15
Wila̱ wa alyuka
1 Vuzavaguɗu u danai Musa,
2 <<Ya'an kadanshi n aza a Isaraila vu dana le, ayin a na baci i uwai iɗika i na mi e kuneke ɗa̱ yo okpo i'uwa i ɗa̱,
3 ɗa i nekei Vuzavaguɗu alyuka a na a ci ya'an n akina a̱ ka̱tsuma̱ ki ili yu ushiga, ko anaka ko wu nlala, tsa alyuka a ili i ma̱gula̱ni u Vuzavaguɗu, ko kune'e ku kusongu, ko kune'e ka kushatangu akucina, ko kune'e ka alyuka ba̱ri, ko kune'e ka̱ a̱ɗiva̱ a na i ci ya'ansa a̱ ka̱ya̱ lakam,
4 vuza na baci de dem u kutuka̱ n kune'e ku ni, u neke Vuzavaguɗu ifa vi te a̱ ka̱tsuma̱ ka kupa ka kiya ku singai uteku tsu kune'e ki ishina, usatari n kagimi ka mani'in ma zaitu.
5 A̱ ma̱giri me te dem ma na i kuya'anka kune'e ku kusongu ko alyuka a, i ɓolongu n kagimi ke kedele ka̱ ma̱kya̱n tsu kune'e ku kuso'o.
6 Ka̱giri ka'a baci vu nekei adama alyuka a, mayun ɗa vu tuka̱ n agimi e re a ifa a̱ ka̱tsuma̱ ka kupa ka kiya ku singai usatari n edele a tatsu a mani'in ma zaitu,
7 koɓolo n edele a tatsu a̱ ma̱kya̱n adama e kune'e ku kuso'o. Nekei a ɗa ci ili i ma̱gula̱ni u Vuzavaguɗu.
8 Yi baci a kuya'an kune'e ku kusongu n kobomburon tsa alyuka o kusongu ko kune'e adama a kushatangu a kucina, ko kune'e ku ma̱ta̱na̱ u Vuzavaguɗu.
9 Ka̱ta̱ vuza u neke kobomburon ka koɓolo n kune'e ki ishina ku kiya ku singai ku ifa vu tatsu a̱ ka̱tsuma̱ ka kupa, usatari n kagimi ke kedele ka mani'in ma zaitu.
10 Ka̱ta̱ kpamu vu neke kagimi ke kedele ka̱ ma̱kya̱n tsu kune'e ki ili i kuso'o, ili i ma̱gula̱ni i singai u Vuzavaguɗu.
11 <<Nannai ɗa a kuya'an n kobomburon, ko ka̱giri, ko maraɗika dem a̱ ubuta̱ wa alyuka.
12 Ta ya kuya'an nannai n kune'e ku na ye kuneke dem.
13 Yaba dem va aza a Isaraila wi ta̱ a kuya'an ili tsu nampa, a ayin a na u kuya'an kune'e ki ilikulya i ma̱gula̱ni i singai u Vuzavaguɗu.
14 Ama komoci ka̱ ta̱wa̱ baci ka̱ da̱sa̱ngi koɓolo n a̱ɗa̱, ko ta na wi punu n ida̱shi n a̱ɗa̱, ɗa u cikalai kuneke kune'e ki ilikulya i ma̱gula̱ni i singai u Vuzavaguɗu, mayun ɗa u ya'an derere tsu na i ci ya'an.
15 Aza a̱ ubuta̱ a i ta̱ a̱ kuka̱na̱ wila̱ u te, wila̱ u te u ɗa i kuyonko a̱ɗa̱ n omoci a̱ ɗa̱. Ka̱ta̱ wo okpo ɗa̱ wila̱ u ko wannai nu ntsukaya n ɗa̱ feu ra̱ka̱ n na n kuta̱wa̱, a̱ɗa̱ n omoci a̱ ɗa̱ yi ta̱ o kokpo vi te a̱ ubuta̱ u Vuzavaguɗu.
16 Wila̱ u te u ɗa ɗa̱ n i na feu i kutono a̱ɗa̱ n omoci a na i ida̱shi koɓolo n a̱ɗa̱ va.>>
17 Vuzavaguɗu u doku u ya'in kadanshi m Musa kpamu, u danai,
18 <<Ya'an kadanshi n aza a Isaraila vu dana le, Ayin a na baci i uwai a iɗika i na mi a kubanka ɗa̱ va,
19 ɗa baci i lya'i ilikulya yi iɗika ya, mayun ɗa i foɓo i yoku a kakambu adama a na i neke Vuzavaguɗu tsa alyuka a̱ kuɗa̱ngusa̱.
20 Ka̱ya̱'a̱ dem i foɓo paki ishina yu ugiti i yoku i na i lapai. Ka̱ta̱ i ya'an ilikulya n kiya ku ugiti ku na yi iyai, ka̱ta̱ i tuka̱ mu ku na ku kokpo kune'e ku kuɗa̱ngusa̱.
21 Ka̱ya̱'a̱ lakam a̱ɗa̱ n ntsukaya n ɗa̱, mayun ɗa i lya'a kelime n kutuka̱ n ilikulya i na a ya'in n kiya ki ishina yu ugiti tsa alyuka a̱ kuɗa̱ngusa̱.>>
Wila̱ adama a̱ unushi wu unambi u kuyeve
22 <<Ama ɗa baci i ya'in unushi wu unambi u kuyeve, ɗa i kpa̱ɗa̱i kutono wila̱ u na Vuzavaguɗu u tonokoi Musa na,
23 i na ra̱ka̱ Vuzavaguɗu u danai ɗa̱ a̱ ubuta̱ u Musa, ili i na i ɗikai a kanna ka na Vuzavaguɗu u nekei ɗa̱ wila̱, ali a kubana ntsukaya n ɗa̱ n na n kuta̱wa̱.
