23
Wila̱ adama a kuya'an ku ukuna u singai
1 <<Ka̱ta̱ vi ya'an utonu n kadanshi ka a'uwa ba, ka̱ta̱ kpamu vu ɓolongu una̱ n uma a gbani-gbani adama a na vu ushuku n kadanshi ka a'uwa ba.
2 Ka̱ta̱ vu ushuku kutono ka̱bunda̱i ka uma adama a na i ya'an ili i gbani-gbani ba. Vi baci kpamu e kuneke ngan a̱ ubuta̱ u kaya'inkafada, ka̱ta̱ vu saba'a kadanshi ka mayun adama a na vu tono i na ka̱bunda̱i ka cigai ba.
3 Ka̱ta̱ vu la'a n kuciga vuza vu unambi a̱ ubuta̱ u kadanshi ka afada a̱ ni ba.
4 <<Vu cina baci kanaka ko majaki ma vurala vu nu a kuciga kupuwa̱nka̱ yi, ɗika vu banka yi.
5 Ve ene baci majaki ma vuza na u iwain nu ma̱ yikpa̱i n ucanuku ali ɗa u tsugbai ni, ka̱ta̱ vu ka̱sukpa̱ ma'a ba. Vu bana vu ɓa̱nka̱ yi m ma'a.
6 <<Ka̱ta̱ vu saba'a ukuna u mayun a̱ ubuta̱ wa aza a unambi a̱ nu a̱ ubuta̱ wa afada ba.
7 Ya'an da'in n kadanshi ka nsata ma a'uwa, ka̱ta̱ vu una vuza na wi babu unushi ko vuza vu usuɓi ba. Adama a na mpa mi ta̱ a̱ kilukpa̱ vuza na u ya'in unushi u nanlo dem.
8 Ka̱ta̱ vi ya'an n kalya'a ba, adama a na kalya'a ka tsu zuwa wu ta̱ vi yimba̱na̱ vu kpa̱ɗa̱ kene ili i na yi derere mayin. Kalya'a ka tsu zuwa ta̱ vuma vu usuɓi u kpa̱ɗa̱ ku uta̱ka̱ ili i mayun e keteshe.
9 <<Ka̱ta̱ vu takacika komoci ba, adama a na a̱ɗa̱ a̱ ka̱ci ka̱ ɗa̱ i yeve ta̱ tsu na limoci yi, yi ishi ta̱ a̱ limoci a iɗika i Masar.
Wila̱ u ayin a kuvuka
10 <<A̱ya̱ a̱ ta̱li a ɗa va kuya'an avu a̱ kuca̱'a̱ kashina ka̱ nu n vi kya'i ili i na vi ca̱'i va,
11 ama a̱ ka̱ya̱ ke cindere vu ka̱sukpa̱ ubuta̱ wa wu uvuka. Ka̱ta̱ aza a unambi a̱ ka̱tsuma̱ ka̱ ɗa̱ a̱ ciya̱ feu ili i na a kulya'a punu. Ili i na baci tamkpamu i buwai nnama n kakamba n ciya̱ feu a takuma. Ta feu va kuya'an n kashina ki itacishi n kashina ka Zaitu ka̱ nu nannai.
12 <<Ayin a̱ ta̱li a ɗa va kuya'an ulinga, a kanna ke cindere ka ɗaɗa va kuvuka, adama a na anaka, ni njaki n nu a̱ ciya̱ feu a uvuka. Ka̱ta̱ muku ma agbashi a na a matsakai ɗa̱ n omoci a na i punu ida̱shi wa̱ ɗa̱ ele feu a ciya̱ a uvuka.
13 <<Zuwai atsuvu i pana mayin n ili i na n danai. Ka̱ta̱ i ɗeke ula a̱ a̱ma̱li o yoku ba, ka̱ta̱ kpamu yu ula le punu a̱ una̱ u ɗa̱ ba.
A̱ɗiva̱ a tatsu a̱ ka̱tsuma̱ ka̱ ka̱ya̱
14 <<Ka̱ya̱ lakam yi ta̱ a kuya'an ka̱ɗiva̱ ka nampa ali kutatsu, adama a na i neke mu tsugbayin.
15 I ya'an ka̱ɗiva̱ ka nampa ko boroji vu na vi n yisiti ba, i ta̱kuma boroji vu babu yisiti va ali ayin e cindere, tsu na n danai ɗa̱. I ya'an ka̱ɗiva̱ ka nampa a ayin a na i zuwai a̱ ka̱ya̱ lakam a̱ ka̱tsuma̱ ko wotoi u Abibu, adama a na a wotoi u nanlo u ɗaɗa yu uta̱i a iɗika i Masar. Ka̱ta̱ vuza u ta̱wa̱ wa̱ va̱ ekiye agaɗa ba.
16 I ya'ansa ka̱ɗiva̱ ka ayin a vukya'a, n ava'inka a iyain a̱ ica̱shi i kashina i ɗa̱. Ka̱ta̱ a uteku, i ciɓasa kpamu n ka̱ɗiva̱ ka libani i vutara a ayin a na baci i ɓolongushi ili i kashina i ɗa̱.
