8
Iesu Anu Muxali Kisiꞌa ta Ailiꞌi Noxinge Teitexi no Opo Loxotolo
1 Ioxe, vaikala e nenge talelemolu ne laaxu maninasou aloxo ꞌo. Nenge menge kisiꞌa ta ailiꞌi vile lailaixe a uxoxolu. Anu muxolu mutalupexa no anu puloulou noxou tatananu tuala ane tatila manina uxolu teitexi no opo loxotolo, la mulai muxolu no paꞌumolu no avolu tema.
2 Anu muxolu uxaxai loxo ailiꞌi no taasou Lataua teitexi no loxotolo. Tani ne anu tani alelaxu tavuna noxou Lataua e Anu Lataua molu mutulusou, ia ta mitema itulusou no avoꞌa uasi.
3 Xo kisiꞌa ta ailiꞌi ne xaixai sou inoꞌu mimii sou ilai ilosou Lataua loxo anu naꞌu xe iꞌelaxu mimii ulai noxou, la anu Iesu kalumo uꞌoxonu xaixai iouvilesisi aloxo aneꞌi miꞌoxonu ne.
4 Lexe Anu uxolu no lia ꞌo la Anu umomomo sou uxali loxo ailiꞌi uasi, xo ta ailiꞌi a mixolu tei ꞌo sou inoꞌu mimii ulai noxou Lataua loxo anu naꞌu loxo lapuloto muvikala ne.
5 Aneꞌi mixolu mixaxaisou xaixai noxiꞌa loxo ta ailiꞌi no nano no anu taasou lalotu no lialia ꞌo. Taasou lalotu no lia ꞌo ne anu musosovosou xe tovolaꞌi sou taasou lalotu maninasou uxolu teitexi no opo loxotolo. Tavaꞌu aloxo ne la sou no mine Lataua muvikalanu Mosesi sou tani alelaxu tavuna noxou Lataua la Anu mupeletotosou la muvikala aloxo ꞌo, “No mine nini natulusou taasou lalotu ne, la anu laixe lexe nini natulusou umomomo aloxo eni elosienixu teitexi no laxaꞌilu ne, ia natulusou no anu masaxa noxine mamu.”
6 Ia xaixai noxiꞌa ta ailiꞌi moseꞌi. Xo anu Iesu muxali loxo itema utulu nonixi sou uꞌoxonu pekiaꞌusou opo vilesisi alavua ne muaꞌulixu ane muꞌoxonu tei ne. Mo mimii e Lataua muxalixu opo vilesisi la musakiinu vaikala sou tanoꞌu ne muaꞌulixu mimii e muxalixu opo vilesisi la musakiinu vaivaikala noxiꞌa aneꞌi tatei lexe inoꞌu ne.
7 Xo lexe susu vile uxali no anu opo vilesisi e Lataua musakiinu tei uasi, la umomomo sou opo vilesisi alavua uxali la uasi.
8 Ia Lataua muxalisou susu noxiꞌa ta mitema la muvikala aloxo ꞌo,
“Tila muvikala lexe, ‘Ngalomu, eni esosovosou voxo vile a uneneꞌe sou
eni axalixu opo vilesisi alavua no tani noxiꞌa ta Isilaeli xe no tani noxiꞌa ta Iuta.
9 Opo vilesisi nexi noxiꞌa tesakinu ne
iou loxo ane eni eꞌoxonu noxiꞌa ta ꞌilusuꞌilusuneꞌi tatei ne,
no mine eni etilaꞌa no avoꞌa sou elaalixaꞌa ne Aixiputo mineꞌe ꞌo uasi.
Xo aneꞌi imulinu vaikala e nexi noxiꞌa tesakiinu sou opo vilesisi ne uasi,
la sou eni Tila exiunu tumalilo noxiꞌa.’
10 Eni Tila avikala aloxo ꞌo,
No anu voxo ane ne, axalixu opo vilesisi no nixineꞌi ta Isilaeli ne aloxo ꞌo.
Eni amuxaxu lapuloto noxilo uxolu no anu xavutalaiꞌa
mo akaukavunu vaikala noxilo uxolu no nano no taneꞌi.
Mo eni axolu loxo aneꞌi Latauaiꞌa xe aneꞌi ixali loxo eni ta mitemaxeni.
11 Mo anu voxo ane ne la umomomo sou vile la uvikalaneꞌi
xe ulosiouxu menexu vile mo vimou vile,
la uvikalaneꞌi lexe, ‘Ngingi laixe lexe ngalavusou Lataua,’ la uasi.
Xo aneꞌi tavuꞌalo musoko noxiꞌa ta kitukituꞌa moso ꞌo ne
mulai muxali noxiꞌa ta kisokisou ta tatila ne milavusilo mukalusi,
12 Xo aneꞌi milavusilo, la sou eni alulusou susu noxiꞌa e miꞌoxonu ne
la axavutalanu la uasi.”
13 Aloxo ne la sou no anu vaikala sou muxalixu opo vilesisi alavua la ne, la anu mumaxaꞌu opo vilesisi ane Anu musakiinu tei ne anu teinu. Xe mii ane muxali teinu ne anu umomomo sou uxolu maxuveeni uasi, xo anu mamuxanu xe uꞌui la ukalu vitanisi.