13
Ongkori nu ka Salo nu Oyow Kono ka Ogkamatoy
1 Duon mgo otow no nakaamut to nalibulung no mgo otow no nigpamminog ki Hisus. Nignangonan dan si Hisus to duon mgo taga Galilia no ogpanubad dan to ayam dio to Dakol no Ampuanan to mgo Hudiu no niglopow ka mgo sundalu no nigsugu ni Gobirnador Pilatu. Dio dan ian himatayi ka mgo taga Galilia to longod to tubaranan. Ka langosa ran, nakaamut on to langosa to ayam no nighimatayan dan.
2 Nig-inso si Hisus to, “Tongod to noumaan on ka sika mgo taga Galilia to mohirap no pogkamatoy ran, pogsabut now buwa to dakoldakol pad ka salo dan to salo to duma no mgo taga Galilia?
3 Di ko sikan ka goinawa now, natalap kow. Ogkagian ku sikaniu, ko kono now ongkoran ka mgo salo now, songo unawa ka kaniu no kamatayon.”
4 Nigparagas si Hisus to, “Bahin man do to sika sampulu woy wawalu no otow no nammatoy dio to lunsud to Siloam to natobalan on to matikang no baloy kandan, nahan now buwa ko labow pad ka mgo salo dan to mgo salo to duma no nig-ugpo dio to Hirusalim?
5 Di ko sikan ka goinawa now, natalap kow. Ogkagian ku sikaniu, ko kono now og-ongkoran ka mgo salo now songo unawa kow kandan no songo ogkamatoy kow ro.”
Ka Pananglitan Bahin to Kayu no Kono Ogbogas
6 No nignangonan ni Hisus ka mgo otow to soini no pananglitan. Kagi rin to, “Duon otow no nigpamula to kayu no oghingaranan to igira dio to kamot din. To nigtulin on ka kayu malasi oglouya to tagtuun su ogpitawon din ko duon on bogas, di waro.
7 Nigkagian to tagtuun ka talagbantoy to pinamula rin to, ‘Pitow ka,’ kagi, ‘tatolu on no tuid no ungod ku liblibongi ka soini no kayu ko duon bogas din, di waro man bogas. Polora nud on soini su naraat do ka tabo to tano su kono ogbogas.’
8 No nigtabak ka talagbantoy to, ‘Kono nu pad, buyag, polora. Tagad ka pa to agad sagboka naan do no tuid no ogkalian ku pad ka tano no marani to dalig din woy songo isabuk ku pad ka abunu to tano.
9 No ko ogbogas on to soini no sunud no tuid, maroyow, di ko kono ogbogas, balagad ko igpapolod nud on,’ kagi to talagbantoy to pinamula,” kagi ni Hisus.
Nigbawian ni Hisus ka Napoku no Boi
10 Nò, to sikan no Allow to Oghimoloy to mgo Hudiu, nig-anad si Hisus to mgo otow dio to songo anaranan to mgo og-ampu.
11 No duon boi dio no nigdaralu, no ka dalu rin, nigpuun to busow. Sampulu on woy wawalu no tuid ka poggoram din. Napoku ka poka rin no kono ogkatul-id.
12 Pogkita ni Hisus to boi, nig-umow rin sikandin no kagi rin kandin to, “Igi, nabawian kad to oggoramon nu,”
13 no nigdampo ni Hisus ka boi no inogo on no natul-id on ka poka rin, no nigsayo din on ka Magboboot.
14 Di ka igbuyag to sikan no anaranan to mgo og-ampu atag, nabolu su nigbawian ni Hisus ka boi to Allow ran to Oghimoloy. Kagi to igbuyag to anaranan dut mgo otow to, “Duon hon-om no allow no litos no ogpakatalabau ki, no hondini kow to sikan no mgo allow oyow ogkabawian kow. Di kono ogkaayun kuntoon no Allow ta to Oghimoloy.”
15 Nigtabak si Hisus to igbuyag to anaranan to mgo Hudiu. Kagi rin, “Ogpatuutuu ro ka pogtuu now! Hontow pad no otow dii ka kono din oghokaron ka lubid to baka rin woy ko kuddo din no ogtuyukon din dio to woig oyow ogpoinumon din to Allow ta to Oghimoloy?
16 Nò, ka soini no boi no songo Hudiu dod no pinanganak dod ni Abraham, sampulu woy wawalu on no tuid ka pogkabaybayari rin to soin no dalu no nigligkat ki Satanas. Og-insa a ko kono no goinawa now to ogkabawian sikandin to igkabaybayari rin kuntoon, agad to Allow ta to Oghimoloy?” kagi ni Hisus.
17 Pogkagi ni Hisus to sikan, nasipod on ka mgo usig din to nig-atu kandin di ka duma no mgo otow, narago to tibo no mgo hinimuan ni Hisus no maroyow lagboy.
Ka Pananglitan Tongod to Boni no Mustasa
(Matiu 13:31-33; Markos 4:30-32)
18 Songo allow duon inso ni Hisus to, “Nokoy ka maroyow no igpananglitan ta to Pogsugu to Magboboot woy ko nokoy ka ogpounawaan ta?
