90
Ritonõpo ahno maro
Moeze oturutopõpyry
1 Ritonõpo, yna tapyime mase,
moino ro apitorymã poe tarona.
2 Ypy tõ onyripyra ro awahtao,
sero nono onyripyra roropa awahtao, xixi tõkehko,
apitorymã poe Ritonõpome mase,
jũme exikehpyra mase.
3 Ahno a ynara ãko mase:
“Eramatoko ropa, nonome ropa oehtohkõme,
oehtopõpyry sã apitoryme,” ãko mase.
Opoe nonome exĩko ropa mã toto.
4 Miume jeimamyry tyoro pyra mana
toiro ẽmepyry maro oya,
kokonie ehtopõpyry samo taropose ahtao;
enetoh koko sã roropa axĩ sã taropose ahtao.
5 Yna arõko mase tuna zueme ehtoh samo,
osenehtopõpo sã axĩtao rokẽ ynanase.
Ãtarykahmã sã ynanase, ẽmepyry exipitory samo,
6 ahtãko te, ekutãko, mame mõtahtao
aremãnõko mana, orihnõko ropa.
7 Tonahkasẽme ynanase yna zehno awahtao,
yna zetũ poko oserehnõko ynanase.
8 Yna rypyry tõ rĩko mase oẽpataka,
tokare pyra popyra yna ehtopõpyry enetohme
saeremã aka.
9 Mõtoino rokẽ yna ehtoh tonahkaposẽme exĩko
tuhke pyra yna jeimamyry ahtao ro
yna zehno oexiryke;
orihnõko ynanase puti puti katoh enatyry samo.
10 70me jeimamyry rokẽ aropõko ynanase
isene exiketõme, jamihmehxo exiketõ
otarame 80me aropõko toorihtohme,
yrome morara ahtao etaehnõko ynanase,
kure pyra exĩko roropa.
Okynã pyra orihnõko, osenepyra exĩko ropa ynanase.
11 Onoky tyehno oexiry jamitunuru waro nae?
Onoky enaromỹke toehse tyehno oehtoh pokoino?
12 Yna amorepako okynã pyra isene yna ehtoh
poko taro, tuaro yna ehtohme yna kurohtao.
13 Ritonõpo, opoetory tõ eneko ropa.
Otara ahtao yna zehno oehtoh enahnõko nae?
Yna poko oenupunako, opoenõme ynanase.
14 Yna autuhmako ẽmepyry ae,
yna poko oenupunaryke,
tuesapare yna ehtoh pona, yna eremiatohme,
atãkyemakehpyra yna ehtohme isene ro yna ahtao.
15 Tãkye yna tyripoko, itamurume tãkye yna ehtohme,
pake itamurume emynyhmatoh ekarotopõpyry sã yna a,
moro jeimamyry tõ ae toetuarimase yna ahtao.
16 Ajamitunuru enepoko yna a,
opoetoryme yna exiryke!
Onyrityã kurã enepoko yna poenomo a,
yna pakomotyamo a, enara.
17 Ritonõpo yna Esemy, kure rokẽ yna tyriko!
Yna akorehmako yna erohtoh poko,
emero tyriry se yna ehtoh poko kure rokẽ ehtohme.