1 Ɗa Vuzavaguɗu u danai Musa, <<Bana u Firi'auna vu dana yi ili i na Vuzavaguɗu u danai, <Ili i na Vuzavaguɗu Ka̱shile ka aza Ibirahi ka danai i ɗaɗa na, <<Ka̱sukpa̱ uma a̱ va̱ a laza adama a na a bana a cikpa mu.>> 2 Ama vi iwan baci kuka̱sukpa̱ le, ɗa vi lya'i kelime n kuka̱na̱ le, 3 Vuzavaguɗu wi ta̱ a̱ kusuku m ma̱dukpa̱ a̱ ubuta̱ wi ilikuzuwa i ɗa̱ i na i tsu guɓa, nraɗika, ni njaki, n odoku, n arakuma, n anaka koɓolo ni nkyon. 4 Ama Vuzavaguɗu wi ta̱ a kukanza kuzuwa ka aza a Isaraila ka̱ta̱ u ka̱sukpa̱ ka aza a Masar, adama a na ko kuzuwa ku te ka aza a Isaraila ki lo a̱ kukuwa̱ ba.> >> 5 Vuzavaguɗu u zuwai ayin ɗa u danai, <<Mkpa'a mi ta̱ a kuya'an ili i nampa punu a iɗika ya.>>

6 Ana kayin ka asai, ɗa ta na Vuzavaguɗu u ya'in nannai. Ɗa kuzuwa ka aza a Masar ra̱ka̱ ku kuwa̱i, ama ko winja u te u kuzuwa wa aza Isaraila u kuwa̱ ba. 7 Ɗa Firi'auna u zuwai uma adama a na o goɗumo, ɗa a cinai mayun ɗa, ko manama me te ma aza a Isaraila ma̱ kuwa̱ ba. Ama Firi'auna u buwa ta̱ n ugbamukaci, u iwain kuka̱sukpa̱ uma a a laza.

8 Ɗa Vuzavaguɗu u danai Musa n Haruna, <<Shatangi ekiye a̱ ɗa̱ n kokomo ka na ki lo e kenle, ka̱ta̱ Musa u bula̱ngu ka'a lo a̱ wunla̱i a̱ a̱shi a Firi'auna. 9 Kubuta̱ ku kokomo ka ki ta̱ a̱ kuka̱ra̱'a̱ a iɗika i Masar dem. Ayin a nanlo mɓa̱la̱ ma amici mi ta̱ a̱ kuka̱na̱ ikyamba i uma nu nnama dem, punu a iɗika i Masar.>>

10 Ɗa e kenuki kokomo e kenle ɗa a lazai a banai a̱ ubuta̱ u Firi'auna, ɗa Musa u vishangi kokomo ka a̱ wunla̱i e kelime ka Firi'auna, ɗa gogo lo amici a̱ ka̱na̱i yaba dem a̱ ubuta̱ wa ali nu nnama dem. 11 Ali n oboci a feu a fuɗa a shamgba kelime ka Musa ba, adama a na ele feu amici a̱ ka̱na̱ le ta̱ koɓolo n aza a Masar a na a buwai dem. 12 Ama ɗa Vuzavaguɗu u doku u zuwai Firi'auna u ya'in ugbamukaci ɗa u iwain kupanaka le, uteku tsu na Vuzavaguɗu u danai Musa ɗe.

13 Ɗa Vuzavaguɗu u danai Musa, <<Ɗa̱nga̱ mkpa'a n usana vu bana u Firi'auna vu dana yi, <Ili i na Vuzavaguɗu u danai i ɗaɗa na, <<Ka̱sukpa̱ uma a̱ va̱ a laza a bana a cikpa mu. 14 Ko kpamu n gogo na mi ta̱ a̱ kusu'uku wu m ma̱dukpa̱, avu n aza gba̱ra̱-gba̱ra̱ a̱ nu, n uma a̱ nu dem. Adama a na vi yeve babu vuza na wi tsu va̱ punu a aduniyan dem. 15 Mi ishi baci de m faba wu ɗe n uma a̱ nu m ma̱dukpa̱, vi ishi a kubuwa lo n wuma a aduniyan a nampa ba. 16 Ama n ka̱sukpa̱ wu ta̱ n wuma adama a na n yotsongu wu utsura u va̱. Ka̱ta̱ uma a sala kula ku va̱ aduniyan ra̱ka̱. 17 Ama ali n gogo na vu buwai a kucikpa ka̱ci ka̱ nu, ɗa vi iwain kuka̱sukpa̱ le a laza. 18 Mkpa'a nahannai mi ta̱ o kuyo'o mini ma atali ma wuya-wuya ma na ka̱ta̱ a sa'wai kuyo'o ba, ali n ayin a na a ya'in iɗika i Masar. 19 Dana uma o bonoko n ilikuzuwa i nu n ili i na vi ni ɗa pulai dem a kpa'a, adama a na vuza na baci ko manama ma na mi pulai ma na mini ma atali ma sa'wai mi ta̱ a̱ kukuwa̱.>> > >> 20 Aza a gba̱ra̱-gba̱ra̱ a Firi'auna o yoku a na i a kupana wovon wi ili i na Vuzavaguɗu u danai, ɗa a ya'in gogo'o o bonokoi agbashi e le n kuzuwa ku le asuvu a kpa'a. 21 Ama aza a na a̱ kpa̱ɗa̱i kukeɓece n kadanshi ka Vuzavaguɗu a̱ ka̱sukpa̱i kuzuwa ku le n agbashi e le feu pulai.