19 Ka Pogsugu to Magboboot, ian ogkounawaan ka sika malintok ian no boni to mustasa no dio ipamula to songo otow to kamot din. To nigtulin on, nohimu on no matikang no pinamula no duon on sugpang no nigsasalagan on to mgo manukmanuk.”
Ka Pananglitan Bahin to Igpatulin to Paan
20 Kagi ni Hisus, “Nokoy pad ka duma no igpananglitan ku no ogpounawaan to Pogsugu to Magboboot?
21 Ian ogkounawaan ka igpatulin to paan no in-amut to boi to dakol no harina. Pogkaponga rin, ogtulin ka tibo.”
Ka Malig-ot no Gumawan
(Matiu 7:13,14)
22 Nighipanow on si Hisus no nighondio to mgo lunsud woy mgo hilit duon to ogkabayaan din no oghondio to Hirusalim no nigpanganad din ka mgo otow dio.
23 Duon songo otow no nig-inso ki Hisus to, “Buyag, og-inso a koykow ko manalingboka ro ka ogkapangabangan to salo dan?” No nigkagi si Hisus kandin to,
24-25 “Dio to Pandatuan to Magboboot, duon no ogko-unawa no malig-ot so gumawan. Poomoti now to ogsolod to sikan no malig-ot no gumawan. Nò, ogpoko-uma ka allow no oglokoban to Magboboot ka gumawan. Mohon-ing ka ogsolod porom di kono ogpakatood. Sikaniu no dio kow rod to libuwasan ogbunsud kow to ogtoktok to lokob no ogkagi kow to, ‘Buyag, pulasi koy ro,’ no ogtabak din to, ‘Waro a mogtokod kaniu.’
26 Di nasi ogkagi kow pad to, ‘Mokinaan to nig-amut koy man to nigkoonan woy songo nig-inum koy dio to longod nu to nigkoon kid woy nig-anad kad dio to kanami no lunsud.’
27 Di ogtabakon kow pad oghutuka to, ‘Ognangonan ku sikaniu to waro a mogtokod kaniu. Kaniu no mgo makasasalo, awo kow on kai to koddi.’
28 Nigparagas nigkagi to, ‘Ko ogkatuman on ka allow to Pandatuan to Magboboot, ogkitoon now si Abraham, si Isaak, si Hakub lagkos to tibo to dongan no mgo talagnangon to kagi to Magboboot woy tibo kandan dio ogpokougpo. Di sikaniu atag, dio kow ro ogpokougpo to libuwasan.’ ”
29 Nigparagas si Hisus to kagi rin to, “Duon mgo otow uromo no ogpokog-amut ko ogkoon dio to Pandatuan to Magboboot. Kandan, dio ogpuun to mgo mariu no mgo ugpaanan to mgo otow no konon Hudiu no dio to longod to ogsilaan to allow, woy ka dio to balabagan woy ka dio to ogsalopan to allow woy ka dio to habagatan.
30 Pamminog kow,” kagi ni Hisus, “Duon mgo otow kuntoon no nahan ta no ogpokohun-a kandan porom ogpasakup to Pogsugu to Magboboot, dokad di kandan ka ogkamohuri no ogpasakup. Duon dod mgo otow no nahan ta no mohuri on ogpasakup to Pogsugu to Magboboot, dokad di mohon-ing sikandan ka oghun-a ogpasakup to Pogsugu to Magboboot.”
Ka Goinawa ni Hisus to mgo Taga Hirusalim
(Matiu 23:37-39; Lukas 19:41)
31 Wa do malugoy no duon mgo Parisiu no nokouma dio ki Hisus. Kagi ran kandin to, “Awo kad on to soini no ugpaan su goinawa kun ni Gobirnador Hirodis to oyow oghimatayan ka.”
32 Kagi ni Hisus kandan, “Hondio kow to sikan no magawoygawoy no igbuyag. Nangoni now sikandin to kuntoon no allow, pananglitan, woy ko asolom, ogdogilon ku ka mgo busow no nigsolod to lawa to mgo otow, woy ogbawian ku pad ka mgo otow no duon masakit dan, woy ka igkatatolu no allow, ogkapongaan kud on ka tuud ku kai to tano.
33 Di og-awoson to ogparagas a kuntoon, woy asolom, woy mapawo man do no oghondia a to Hirusalim su hondoi ka litos no oghimatayan ka songo talagnangon to kagi to Magboboot ko kono dio to Hirusalim!” kagi ni Hisus.
34 Nigparagas si Hisus to kagi rin to, “A mgo taga Hirusalim. Kaniu ka oghimatoy to mgo talagnangon to kagi to Magboboot woy ogdogpakon now to batu oyow ogkamatoy ka mgo otow no nigsugu to Magboboot dio to kaniu. Malasi a porom ogkopkop to tibo no anak nu no unawa to upa no oglimuron din no ogkupkupan din ka mgo piak din, di wa kow man nigbogoy,” kagi ni Hisus.
35 “No pitow kow. Ka lunsud now, ogkabalagad on no woy a ro ogkitaa hutuk to allow no ogpakakagi kow tongod koddi to, ogkapulusan to Magboboot sikandin no impohondini to ngaran no Igbuyag ta,” kagi ni Hisus.