75
Ritonõpo, zae apiakaneme
Asape nymerohpyry, inekarohpyry eremiaketõ tuisary a.
1 “Kure mase,” ãko ynanase oya, Ritonõpo.
“Kure mase,” ãko ynanase ameke pyra oexiryke.
Imehxo oexiry poko oturũko ynanase,
onyrityã osenuruhkatoh kurã ekarõko ynanase.
2 Ritonõpo ynara ãko:
“Apiakatoh tymenekase ya, zae apiakãko ase.
3 Sero nono põkõ emero tykytyky karyhtao ro,
nono roropa tykytyky karyhtao,
apõ tõ kurãkãko ase tũpore aehtohme.
4 Popyra exiketomo a ynara ãko ase:
Imehnõ motye kure osekaropyra ehtoko;
5 orẽpyra oehtohkõ poko epyrypara ehtoko, ãko ase.”
6 Ahno wãnohtoh oehpyra mana xixi tũtatoh
wino te, xixi omõtoh wino roropa, inikahpoino te, ikurenaeino roropa.
7 Ritonõpo kuapiakatorỹko mana;
ynoro rokẽ zae pyra exiketõ apiakãko mana,
imehnõ iirypyryme pyra ekarõko mana.
8 Kasana nae Ritonõpo Kuesẽkõ emahpo eukuru
jehnahpyry ke pehme, zehno ehtoh ke.
Moro ekamõko mana, popyra exiketõ okurume,
ẽnõko mã toto emero porehme eukuru enahtoh pona.
9 Yrome ywy oturukehpyra ase Ritonõpo,
Jako Esẽ poko, eremiãko ase eahmaryme.
10 Popyra exiketõ jamitunuru enahkãko mana;
yrome Ritonõpo omipona exiketõ
jamihmehxo exĩko mã toto.