10
Izyraeu tõ pynanohnõko Ritonõpo mana
1 Konopo ekaropoko Ritonõpo a eina oehpyra ro ahtao. Ritonõpo mokyro konopo enehpone, akurũ tõ maro, otyro ahtatohme tonahsẽ nae ahno emero ehtohme.
2 Toiparo rokẽ ekaropõko matose oneponãmarykomo a, joroko tõ poe urutõ komo a roropa, ajohpe rokẽ mã toto, enekunohnõko rokẽ mã toto. Osenehtoh poko amorepananõ ajohpe rokẽ mã toto. Omiãko mã toto emuhkehkananõ sã repe, yrome aomiry anakorehmara mana. Morara exiryke ahno etuarimãko mã toto, xiaxiake ytõko mã toto kaneru tõ samo tosẽke pyra ahtao.
3 Ynara ãko Ritonõpo mana:
— Tohne ase imeimehnõ nonory põkõ tuisary tõ poko ypoetory tõ tuisaryme toehse toto ahtao. Mokaro wãnohnõko ase yronymyryme. Juta tõ ypoetoryme mã toto; ywy, Ritonõpo Jamihmehxo Exikety, toto pynanohnõko ase. Mokaro rĩko ase jekyme kawaru osetapakety jamihmã samo, orẽpyra toto ehtohme.
4 Juta tõ poe toto tuisary tõ emero oehnõko mana, tuisa konõto, kowenatu tomo, soutatu tõ esẽ tomo, enara.
5 Oximõme orẽpyra exĩko mã toto soutatu tõ samo topetõkara tũtũmãko, ikurepato htaka, osema tao. Osetapãko mã toto, ywy Ritonõpo, imaro xine jexiryke, topetõkara poremãkãko mã toto kawaru po toto ahtao ro.
6 Ynara ãko Ritonõpo Oesẽkõ mana:
“Jamihme Juta tõ tyripõko ase.
Izyraeu tõ pynanohnõko ase.
Toto pyno jexiryke toto enehnõko ropa ase imehnõ nonory tõ poe,
imehnõ namotome toto ehtoh poe.
Ymaro osepeme exĩko ropa mã toto,
toto onurumekapitopyra jehtopõpyry samo,
Ritonõpome jexiryke toto Esẽme.
Toto ezuhnõko ase aotururukohtao ya.
7 Izyraeu tõ orutua kõ jamihme exĩko mã toto,
soutatu tõ samo,
tãkye exĩko mã toto eukuru ẽnanõ samo.
Moro ekarory etãko ipoenõ mana,
ipakomotyã roropa,
mame tãkye exĩko mã toto.
Atãkyemãko mã toto ywy,
Ritonõpo, nyrihpyry poko.
8 “Ypoetory tõ kohmãko ase,
oximõme toto enehpõko ase.
Toto enehnõko ropa ase toto nonory pona ropa.
Mame emãnõko ropa mã toto tuhkehxo ehtohme pake toto ehtopõpyry samo.
9 Sapararahme toto aropoase mya imehnõ nonory pona.
Yrome morara ahtao ro ypoko wenikehpyra toh nexiase.
Isene ro exĩko mã toto ipoenõkõ maro.
Oehnõko ropa mã toto tynonorykõ pona ropa.
10 Ejitu poe toto enehpõko ropa ase, Axiria poe roropa.
Toto arõko ase Kireate nonory pona, Ripano pona roropa.
Tuhkehxo exĩko mã toto,
osa mokaro emero pune pyra exĩko mana.
11 Tuna konõto Tahpiremã akuotyryhtao oya xine,
ywy, Ritonõpo, pohkane tõ mynyhpãkapõko ase.
Tuna Niro zueme ehtoh anorymapõko ase.
Axirio tõ epyrypakehnanohpõko ase.
Ejitu jamitunuru enahkapõko ase.
12 Ypoetory tõ jamihtanohpõko ase,
mame yjamitunuru ke isene exĩko mã toto jomipona.
Ywy Ritonõpo oturuno.”