49
Kagbashi ka Vuzavaguɗu
1 Panakai mu, a̱ɗa̱ aza a̱ ka̱kina̱ ka mala,
panai kakuna ka nampa, a̱ɗa̱ na yi a̱ mpulu.
Vuzavaguɗu u ne'e mu ta̱ kula mpa punu bi'i a̱ ka̱tsuma̱,
u ɗeke ta̱ kula ku va̱ ayin a na mpa bi'i mereɓu.
2 Ɗa u bonokoi una̱ u va̱ tsu kotokobi ka alyu,
u sokongi mu a̱ kululu ku kukiye ku ni,
u gboroi mu tsu kaya
ɗa u foɓoi mu a majiki ma ni.
3 Ɗa u danai mu, <<Avu ɗa kagbashi ka̱ va̱,
Isaraila, wa̱ nu u ɗa n kuciya̱ tsugbayin.>>
4 Ama ɗa n danai, <<N ya'an ta̱ ulinga u gbani,
n la̱nga̱sa̱i utsura u va̱ gbani babu ili i yoku.
Ama n ya'an ta̱ i ɗa adama a Vuzavaguɗu,
katsupu ka̱ va̱ kpamu e ekiye a̱ Ka̱shile.
5 Ɗa gogo na Vuzavaguɗu u danai,
a̱yi na u ya'in mu ali mpa bi'i ka̱tsuma̱ adama a na mo okpo kagbashi ka̱ ni,
ciya̱ m bonoko n Yakubu wa̱ ni,
ka̱ta̱ aza a Isaraila o ɓolongu wa̱ ni.
Adama a na n ciya̱ ta̱ tsugbayin a̱ a̱shi a Vuzavaguɗu,
Ka̱shile ka̱ va̱ ka'a katsura ka̱ va̱,
6 ɗa u danai,
<<Avu kagbashi ka̱ va̱ ka'a vi koci ba, ka na ka̱ kuɗa̱ngusa̱ kumaci ku Yakubu,
ka̱ta̱ vu bonoko n uma a Isaraila a na a buwai.
Ama mi ta̱ kpamu a kuzuwa wu vo okpo kutashi ka aza ka̱yimbi,
adama a na wishi u va̱ u bana ali a uteku wa aduniyan.>>
7 Na ɗa ili i na Vuzavaguɗu u danai,
ka̱shibi ka aza a Isaraila n aza a ciɗa a̱ ni,
vuza na uma a iwain ɗa aduniyan kpamu o goyoi,
u vuza na wi kagbashi ko ngono,
<<Ngono mi ta̱ e kene wu ka̱ta̱ a̱ ɗa̱nga̱ kashani, e neke wu tsugbayin,
muku mu ngono mi ta̱ e kene wu ka̱ta̱ a̱ kuɗa̱nku wu a iɗika
adama a Vuzavaguɗu, vuza na wi n kasingai,
vuza ciɗa vi Isaraila a̱yi ɗa u zagbai nu.>>
Uboni wu muku mi Isaraila
8 Na ɗa ili i na Vuzavaguɗu u danai,
<<A ayin a kasingai mi ta̱ e kuneke ɗa̱ wu ushuki,
ka̱ta̱ a ayin a wishi m ɓa̱nka̱ ɗa̱,
mi ta̱ a̱ kuka̱na̱ ɗa̱
ka̱ta̱ n zuwa ɗa̱ yo okpo ci ili yu uzuwakpani a kubana a̱ ubuta̱ u uma,
ka̱ta̱ m bonoko iɗika ya kpamu derere
ali m bono m peceke aza a iɗika ya iɗika i le kpamu i na yi ishi agali,
9 n dana agbashi, <Uta̱i pulai>
aza a na i a̱ ka̱yimbi,
<Ta̱wa̱i e keteshe>
I ta̱ a kulya'a ali a̱ cuwa̱ a uye u na a kuwala dem,
ka̱ta̱ kpamu o doku a̱ ciya̱ i na a kulya'a a̱ ubuta̱ wu nsasan feu.
10 Kambulu n kakuli ki a̱ kuka̱na̱ le ba,
usuɗukpi u kanna n u wunla̱i u kuka̱na̱ le ba.
Vuza na wi a kupana asuvayali e le wi ta̱ a̱ kula̱na̱ le,
ka̱ta̱ u tono n ele a̱ ubuta̱ u mini dem.
11 <<Mi ta̱ a kuya'an uye a̱ ubuta̱ wu nsasan n va̱ ra̱ka̱,
ka̱ta̱ kpamu m bonoko uye u gbayin u ɗa̱nga̱ gaɗi.
12 La̱na̱, ili i nampa yi ta̱ a̱ kuta̱ a̱ mpulu,
a iɗika yu uɓon u gaɗi n ka̱livi,
ali n na ɗe da'in a iɗika i Sini.>>
13 Ya'in ishipa, a̱ɗa̱ gaɗi,
ya'in ma̱za̱nga̱, a̱ɗa̱ aduniyan,
ɓosongi ishipa a̱ɗa̱ nsasan.
Adama a na Vuzavaguɗu u neke ta̱ uma a̱ ni kadanshi ku uremi u ka̱ɗu,
wi ta̱ kpamu a kupana asuvayali a uma a̱ ni a na i a atakaci.
