14
Tawi ehtopõpyry Jerusarẽ po
(2 Samueu 5.11-12)
1 Morarame tuisa Hirão Tiro esẽ, Tawi akorehmary se toehse. Naeroro takorehmananõ taropose eya Tawi zuruse. Apupari zoko roropa taropose eya te, wewe poko erohketomo te, topu poko erohketomo, enara. Mame tapyi kurã tyrise eya xine Tawi tapyĩme.
2 Mame tuisame nymyry toehtoh poko tuaro toehse Tawi. Ritonõpo a tuisame tyrise typoetory Izyraeu tõ pyno toexiryke. Ritonõpo poe imehxo toehse Tawi Izyraeu tõ akorehmatohme.
Tawi poenõ tonuruse Jerusarẽ po
(2 Samueu 5.13-16; 1 Koronika 3.5-9)
3 Mame typytase ropa Tawi Jerusarẽ po. Mame tonuruse ropa imũkuru tomo, ẽxiry tomo, enara.
4 Ipoenõ esetykõ, enara:
Samua, Sopape, Natã, Saromão,
5 Ipaa, Erisua, Ereperete,
6 Noka, Nepeke, Japia,
7 Erisama, Peeriata, Eriperete, enara toh kynexine.
Pirixteu tõ poremãkatopõpyry
(2 Samueu 5.17-25)
8 Morarame Izyraeu tõ tuisary imehxo toehse Tawi ahtao, tuaro toehse pirixteu tomo. Morara exiryke tõximõse toto Tawi zupitohme, apoitohme repe. Yrome toto poko tuaro Tawi. Tyhtose ynororo oseporyse toto maro.
9 Mame pirixteu tõ toeporehkase jakanahmã Ahno konõto repaĩ pona morotõkõ erekohmapitose.
10 Naeroro tõturupose Tawi Ritonõpo a. Ynara tykase ynororo:
— Ytõko ha osetapase pirixteu tõ maro? Toto poremãkapõko mah? tykase.
— Ytoko, tykase Ritonõpo. — Pirixteu tõ ekarõko ase oya, toto poremãkãko matose, tykase.
11 Morara exiryke Paau-Perazĩ pona toytose Tawi. Moroto pirixteu tõ typoremãkase eya. Ynara tykase ynororo:
— Zueme tuna ahtao emero arõko mana. Moro sã ymaro kuepetõkara typoremãkase Ritonõpo a.
Naeroro moroto tosehpase Paau-Perazimme.
12 Moroto tynaxikahpyrykõ tyneponãmarykõ turumekase pirixteu tomo a. Mame tyahkapose toto Tawi a.
13 Mame pirixteu tõ tooehse ropa jakanahmã pona ropa osetapase.
14 Naeroro tõturupose ropa Tawi Ritonõpo a. Yrome ynara tykase ynororo eya:
— Osetapara ehtoko taroino. Mya ytotoko mokaro zomye wewe amoreira htaka. Mame moino wewe etonie osetapatoko.
15 Mame imoihmãkõ ytoytory sã etaryhtao oya wewe tõ zupuhpyry poko, ytotoko axiny. Toytose Ritonõpo osemazuhme mokaro pirixteu tõ poremãkapose.
16 Morara exiryke Ritonõpo omihpyry omipona toehse Tawi. Pirixteu tõ totapase eya Kipeão poe Kezea pona.
17 Morarame orẽpyra Tawi exiry poko totase pata põkomo a emero. Ritonõpo poe Tawi zuno toehse imehnõ nonory põkõ emero.