24 Ɗa baci uma a a ya'in unushi u na e yevei n u ɗa ba, ra̱ka̱ vi le e neke mobomburon me te ma na a̱ utuka̱i ushiga tsu kune'e ku kusongu, ili i ma̱gula̱ni i singai u Vuzavaguɗu, koɓolo n kune'e ki ishina n ki ili i kuso'o, koɓolo m ma̱ga̱ji adama e kune'e ku unushi.
25 Ka̱ta̱ ganu u takpaka aza a Isaraila unushi u le ra̱ka̱, ka̱ta̱ ta na a cinukpaka le u ɗa, adama a na n uyevi u le u ɗa a ya'in u ɗa ba, kpamu a̱ tuka̱ ta̱ n kune'e adama a̱ unushi u le, n kune'e ki ili i kulya'a u Vuzavaguɗu, n kune'e ku unushi.
26 Ka̱ta̱ a cinukpaka aza a Isaraila ra̱ka̱ unushi u le, koɓolo n unushi wo omoci a na i punu ida̱shi n ele, adama a na uma ra̱ka̱ ɗa a nusai.
27 <<Ama vuma te ɗa baci u nusai babu u yeve, wi ta̱ e kuneke maraɗika ma̱ ka̱ya̱ ke te, adama e kune'e ku unushi.
28 Ka̱ta̱ ganu u takpaka vuza na u nusai babu na u yevei va unushi u ni u Vuzavaguɗu, a takpaka yi baci unushi wa, ka̱ta̱ ta na a cinukpaka yi u ɗa.
29 Ka̱ta̱ i yongo n wila̱ u te ra̱ka̱, ɗa baci vuza u nusai babu u yeve, ko vuza vi iɗika, ko komoci ka na ki punu ida̱shi n ele.
30 Ama vuza na baci u ya'in unushi n uyevi u ni, ko vuza vi iɗika ko komoci, ali ɗa u ya'ankai Vuzavaguɗu kadanshi ki ishikushi, vuma vu nanlo va mayun ɗa e pece yi n uma a̱ ni.
31 Adama a na u goyo ta̱ kadanshi ka Vuzavaguɗu ɗa kpamu u koɗoi wila̱ u ni, mayun ɗa e pece vuma nanlo n uma a̱ ni, kpamu unushi u ni wi ta̱ o kokpo a kaci ka̱ ni.>>
Atakaci adama a vuza na u sulai wila̱ wa Ashibi
32 Kanna ke te, ayin a na aza a Isaraila i ɗe e meremune, a̱ ka̱na̱ ta̱ vuma a kuzama nɗanga a kanna ka Ashibi.
33 Aza na a cinai ni a kuzama nɗanga ma, ɗa a̱ tuka̱i ni u Musa n Haruna n ubuta̱ u uma a Isaraila a na a buwai,
34 ɗa a gbaguri ni a̱ kunu, adama a na ka̱ta̱ e yeve uteku tsu na a kuya'an n a̱yi ka̱ta̱ ba.
35 Ɗa Vuzavaguɗu u danai Musa, <<Mayun ɗa vuza va u kuwa̱. Dem vu ɗa̱ ɗa ya kuvara yi n atali ka̱ta̱ u kuwa̱ a pulai vu ka̱tsura̱.>>
36 Ɗa ra̱ka̱ vu le a ɗikai vuma va a bankai pulai vu ka̱tsura̱ ɗa a varai ni n atali ɗa u kuwa̱i, tsu na Vuzavaguɗu u danai Musa.
Kuzuwa ki ita̱za̱ ya aminya
37 Ɗa Vuzavaguɗu u danai Musa,
38 <<Dana aza a Isaraila ukuna u nampa. A̱ɗa̱ nu ntsukaya n ɗa̱ dem, mayun ɗa i ca'a tsugbere ubuta̱ u te i ya'an ita̱za̱, ka̱ta̱ i koɓo i ɗa n awin a̱ mini mu usuni a̱ vuta̱za̱ dem.
39 Ayin a na baci ye enei ita̱za̱ ya, yi ta̱ a kuciɓa n wila̱ u na n nekei ɗa̱ ra̱ka̱, ka̱ta̱ i tono u ɗa, an ya kuya'an i na i cikalai ka̱ta̱ nannai u zuwa ɗa̱ yo okpo ili yu unata wa̱ va̱.
40 Ayin a na baci dem ye enei ita̱za̱ i nanlo, yi ta̱ a̱ kuɓa̱nka̱ ɗa̱ i ciɓa an mayun ɗa i tono wila̱ u va̱ ra̱ka̱, ka̱ta̱ kpamu yo okpo uma a ciɗa a̱ ubuta̱ u Ka̱shile ka̱ ɗa̱.
41 Mpa ɗa Vuzavaguɗu Ka̱shile ka̱ ɗa̱, a̱yi na wu uta̱ka̱i ɗa̱ a iɗika i Masar adama a na wo okpo Ka̱shile ka̱ ɗa̱. Mpa ɗa Vuzavaguɗu Ka̱shile ka̱ ɗa̱.>>