4
Ritonõpo omihpyry ẽ arotopõpyry pirixteu tomo a
1 Moromeĩpo Izyraeu tõ toytose osetapase pirixteu tõ maro. Tõsesarise Izyraeu tõ soutatu tomo Epeneze po. Morararo pirixteu soutatu tõ tõsesarise Apeka po nexiase toto.
2 Mame tõsetapase toto pirixteu soutatu tõ Izyraeu tõ maro. Mame Izyraeu tõ typoremãkase pirixteu tomo a. Izyraeu tõ soutatu tõ totapase pirixteu tomo a 4 miume.
3 Toytose ropa toto ahtao tynyhtohkõ pona, ynara tykase Izyraeu tõ esẽ tomo:
— Otara toehse kymarokomo seroae? Ritonõpo a typoremãkapose kymarokomo pirixteu tomo a. Ritonõpo omihpyry ẽ senehtone Ritonõpo maro Oturutoh tae Xiro poe. Mame kymaro xine arõko sytatose, kypynanohtohkõme, kuetapara xine kyzehnotokõ ehtohme, tykase toto.
4 Mame orutua kõ taropose eya xine Xiro pona Ritonõpo omihpyry ẽ enehtohme, Ritonõpo maro Oturutoh tae. Moro kaxo po Ritonõpo Imehxo Exikety apõ enetupuhtoh nexiase asakoro taporihke rãnao. Mame Eri poenõ Hopini, Pineia maro tooehse kaxo enehnanõ maro.
5 Mame pore, toeporehkase Ritonõpo omihpyry ẽ ahtao kui tykase toto myatokohxo, nono tykytyky tykase samo.
6 Mame moro totase tyya xine ahtao, ynara tykase pirixteu tomo:
— Etatoko ke, kohkohtãko toto Izyraeu tõ esao. Otara toehse otarame? tykase toto.
Mame zuaro toehse toto ahtao Ritonõpo omihpyry ẽ toeporehkase exiry poko,
7 tõserehse pirixteu tomo yronymyryme. Ynara tykase toto:
— Toiro ritõ tooehse Izyraeu tõ esaka, myhene. Sero panõ onenepitopyra sytatose, tykase toto.
8 — To! Onokyhxo nah kypynanohtorỹko mokaro neponãmarykõ a kuenahkarykohtao? Mokarohne mokaro, tyrohsẽ konõto tokarose Ejitu põkomo a, ona po, ahno esao pyra.
9 Morara exiryke orẽpyra sehtone pirixteu tomo! Jamihme sehtone kyporemãkapopyra xine Izyraeu tõ ehtohme, toto namotome kuexirykõ ino, kynamotokõme mokaro ehtopõpyry samo. Orẽpyra sehtone tuãtase exiketõme kuexirykõke! tykase pirixteu tomo oseya.
10 Morara karyke orẽpyra tõsetapase pirixteu tomo. Izyraeu tõ typoremãkase eya xine, toepase toto tururume tosaka xine. Tuhke totapase, 30 miume Izyraeu tõ totapase pirixteu tomo a.
11 Ritonõpo omihpyry ẽ roropa tarose pirixteu tomo a. Eri poenõ roropa totapase Hopini, Pineia, enara.
Eri orihtopõpyry
12 Mame moro ẽmepyry ae ro orutua toytose, Pẽjamĩ parỹpyry. Tururume toytose myaro Xiro pona ekãtose. Tupõ tyxihxihkase eya te, nono ke roropa toeputohmase roropa toemynyhmaryke.
13 Mame Eri nexiase typorohse epehtoh po osema pũto eraximãko. Torẽtyke nexiase, Ritonõpo omihpyry ẽ tarose exiryke ipoenomo a etonatoh pona. Mame mokyro tururume aepyhpyry omiry etaryke pata põkomo a tõserehse toto nexiase, kui kui tykase toto, tyxitaryme.
14 Moro kui kui kary etaryke tyya tõturupose Eri:
— Otara toehse? tykase.
Mame axĩ toytose omi arone Eri a.
15 Tamuhpõme Eri nexiase 98 jeimamyryme, tonukehse roropa nexiase.
16 Ynara tykase mokyro Eri a:
— Oehno seromaroro moino etonatoh poe. Seroae ro epano, tykase.
17 — Ỹ, otara toehse, aimo? tykase Eri, tõturupose.
— Izyraeu tõ typoremãkase pirixteu tomo a. Tuhkãkõ toorihse. Omũkuru tõ roropa Hopini, Pineia maro toorihse toto. Ritonõpo Omiry ẽ tarose pirixteu tomo a roropa.
18 Mame: “Ritonõpo omihpyry ẽ tarose,” kary etaryke tyya, Eri toepukase epehtoh poe, moroto, pata omõtoh pũto. Mame ipymyry toetohkase omoxĩ aexiryke. Morara exiryke toorihse ynororo.
40me jeimamyry taropose eya Izyraeu akorehmaneme, zae ehtoh waro toto ehtohme.
Pineia pyty orihtopõpyry
19 Moroto nexiase Eri pary eny, Pineia pytỹpyry. Poetoẽme nexiase ynororo, enurusasaka roropa. Mame zuaro toehse tahtao Ritonõpo omihpyry ẽ arotopõpyry poko pirixteu tomo a te, tynio orihtopõpyry poko te, tymeretamuru orihtopõpyry poko roropa, jetũ toehse, tonuruse roropa ynororo.
20 Orihnõko nexiase, yrome ynara tykase poeto enurumaponanomo eya:
— Poremãpyra exiko! Omũkuru nenuruno, tykase toto eya repe.
Yrome onezuhpyra, onetara roropa nexiase ynororo.
21 Mame tumũkuru tosehpase Ikapome, ynara karyke: “Izyraeu tyjamihkehse, turumekase Ritonõpo a,” tykase, Ritonõpo omihpyry ẽ tarose exiryke te, imeretamuru toorihse exiryke roropa te, inio roropa toorihse exiryke, enara.
22 Ynara tykase rokẽ ynororo:
— Izyraeu turumekase Ritonõpo a. Aomihpyry ẽ tarose exiryke, tykase.