko mã toto,
josepekatyry se jahtao osenetupuhnõko mã toto
popyra jyriry poko.
6 Oximõnõko mã toto,
otonẽnõko ynyriry enetohme tyya xine,
jetapatoh eraximãko mã toto.
7 Ritonõpo, mokaro zuãnohko popyra
toto ehtamitume; zehno oehtoh enepoko, toto iporemãkapoko!
8 Yronymyryme torẽtyke jehtoh waro mase,
yxity tukurãkase oya okyryry kutehi ao.
Onymeropyra mã kehko apapẽ pokona?
9 Okohmaryhtao ya jakorehmatohme,
jepetõkara epãko mã toto.
Ynara zuaro ase: Ritonõpo ymaro mana.
10 Ritonõpo omihpyry eahmãko ase;
Kuesẽkõ omihpyry.
11 Ritonõpo enetuputyryke ya enaromyra exĩko ase.
Yyryhmasaromepyra ahno mana.
12 Ritonõpo, jomihpyry ae ro ynekarory
ekarõko ase oya; “kure mase,” ãko ase ynekaroryme,
13 ynara exiryke: kypynanopyase orihsasaka jahtao, yporemãkapopyra mexiase.
Naeroro, Ritonõpo, oẽpataka ytoytõko ase,
saeremae ytõko ase isene jexiryke.