4
Orutua
1 Enekure mase, kuku, jenuru zamaro mase!
Oryxime mase ipunaka!
Oenuru tõ zemime mã kehko ypyno oehtoh ke kamisa mykae!
Oũsety mirimirime potu mana, poti tõ imoihmãkõ samo,
toto yhtoryhtao ypy tõ poe Kireate po.
2 Ozery karimutume mana, kaneru tõ samo ihpoty tysahkase ahtao, ikurikasenãme toto ahtao.
Moroto emero tosao mã toto,
kure potu mã toto.
3 Opotapihpyry kamirarame mana,
õtary enekure mana,
oẽmyty roropa kamirarame mana,
zemime mana kamisa notao.
4 Opymyry enekure mana, tuisa Tawi namohpyry kaetokohxo exikety samo,
amiamime mana. Oesenao miume osewomatoh tyhwyme mana,
soutatu tõ jamihmãkõ mõkomory sã osetaparyhtao.
5 Amanatyry asakoro kapau poenõ kamarame exiketõ sã mana,
aotukurukohtao onahpoty ekuru tõ rãnao.
6 Ytõko ase ypy mira pona, ypy ixtaratu tõ pona,
ẽmehpyra ro ahtao saereme ehtoh exipitoryhtao.
7 Oryxime mase, kuku, jenuru zamaro mase!
Enekure mase ipunaka!
8 Eropa ymaro, kuku, ypytyme exikety, ypy tõ Ripano poe.
Oyhtoko ymaro ypy Amana poe, ypy Senia poe, ypy Heremõ poe roropa.
Moroto reão tõ esary kaikuxi tamuru tõ esary roropa.
9 Kuku, opyno ase ipunaka, toiro jeneryhtao oya
okyryry osenao tonese ahtao ya jeano tomatonanohse oya,
opyno toehse ywy yronymyryme.
10 Kure kuhse ya ypyno oehtoh mana, kuku, ynymenekahpyry ypytyme!
Ypyno oexiry kurehxo mana eukuru jehnahpyry motye.
Typoxine oehtoh kurehxo mana, imepỹ ixtaratu motye.
11 Opotapihpyry anusasame mana ano zeni samo.
Onuru mana suhsu maro ano zeni zoximahpyry samo.
Oupony typoxine mana ypy Ripano typoxine ehtoh samo.
12 Kuku, tupito arykahpyry sã mase,
tuna kurã enatyry maro apuruhpyry sã roropa mase.
13 Moroto otupi po sã otyro kure ahtãko mana;
kure eperytãko roropa mana romã tõkehko, hena te, naratu roropa,
14 asaparão nae, kanera te, jasamĩ ezuezumano,
emero rokẽ typoxine exiketomo, ixtaratu maro, mira te, aroe te, imehnõ otyro roropa typoxine exiketomo.
15 Tuna enatyryme mase utupi po, tuna kurano, iporiryme tururume yhtõko ypy Ripano poe.
Nohpo
16 Owõko tyryrykane inikahpozakoxi!
Osehko tyryrykane ikurenae!
Tyryry kaxiko utupi pona typoxine osa ehtohme porehme.
Ah ypyno exikety noehno tutupi pona, epery kurã menekatohme, tynapyryme, enahtohme tyya.