11
Ukpa̱ u maku ma iyain ma aza a Masar
1 Gogo na Vuzavaguɗu u danai Musa, <<N kutuka̱ ta̱ ma̱dukpa̱ mo yoku u Firi'auna n uma a Masar. Ayin a nanlo, wi ta̱ a̱ kushuku ɗa̱ i laza. U ka̱sukpa̱ ɗa̱ baci i laza, wi ta̱ o kuloko ɗa̱ gbende-gbende.
2 Dana uma a Isaraila, ali n a̱ma̱ci dem, o folono aza a Masar a na i ida̱shi koɓolo e neke le ili i na a ya'in n azurufa n azanariya.>>
3 Ɗa Vuzavaguɗu u zuwai aza a Isaraila a̱ ciya̱i wishi e ekiye a aza a Masar. Musa feu n ka̱ci ka̱ ni u ciya̱i tsugbayin ka̱u e ekiye a aza gba̱ra̱-gba̱ra̱ a Firi'auna n aza a Masar a na a buwai dem.
4 Ɗa Musa u danai Firi'auna, <<Ili i na Vuzavaguɗu u danai i ɗaɗa na, kayin ke pece baci, mi ta̱ a̱ kuka̱ra̱'a̱ iɗika i Masar.
5 Maku ma iyain me le dem mi ta̱ a̱ kukuwa̱, a̱ gita̱ a maku ma Firi'auna, vuza na wi o tsugono, a kubana a maku ma iyain ma kagbashi ka maku ma vuka ma na ma yawai kiya. Ali m maku ma iyain mi ilikuzuwa i na a̱ gita̱i kumatsa dem.
6 Uma a Masar ra̱ka̱ i ta̱ a̱ kushika̱ n yoroli u la'a tsu na ka̱ta̱ a sa'wai kuya'an ba. Ili i nanlo yo kudoku ya̱ ta̱wa̱ kpamu ba.
7 Ama a̱ ka̱tsuma̱ ka aza a Isaraila meshe'e ma kuya'anka vuma ko manama wali ba. Ta lo i kuyeve a na Vuzavaguɗu wi a kinda aza a Isaraila kau n aza a Masar.
8 Anan taji a̱ nu a nampa ra̱ka̱ i ta̱ a̱ kuta̱wa̱ wa̱ va̱, ka̱ta̱ a̱ kuɗa̱nku mu a dana, <Wala! Laza n uma a̱ nu ra̱ka̱,> Ayin a nanlo, n yeve n laza.>> Ɗa Musa u ya'in wupa ka̱u, ɗa u ka̱sukpa̱i Firi'auna.
9 Ɗa Vuzavaguɗu u danai Musa, <<Firi'auna wa kupanaka wu ba, adama a na ili i mereve i va̱ i yimkpa n a̱bunda̱i a iɗika i Masar.>>
10 Musa n Haruna a ya'in ili i mereve i gbagba'in i nampa dem e kelime ka Firi'auna. Ama Vuzavaguɗu u zuwai Firi'auna u ya'in ugbamukaci. Firi'auna u ka̱sukpa̱ aza a Isaraila a laza a̱ ka̱sukpa̱ iɗika i ni ba.