8
Aza a Isaraila a̱ ka̱sukpa̱i uye u Ka̱shila̱
1 Zuwa kavana a una̱ u nu, tsu kajimba,
irala i ɗa̱ yi a̱ kucipa̱ a gaɗi vu uma a Vuzavaguɗu,
adama a na uma a sula ta̱ uzuwakpani u va̱,
ɗa a ya'ankai wila̱ uva̱ ugbamiwasuvu.
2 A̱shika̱i wa̱ a̱ va̱,
a kudana, <<Ka̱shila̱, a̱tsu aza a Isaraila tsu yeve wu ta̱.>>
3 Ama aza a Isaraila a iwan ta̱ ili i na yi i singai,
adama a nannai irala yi ta̱ a kuguva le.
4 A zuwai ngono, ama n wu ushuki uva̱ ba.
a zuwai aza e kelime ama ba n wu ushuki uva̱ ɗa ba.
a ya'ankai ka̱ci ke le a̱ma̱li n azurufa n azanariya e le,
na lo wo okpo le ta̱ ili i munuka.
5 Avu Samariya n iwan ta̱ ka̱ma̱li ke medendem ka nanlo, ka na vu ma'in.
Wupa uva̱ wi ta̱ a kaci ka̱ nu.
Ali wannai ɗa̱i vi a̱ kuka̱sukpa̱ kuya'an ili yu unata?
6 Ka̱ma̱li ka ka aza Isaraila ka'a,
keshe'wi ka'a ka ya'in ka'a.
ka̱ma̱li ka'a Ka̱shile ka ba.
ka̱ma̱li ka nanlo ki iyoci i medendem ma Samariya.
i ta̱ kuɓoso ka'a.
7 Ɗa uma a Samariya a̱ ca̱'i ili i gbani,
adama nannai i a kukya'a ili ba.
adama a na ilya i na yi kashani yi n aci ba,
yi a kumatsa muku ba.
ko i matsa baci, omoci a ɗa i a ku lya'i ɗa.
8 O soɗongi aza a Isaraila ra̱ka̱,
ama gogo na i ta̱ a̱ ka̱tsuma̱ ka uma,
tsu ili i gbani.
9 Adama a na a laza ta̱ a kubana wa aza Asuriya
tsu makparagi ma na mi a̱ ka̱ka̱ra̱sa̱ ende'in.
tsugono tsa aza a Isaraila a uɓon u gaɗi a tsupa ta̱ ikebe.
i kula̱nsa̱ we eri wa aza o yoku
10 Ko a na wo okpoi a tsupa ta̱ ikebe a uduniya,
Mi ta̱ o kudoku kuɓolongu le.
I ta̱ kpamu a̱ ku na̱mgba̱ ka̱tsuma̱,
adama atakaci o mogono ma gbayin.
11 <<A makyan ma na aza a Isaraila a uɓon u gaɗi i o kudoku kuma'a atali alyuka
adama alyuka a kutakpa ku unushi,
ta kpamu atali alyuka a nanlo okpoi ubuta̱ u kudoku kuya'an unushi.
12 Ko kuya'in ku ɗa baci n ɗanakai le wila̱ uva̱,
ama ayin tutu a ɗika ta̱ u ɗa ili i savu.
13 A tsu pana ta̱ uyo'o u kuneke alyuka adama a ku takuma inyama,
ama mpa Vuzavaguɗu n tsu pana uyo'o u le ba.
Vuzavaguɗu wi ta̱ a kuciɓa n ka gbani-gbani ke le.
mi ta̱ a kutakacika le adama unushi u le.
Mi ta̱ a kuzuwa le o kubono a Masar.
14 Aza a Isaraila a cinukpai n vuza na u ya'in le,
a ma'in i'uwa i gbagba'in,
Aza a Yahuda feu a ma'a ta̱ nshilya n likuci n a̱ bunda̱i.
Ama mi ta̱ a̱ ku suku n akina a̱ likuci ya,
ka̱ta̱ akina a o songu i'uwa yi ngono n le ma.>>