14 Ama ɗa uma a Sihiyona a danai,
<<Vuzavaguɗu u vakangu mu ta̱, u cinukpa ta̱ nu mpa.>>
15 <<Kamaci ki ta̱ a kucinukpa m maku ma na wi e kune'e mani
ali u kpa̱ɗa̱ kupana asuvayali a maku ma na u matsai va?
Ko vuka va wi baci a kucinukpa,
mpa mi a kucinukpa n a̱ɗa̱ ba.
16 La̱na̱, n ɗana wu ta̱ a kataka ke kukiye ka̱ va̱,
nshilya n nu mi ta̱ wa̱ va̱ ali sai uteku n uteku.
17 Aza a na a ma'asakai nu i ta̱ a kuya'an ulinga wa gogo'o,
a la'a aza a na a̱ la̱nga̱sa̱i nu, ka̱ta̱ aza a na a̱ la̱nga̱sa̱i nu a laza.
18 Ɓa̱yuwa̱ a̱shi a̱ nu ka̱ta̱ vu la̱na̱ akambu dem,
uma a̱ nu ra̱ka̱ o ɓolongu ka̱ta̱ a̱ ta̱wa̱ wa̱ nu.
Vuzavaguɗu u danai, <<Tsu na de mi n wuma na, vi ta̱ a̱ kuka̱ɓa̱ngu le e
kuɗeku a na ucanuku wo ogoni,
vi ta̱ a ku'uka le tsu vuka vu savu.
19 Ko a na wo okpoi a̱ la̱nga̱sa̱ ta̱ iɗika i nu,
ɗa i ɗa yo okpoi agali,
i ɗa yi ta̱ a̱ kuta̱wa̱ ya shana n uma a̱ nu,
ka̱ta̱ aza a na a yawakai nu uteku a shamgba da'in n avu.
20 Muku n nu n na a matsai a̱ ubuta̱ wu ugbashi i ta̱ o kubono
ka̱ta̱ a dana wu a atsuvu,
<<Ubuta̱ u nampa u gusa̱ tsu ta̱,
doku tsu ubuta̱ u na tsa̱ kuda̱sa̱ngu.>
21 Ka̱ta̱ vu dana n ka̱ɗu ka̱ nu,
<Yayi u nekei mu ntsukaya n nampa dem?
Adama a na muku n va̱ n a̱bunda̱i n ya'an ta̱ wuni,
ɗa a ɗikai aza a na a buwai a bankai ugbashi. A̱ ka̱sukpa̱i mu na gba̱ɗa̱.
Te ɗai tamkpamu uma a nampa a̱ uta̱i?
Yayi u matsai muku n nampa?
Yayi u kumgbasakai mu ele?> >>
22 Ili i na Vuzavaguɗu Mala'imili u danai i ɗaɗa na.
<<La̱na̱, mi ta̱ e kuɗeke aduniyan n kukiye,
ka̱ta̱ n ɗengusa̱ urotu u kakashi u va̱ a̱ ubuta̱ u uma,
i ta̱ a̱ kutuka̱ ɗa̱ m muku mo olobo n ɗa̱ woɓongi e ekiye,
ka̱ta̱ a canuku muku mi nkere n ɗa̱ a avangatsu e le.
23 Ngono mi ta̱ o kokpo ɗa̱ ishekpu i na i kula̱na̱ ɗa̱,
ka̱ta̱ ngono ma̱ a̱ma̱ci n le mo okpo ina̱kpu i ɗa̱ i na i kuwo'o ɗa̱.
I ta̱ a̱ kukuɗa̱nku ɗa̱ ali a iɗika
ka̱ta̱ e peɗe kubuta̱ ku na ki e ene a̱ ɗa̱.
Nannai ɗa i kuyeve a na mpa ɗa Vuzavaguɗu,
aza a na e keɗei a̱pa̱'a̱ e le a̱ kuta̱wa̱ wa̱ va̱, a kuya'an wono ba.>>
24 Yayi wa kufuɗa kisa ucanuku u na a̱ pura̱i gbani a̱ ubuta̱ u kuvon e ekiye o kovonshi,
ko wi isa uma na e remei a̱ ubuta̱ u kuvon e ekiye o mogono ma asuvawuya?
25 Ama ili i na Vuzavaguɗu u danai i ɗaɗa na,
<<Mayu, aza a na e remei a̱ ubuta̱ wu ugbashi mi ta̱ a kisa le e ekiye o kovonshi,
ka̱ta̱ ucanuku u na a̱ pura̱i gbani a̱ ubuta̱ u kuvon m bonoko le n u ɗa.
Mi ta̱ a̱ kushilika̱ n aza a na a̱ shilika̱i n a̱ɗa̱,
ka̱ta̱ mi isa muku n ɗa̱.
26 Mi ta̱ a kuzuwa irala i ɗa̱ i takumasanai,
i ta̱ o kuso'o mpasa n le, tsu na a ci ya'an m ma̱ra̱.
Ka̱ta̱ aduniyan ra̱ka̱ e yeve a na
mpa ɗa vuzavaguɗu kishi ka̱ ɗa̱,
n Ka̱shibi ka̱ ɗa̱, Uba̱nga̱ri vi Isaraila.>>