95
Kabepepa ayina
1 Kopiika, Yawe God tanakabepepi!
Kobera da nuwamiise kiiravine God biidi tanatawora,
iiyabo yitarababaranedana.
2 Kobera da wiikiikiiwama tanapiika naghone
bi kabepepa ayidi nuwakayowanidi tanatawora da tanakabepepi.
3 Kiiravine Yawe na God kiidamo kirakiina,
touna kiiwawo maragata kirakiina,
da god tupadi igeetawanidi.
4 Bi kubura tupana yibadeni,
epamana bonayidi didibaridiye da inagho igae koya gekirakiidiye.
5 Yegii tupana yibadeni, meko iberana;
bi bada tanawa, meko touna wosina ikabiwiipakipakina.
6 Kopiika, kobera da tanapepeta bi tana kabikuwayeni;
kobera da Yawe God naghone tanituwapore oghogheyana,
kada berabera tomoyina!
7 Touna na yada God;
bi touda na yana wawaya, na yakoyakoyayida,
ware sip bodaboda yana sip yakoyakoyayidina naboni.
Kata kowaiyana Yawe God awaki yawonewoneni:
8 Genuwanuwami sinakotakii,
ware nosinosiminakimi Meriba kubure siberana naboni,
ware toudi noko gabudarine Massa mayabine siberana naboni.
9 Name siruyaghagu da sivitupawamiwamiregu,
bagune sikita da awaki abera kiiravidiye
raghanina Ijiptma akabikanibuvedina gabudarine.
10 Bi bodu 40 kamodiye nuwanuwagu ipughu nokodi damdi biiyadi.
Awona bo, Toudi nuwanuwadiye tagu simiiri kubutegu,
da yagu gwara gesiyakabisisiredina.
11 Na nuwanuwagu ipughu na wiisuwona maragasina mma naboni abera, awona bo,
“Tagu gawara kiiravidiye akabununayi da siyiyawiitaveyana,
bi gegha da kata geaniwaghasinedi da sinarughu kamonena.”