17 A̱ ka̱ya̱ dem mavali mi ta̱ a̱ kuta̱wa̱ a̱ ubuta̱ u Vuzavaguɗu Uba̱nga̱ri kutatsu.
18 <<Ka̱ta̱ i ya'anka mu alyuka a mpasa koɓolo n ili i na a ya'in n yisiti ba. Ka̱ta̱ feu i ka̱sukpa̱ ushuma punu a inyama ya alyuka, ya asa ali a kubana a usana ba.
19 <<Vu tuka̱ n ava'inka a na a la'i n kuga'an a ili i kashina i na i gita̱i kuge'we i nu a kpa'a ku Vuzavaguɗu Ka̱shile ka̱ nu.
<<Ka̱ta̱ kpamu vu su'wan maku ma maraɗika ma na mi a kapa mani ma̱ a̱na̱ku a̱ ni ba.
Kalingata ka kulapula uye adama a aza a Isaraila
20 <<La̱na̱, mpa n kusuku ta̱ kalingata kelime ka̱ nu adama a na wi indana wu a̱ ubuta̱ u na vi a nwalu dem, ciya̱ vi yawa m ma̱ta̱na̱ a̱ ubuta̱ u na n foɓusokoi nu.
21 Ka̱ta̱ vu zuwa atsuvu kpamu vu pana mayin n ili i na u kudana. Ka̱ta̱ i shilika̱ n kadanshi ka̱ ni ba, adama a na a̱yi wa kucinukpaka ɗa̱ n ugbamukaci u nanlo ba. Adama a na kula ku va̱ ki ta̱ punu wa̱ ni.
22 <<Vu panaka yi baci mayin ɗa vi ya'in i na n danai, mi ta̱ o kokpo vurala a̱ ubuta̱ wi irala i nu, mi ta̱ kpamu a ku'iwan aza a na a iwain nu.
23 <<Kalingata ka̱ va̱ ki ta̱ a kuwala kelime ka̱ ɗa̱, ka̱ta̱ u tono n a̱ɗa̱ u tuka̱ ɗa̱ a iɗika ya aza Amoriya, n aza a Hitiya, n aza a Periziya, n aza a Kana'ana n aza a Hiwiya n Jebusiya. Mi ta̱ a kuna le ra̱ka̱.
24 Ka̱ta̱ i kuɗa̱nku a̱ma̱li e le ko i cikpa le ba, ka̱ta̱ i tono ili i gbani-gbani i na i a kuya'an ba. I fa̱da̱ a̱ma̱li a ka̱ta̱ i ɓoso atali a na a tsu lyuka kpamu miri-miri.
25 I cikpa Vuzavaguɗu Ka̱shile ka̱ ɗa̱ koci, i ya'an baci nannai mi ta̱ a kuzuwaka ɗa̱ una̱singai wi ili kulya'a m mini. Mi ta̱ a kuraɗa iɓa̱lishi i na i kuta̱wa̱ wa̱ ɗa̱ dem.
26 Babu vuka vu na ka̱tsuma̱ ka̱ ni ka̱ kuta̱ a̱ ka̱tsuma̱ ka̱ ɗa̱, a̱ kuciya̱ punu kpamu madari a iɗika i ɗa̱ ba. Mi ta̱ a kuzuwa ɗa̱ i yongo n a̱ya̱ kau.
27 Mi ta̱ a̱ kusuku ili i na i kuneke wovon a iɗika i na i kureme dem kafu i yawa ɗe, ka̱ta̱ a̱ ripula̱. Mi ta̱ a kuzuwa irala i ɗa̱ ra̱ka̱ a kpatala ka̱ta̱ a suma.
28 Mi ta̱ a̱ kusuku itata e kelime ka̱ ɗa̱, adama a na i loko aza a Hiwiya n aza a Kana'ana n aza a Hitiya.
29 Ama a̱ ka̱ya̱ ke te ka'a n kuloko le ba, ta lo iɗika ya yo kokpo an agali, ka̱ta̱ nnama n kakamba ma n yimkpa ali n lya'a utsura u ɗa̱ ba.
30 Kenu-kenu ɗa mi o kuloko le, ali i yimkpa tsu na i kufuɗa ya lya'a utsura wi iɗika ya, ka̱ta̱ i ɗa yo okpo i ɗa̱.
31 Mi ta̱ a kuzuwa uteku wa u gita̱ a mala ma shili a kubana a mala ma aza a̱ Filisitiya̱, a kubana gaɗi vu meremune a kubana e kuyene ku Yufiretu. Mi ta̱ e kuneke ɗa̱ uma a na i ida̱shi a iɗika ya e ekiye a̱ ɗa̱, ka̱ta̱ i loko le punu kelime ka̱ ɗa̱.
32 Ka̱ta̱ i ya'an uzuwakpani n ele ko n a̱ma̱li e le ba.
33 Ka̱ta̱ i ka̱sukpa̱ a̱ da̱sa̱ngu punu a iɗika ya ba, i ka̱sukpa̱ baci ta na i ta̱ a kuzuwa ɗa̱ i ya'anka mu unushi. Adama a na i ta̱ a kuzuwa ɗa̱ i ya'anka a̱ma̱li e le tsugbashi, i ta̱ o kokpo kpamu an maza wa̱ ɗa̱.>>