5
Enepotoh 6mano: pape amẽsẽ kae ytokety
1 Mame imepỹ enepotoh enease. Pape enease tymerose exikety amẽsẽ kae sã ytõko.
2 Mame Ritonõpo nenyokyhpyry ymaro oturukety tõturupose ya. Ynara tykase:
— Oty enẽko mah? tykase.
— Arypyra, tykase ywy. Pape rokẽ enẽko ano, tymerose exikety, amẽsẽ kae sã ytõko; mosa exiry 9 meturume, ipuroroje exiry 4,5 meturume.
3 Ynara tamorepase ywy Ritonõpo nenyokyhpyry a:
— Sero pape pokona popyra ehtoh tymerose popyra exiketõ wãnohtohme sero nonory po porehme. Seino tymerose omato tõ wãnohtoh poko, taroposẽme exĩko mã toto tynonorykõ poe; moino tymerose mana ajohpe exiketõ poko, taroposẽme exĩko mã toto emero imehnõ enekunohnanomo Ritonõpo neneryme.
4 Tõmiry etapõko Ritonõpo Jamihmehxo Exikety mana moro popyra ehtoh aropõko mana omato tõ tapyĩ taka omõtohme te, ajohpe exiketõ tapyĩ taka roropa. Moroto exĩko moro tapyi tõ tao tapyi enahkatoh pona; wewe itararany oxinomopyra exĩko mana, topu tõ roropa tonahkasẽme exĩko mã kehko.
Enepotoh 7mano: nohpo ruto ao
5 Mame Ritonõpo nenyokyhpyry ymaro oturukety toehse ropa oturupose:
— Eneko ke, ohpetu, oehnõko seromaroro!
6 — Otyh sehny? ase, ekaropoase.
Ynara tykase ynororo:
— Rutoimome mana, enetupuhpotohme sero nono põkõ rypyry poko.
7 Moro rutoimo totapure nexiase xũpu risemy. Moro apuru tanỹse eya xine, moro ao nohpo nexiase typorohse sokohme.
8 Ynara tykase Ritonõpo nenyokyhpyry:
— Mose nohpo popyra ehtoh enetupuhpotohme mana. Mame mokyro tupurohmase eya zopikoxi ruto ao apurutohme ropa.
9 Mame asakoro nohpo tõ enease taporihke sekonia aporiry samo. Kae toytose toto, tarose tyryrykane a. Toeporehkase toto, moro ruto tapoise eya xine arotohme tymaro xine kae samo.
10 Ekaropoase Ritonõpo nenyokyhpyry a:
— Aza moro ruto arõko toh nae?
11 Tozuhse ywy eya, ynara tykase:
— Papironia pona. Moroto tapyi amõko mã toto, moro taka moro ruto ritohme apõ pona eahmatohme.