71
Tamuhpõme exikety oturutoh Ritonõpo a
1 Ritonõpo Jesemy, jewomaneme mase;
jũme yporemãkapopyra exiko, jehxiroryino.
2 Kuakorehmako, kuewomako zae oexiryke;
kuetako, kypynanohko roropa!
3 Ritonõpo, jesary jamihme exiko, topuimo samo,
tapyi topu risẽ samo, josewomatohme!
Jesary jamihme mase, topuimo; ytapyiny topu risẽme.
4 Ritonõpo Jesemy, kypynanohko
popyra exiketõ winoino.
Kypynanohko azahkuru exiketõ jamitunuru winoino,
jetapary se exiketõ winoino roropa!
5 Ritonõpo Jesemy, oenetupuhnõko ase;
poetome ro jahtao omoro tonetupuhse ya Jesẽme.
6 Moino ro oenetupuhkehpyra exiase;
jenurutopõpyry poe towomase ywy oya.
Jũme oeahmakehpyra ase.
7 Jenẽko imehnõ mana, tuhkãkomo,
osenuruhkãko mã toto, jewomatoh oya
jamihme toehse exiryke.
8 Oeahmary poko kohmãnõko ase;
saeremehxo oehtoh ekarõko ase imehnomo a.
9 Jurumekara exiko seromaroro,
tamuhpõme toehse jahtao.
Wenikehpyra exiko ypoko jamihme pyra toehse jahtao.
10 Jepetõkara jetapary se mã toto;
ykerekeremãko mã toto.
Atamorepãko mã toto joorihmapory poko tyya xine.
11 Ynara ãko mã toto: “Mokyro turumekase
Ritonõpo a; sekahmatone apoitohme kyya xine,
ipynanohne pyra exiryke.”
12 Ritonõpo, ameke pyra exiko ywino!
Kuakorehmako seromaroro, Jesemy!
13 Ynara se ase: typoremãkase toto exiry se ase,
tonahkase roropa mokaro
ymaro osetapary se exiketomo!
Ah mokaro yyryhmary se exiketõ aehxirohpyryme
nexĩ toto; ah ihxitapãtyãme nexĩ toto!
14 Oenetupuhkehpyra ase,
oeahmãko ase itamurumehxo!
15 Zae oehtoh ekarõko ase;
ypynanopyryke oya ekarory poko kohmãnõko ase,
josenetupuhtoh motyehxo moro ahtao ro.
16 Ritonõpo Jesemy, ajamitunuru poko oturũko ase;
zae oehtoh poko roropa,
anamonohpyra mase zae rokẽ oehtoh poko.
17 Moino poetome ro jahtao tamorepase ywy oya,
oturukehpyra ase seroae ro onyrityã kurã poko.
18 Seromaroro tamuhpõme ase, jũsety karimutume
toehse, jurumekara exiko, Ritonõpo!
Ymaro exiko ajamitunuru poko otururuhtao ahno a,
imehxo oehtoh roropa ekaroryhtao moxiamo a,
ipoenõkomo a ipakomotyamo a roropa.
19 Ritonõpo, zae oehtoh anamonohpyra mana,
kae exikety sã mana kapu poko.
Onyrityã imehxo mã kehko,
imepỹ pyra mana asã exikety.
20 Popyra ehtoh tonehpose oya ya,
jetuarimatoh roropa, yrome yjamitunuru
ekarõko ropa mase ya,
janỹnõko mase orihpyra jehtohme.
21 Tuisamehxo jyrĩko mase,
jemuhkehkapõko ropa mase.
22 Rue ke, haapa ke oeahmãko ase rahkene.
Zae oehtoh anamonohpyra exiryke
oeahmãko ase Ritonõpo, Jesemy!
Onetaryme eremiãko ase, haapa maro,
Kurãme exikety, Izyraeu tõ Esemy.
23 Eremiãko ase tãkye jexiryke,
rue etoryhtao oeahmaryme, eremiãko ase,
kohtãko yjamitunuru ke emero,
typynanohse jexiryke oya.
24 Zae oehtoh ekarory poko kohmãnõko ase,
yyryhmary se exiketõ typoremãkase exiryke,
tonahkase roropa toto exiryke oya.