73
Ritonõpo zae ehtopo
Asape nymerohpyry.
1 Ajohpe pyra, kure Ritonõpo mana Izyraeu tomo a,
kure mana kure ehtoh poko exiketomo a
ikurohtao xine.
2-3 Yrome tymõkomokehxo popyra exiketõ
tonese ahtao ya, epyrypaketõ roropa,
amonopyĩse exiase Ritonõpo enetuputyry poko;
axĩtao rokẽ tuenikehse ywy kure Ritonõpo ehtoh poko,
mokaro zumoxike toehse jexiryke.
4 Popyra exiketõ etuarimara mã toto;
jamihme mã toto tyrohsẽke pyra exiryke.
5 Sam kara mã toto imehnõ etuarimaketõ sã
pyra, popyra ehtoh oehpyra eya xine mana.
6 Naeroro, epyrypãko mã toto
osenao riry samo tomeporyme,
imehnõ ryhmãko mã toto upo amururu samo.
7 Tukurohtao xine popyra ehtoh poko rokẽ
osenetupuhnõko mã toto, osenetupuhkehpyra
mã toto imehnõ ryhmary poko.
8 Imehnõ eunohnõko mã toto, popyra ehtoh
poko omiãko mã toto.
Epyrypãko mã toto, osenetupuhnõko roropa
mã toto imehnõ rohmanohpory poko tyya xine.
9 Ritonõpo kapu ao kerekeremãko mã toto,
tuisame exiketõ sã imehnõ rohmanohpõko
mã toto taro nono po.
10 Morarame Ritonõpo poetory tõ roropa
toto omipona exĩko, zae toto ekarõko mã toto.
11 Ynara ãko mã toto:
“Ritonõpo zuaro pyra exĩko mana;
sero onenepyra mã Ritonõpo Imehxo Exikety.”
12 Popyra exiketõ ynara sã mã toto:
tymõkomoke itamurume mã toto,
mame itamurumehxo tytineruke exĩko mã toto.
13 Otarame toiparo rokẽ zae ehtoh poko exiase, yyrypyry poko pyra roropa exiase.
14 Ritonõpo, opoe sam kary poko
kohmãnõko ase.
Kokoro rokẽ ẽmepyry ae tuãnohse ywy oya.
15 “Otarame toiparo rokẽ zae ehtoh poko exiase,”
tykase jahtao, opoetory tõ ehtoh sã pyra jexiry.
16 Naeroro morohne poko enetuputyry tukuhse ya
yronymyryme repe. Yrome tupimehxo nexiase ya.
17 Mame toytose jahtao Atapyĩ Kurã taka,
tonetupuhse ya popyra exiketõ etyhpyry poko.
18 Mokaro rĩko mase serehmã pona,
toto emapõko mase aorihtoh pona.
19 Axĩ tonahkasẽme exĩko mã toto,
etyhpyrykõ popyra mana ipunaka.
20 Yrome, Ritonõpo, mokaro popyra exiketõ poko
wenikehnõko mase, tõsenehtopõpyry poko
tuenikehse ahno ehtoh sã typakase ropa ahtao.
21 Josenetupuhtoh itũ ahtao, sam tykase roropa
jahtao ukurohtao,
22 tuaro pyra exikety sã exiase onokyro samo;
onenetupuhpyra exiase.
23 Moro sã jahtao ro amaro ro ase,
jemary apoĩko mase.
24 Zae jarõko mase jamorepatoh ke oya.
Mame etyhpyryme tãkye rokẽ jarõko mase oesaka.
25 Kapu ao omoro rokẽ mase ymaro.
Amaro jexiryke oty se ro hano nono po?
Arypyra, tãkye rokẽ ase opoko.
26 Upũ jamihme pyra exĩko josenetupuhtoh roropa,
yrome Ritonõpo yjamitunurume mana,
ynoro se rokẽ ase tãkye jehtohme.
27 Orumekananõ orihnõko mã toto,
mokaro enahkapõko mase õmiry omipona pyra exiketomo.
28 Yrome ywy, tãkye rokẽ ase Ritonõpo maro jahtao!
Ritonõpo Jesẽ rĩko ase jesaryme jamihme;
imehnõ zurũko ase inyrityã kurã poko emero.