22 Ɗa Vuzavaguɗu u danai Musa, <<Ɗengusa̱ kukiye ku nu a kubana gaɗi adama a na mini ma atali ma̱ yikpa̱ u uma dem nu nnama n ica̱'a̱shi ya ashina a Masar.>> 23 Ɗa Musa u ɗengusa̱i kalangu ka̱ ni gaɗi, ɗa Vuzavaguɗu u ya'in ulaɗi u gbangam u na u tsu akana ali a̱ kuta̱wa̱ a iɗika, ɗa u lapai akpanga ɗa u yo'i mini ma atali a iɗika i Masar dem. 24 Mini ma atali n ulaɗi ka̱u nannai, u sa'wa kuya'an a iɗika i Masar ba. Nava ɗaɗa mini ma atali ma gbani-gbani ma na a sa'wai kuya'an a iɗika i Masar ali n ayin a na e yevei ubuta̱ u nanlo n kula Masar. 25 A iɗika i Masar dem mini ma atali ma̱ la̱nga̱sa̱i ili i na yi e keteshe ra̱ka̱, uma nu nnama dem. Ma̱ la̱nga̱sa̱i ica̱'a̱shi dem, ali mo koɗosoi nɗanga ra̱ka̱. 26 Ama ubuta̱ u na u kpa̱ɗa̱i kuyo'o mini ma atali ma koci u ɗaɗa Goshon, ubuta̱ u na aza a Isaraila i. 27 Ɗa Firi'auna u suki a bana e ɗeke Musa n Haruna, ɗa u danai, <<Gogo na n ya'an ta̱ unushi, Vuzavaguɗu mayun ɗa wi, ama mpa n uma a̱ va̱ ci n ukuna u mayun ba. 28 Tsu folono wu ta̱ folonoko tsu Vuzavaguɗu, akpanga m mini ma atali ma na Ka̱shile ka̱ su'uki tsu va ma yawa tsu ta̱. Mi ta̱ a̱ kuka̱sukpa̱ ɗa̱ i laza gogo na, yo kudoku ya shamgba na ba.>> 29 Ɗa Musa wu ushuki, <<Gogo na mu uta̱ baci pulai vi likuci mi ta̱ a̱ kuɗa̱ngusa̱ ekiye a̱ va̱ gaɗi n vasa. Ayin a na baci mini ma atali n akpanga a shamgbai vi ta̱ e kuyeve iɗika ya yi ta̱ ekiye a Vuzavaguɗu. 30 Ama n yeve ta̱ avu n aza gba̱ra̱-gba̱ra̱ a̱ nu ya kupana wovon u Ka̱shile Vuzavaguɗu ba.>> 31 A ayin a na lo falas* m bali† a̱ na̱mgba̱ ta̱ ra̱ka̱ adama a̱ mini ma atali ma, bali a̱ kupusa̱ falas tamkpamu a kuya'an a̱pa̱lu. 32 Ama alkama n ityawan i na̱mgba̱ ba adama a na ayin e kuge'we e le a yawa ba. 33 Ana Musa u ka̱sukpa̱i ubuta̱ u Firi'auna a pulai vi likuci ɗa u ɗengusa̱i ekiye a̱ ni gaɗi, ɗa u ka̱na̱i avasa u Vuzavaguɗu. Ɗaɗa mini ma atali n akpanga a shamgbai, ɗa mini ma̱ ka̱sukpa̱i kuyo'o a iɗika ya dem. 34 Ana Firi'auna we ene mini, m mini ma atali n akpanga a ma laza ta̱, ɗa u ya'in unushi kpamu. A̱yi n aza a̱ gba̱ra̱-gba̱ra̱ a̱ ni a kpanduki a̱ɗu e le. 35 Ɗa Firi'auna u doku u kpanduki ka̱ɗu ka̱ ni, ɗa u sa̱nka̱i aza a Isaraila ku laza, uteku u na Vuzavaguɗu u danai Musa ɗe.