27
Soutatu tõ rohmanohpory Tuisa Tawi a
1 Ynara Izyraeu tõ tamuximãkõ kynexine, oxiekyry tõ tuisary tomo, Tawi akorehmananõ roropa soutatu tõ rohmanohpory poko. Nuno ae ro imehnõ oximõmãkõ, 24 miumãkõ tooehse erohse tutuisarykõ poetoryme, moro nuno punero.
2-3 Ynara typoetory tõ rohmanohpõkõ kynexine tynunory ae:
Nuno apitorymã po: Jasopeão, Zapitieu mũkuru. Pereze ekyryme kynexine ynororo Juta tõ ekyryme.
4 Nuno 2mã po: Totai, Aoi parỹpyry. Mikirote kynexine mokyro akorehmaneme tuisame aexiry poko.
5 Nuno 3mã po: Penaia, Ritonõpo maro oturukety Joiata mũkuru.
6 Penaia kynexine “30mãkõ imehxo exiketõ” tuisaryme, mame imũkuru Amizapate imyakãme toehse mokaro tuisaryme.
7 Nuno 4mã po: Asaeu, Joape akorony. Imeĩpo imũkuru Zepatia imyakãme toehse.
8 Nuno 5mã po: Samute, Isara parỹpyryme, kynexine.
9 Nuno 6mã po: Ira, Ike mũkuru, Tekoa pono kynexine.
10 Nuno 7mã po: Here, Eparaĩ tõ poe, Perõ pono kynexine.
11 Nuno 8mã po: Xipekai, Husa pono kynexine, Zera ekyryme, Juta tõ poe.
12 Nuno 9mã po: Apieze, Anatote pono, Pẽjamĩ nonory po kynexine.
13 Nuno 10mã po: Maarai, Netopa patary pono, Zera ekyryme kynexine.
14 Nuno 11mã po: Penaia, Piratõ pono, Eparaĩ nonory po kynexine.
15 Nuno 12mã po: Heutai, Netopa pono, Otonieu parỹpyryme kynexine.
Izyraeu tõ tuisary oxiekyry tomo
16-22 Morarame Izyraeu tõ oxiekyry tõ tuisary tõ ynara kynexine:
Rupẽ tõ tuisary Erieze, Zikiri mũkuru.
Ximeão tõ tuisary Sepatia, Maaka mũkuru.
Rewi tõ tuisary Hasapia, Kemueu mũkuru.
Arão tõ tuisary Zatoke.
Juta tõ tuisary Eriu, tuisa Tawi rui.
Isakaa tõ tuisary Oniri, Mikaeu mũkuru.
Zepurõ tõ tuisary Iximaia, Opatia mũkuru.
Napatari tõ tuisary Jerimote, Azarieu mũkuru.
Eparaĩ tõ tuisary Ozeja, Azazia mũkuru.
Manase xixi omõtoh wino tõ tuisary Joeu, Petaia mũkuru.
Manase xixi tũtatoh wino tõ tuisary Ito, Zakaria mũkuru.
Pẽjamĩ tõ tuisary Ito, Zakaria mũkuru.
Tã tõ tuisary Azareu, Jeroão mũkuru.
23 Orutua kõ onukuhpyra tuisa Tawi kynexine 20me jeimamyry pyra ro toto ahtao, ynara tykase Ritonõpo exiryke: “Izyraeu tõ emãkapõko ase tuhke toto ehtohme, ikuhpỹme, xirikuato samo kapu poko.”
24 Tukuhpitose toto Joape, Zeruia mũkuru a. Yrome otyhkara tokurehse ynororo. Izyraeu tõ tuãnohse Ritonõpo a exiryke toto kukuru se aexirykõke. Naeroro ikuhtopõpyry atapona onymeropyra tokurehse tuisa Tawi papẽ pokona.
Tuisa Tawi kyryry tõ poko erohketõ tuisary tomo
25 Mokaro tuisa Tawi kyryry poko erohketõ tuisary tõ ynara kynexine:
Imõkomory kurãkaneme tapyi jamihmã tao: Azamawete, Atieu mũkuru.
Imõkomory kurãkaneme tupito tõ po te, pata tõ po te, ahno esao te, jamihme ehtoh tao, enara: Jonata, Uzia mũkuru.
26 Erohketõ tupito tõ poko: Ezeri, Kerupe mũkuru.
27 Tupito tõ po uwa tõkehko arykary poko: Ximei, Rama pono.
Uwa eukuru riry poko, ikurãkary poko roropa: Zapiti, Sepã pono.
28 Oriwera tõkehko poko te, wikeira tõkehko roropa Juta tõ nonory po: Paau-Hanã, Ketera pono.
Azeite poko: Joaxi.
29 Pui tõ poko ona Sarõ po: Xitarai, Sarõ pono.
Pui tõ poko jakanahmã po: Sapate, Atarai mũkuru.
30 Kameru tõ poko: Opiu, iximaeume exikety.
Jumẽtu tõ poko: Jetia, Meronote pono.
31 Kaneru tõ poko te, kaneru tõ maro, poti tõ maro: Jazize, hakaritame exikety.
Tuisa Tawi akorehmananomo zae ehtoh waro ehtohme
32 Jonata, tuisa Tawi ory emese kure kynexine, tãtamorepary poko te, imehnõ amorepary poko, enara. Tuisa Tawi poenõ amorepaneme kynexine ynororo, Jeieu, Hakamoni mũkuru maro.
33 Aitopeu tuisa akorehmaneme kynexine zae ehtoh waro ehtohme. Husai, arakitame roropa tuisa epeme kynexine, akorehmaneme roropa zae ehtoh waro ehtohme.
34 Mame Aitopeu toorihse ahtao, Apiataa te, Jeoiata roropa Penaia mũkuru, tuisa akorehmananõme toehse zae ehtoh waro ehtohme. Joape kynexine soutatu tõ tuisary imehxo exikety.