6
Ka̱shile ke ɗekei Ishaya
1 A̱ ka̱ya̱ ka na mogono Uzaya u kuwa̱i, ɗa me enei Vuzavaguɗu ida̱shi zuva a kakuba ko tsugono n tsugbayin, ɗa wanshi u kuminya u ni u shanai A̱'isa̱ a gbayin.
2 Anan Corobin a shamgbai ɗe a gaɗi vi ni, yaba dem vi le n evelyu a̱ ta̱li, ere a ɗa a palakai a̱shi, e re kpamu a palakai ene, ere a na a buwai a ɗaɗa a na i a kuya'anka ciɗinkpi.
3 E meɗekenshenei,
<<Vuza ciɗa, vuza ciɗa, vuza ciɗa a̱yi ɗa Vuzavaguɗu Mala'imili,
iɗika dem i shana ta̱ n tsugbayin ci ni.>>
4 Adama a kaca'a ka̱ ka̱la̱ka̱tsu ka vuza na u ya'in meɗevile ɗa iga̱'in a̱ utsutsu a̱ gba̱ɗa̱i ali n uvari wa dem, ɗa a̱'isa̱ a gbayin a shanai n ka̱nga̱.
5 N danai, <<Ili ya atakaci i ɗa a kubana wa̱ va̱, n yawa ta̱ uteku, mpa una̱ u va̱ u tsu ga'an ba, ɗa kpamu mi o kuyongo n uma a na i n kadanshi ka singai a̱ una̱ u le ba. Me ene ta̱ Mogono ma, Vuzavaguɗu Mala'imili n a̱shi a̱ va̱.>>
6 Corobin vi te vi imkpai ɗa vu ta̱wa̱i wa̱ va̱ n ka̱ga̱ruwa̱shi e kukiye ku ni, ka na u kaɓai n ikaɓatsu ya akina ɗe a katalikalyuka.
7 Ɗa u sa'wai una̱ u va̱ n ka̱ga̱ruwa̱shi ka ɗa u danai, <<Indana, ili i nampa i sa'wa ta̱ una̱ u nu, a takpa ta̱ kawuya ka̱ nu, ɗa kpamu a cinukpakai nu unushi u nu.>>
8 Ɗaɗa m panai ka̱la̱ka̱tsu ka Vuzavaguɗu a kudana, <<Yayi n kusuku? Yayi u kubana ka tsu?>>
Ɗa mu ushuki, <<Mpa ɗa na. Suku mu.>>
9 Ɗaɗa u danai, <<Bana vu dana uma a nampa,
<< <Yi ta̱ a kupana mayin, ama ye kuyeve ba.
Yi ta̱ a kinda mayin, ama ya̱ kuka̱na̱ punu ili ba.>
10 Zuwa a̱ɗu a uma a nampa a kpanduku,
vu votsuku atsuvu e le
ka̱ta̱ kpamu vu pala a̱shi e le.
Nannai ɗa baci ba, i ta̱ a̱ kene n a̱shi e le,
ka̱ta̱ a pana n atsuvu e le,
e yeve n a̱ɗu e le
ka̱ta̱ a saba'a o potso.>>
11 Ɗaɗa me ecei, <<Ali makyan me ne ma'i, Vuzavaguɗu?>>
Ɗa wu ushuki mu,
<<Ali sai ayin a na iɗika kakau yo okpoi agali
babu vuza vi ida̱shi ɗe,
sai ayin a na i'uwa yo okpoi lekeɗi,
ashina feu o bonoi a̱pula̱ka̱,
12 sai ayin a na Vuzavaguɗu u suki yaba dem da'in,
ɗa iɗika ya yo okpoi lekeɗi.
13 Ko ka̱pa̱m ka uma ka'a baci ko okpoi koci,
ko ta na a una le baci feu.
Ama tsu na a̱gunli o tsu okpo
a ayin a na baci a kapai nɗanga,
ta feu uma o yoku a na n zagbai o kokpo nannai.>>