9
Israel bagee yupii Ogatamee me daamaa wigintaata bagee yuwa kaa menaa
1 Anii ko Kristus Wa yaato bagee kemaata mikee menaa ena kiiwegaanaka. Mee menaa mee ko Roh Kudus me mee mikee menaa yoka see kuwa anii dimi yiba nasigi kemaata makapaa menaa se.
2 Mee ko kisee: Anii dimi mena boodi ebo, gaagaa dimii mee kisee too se sikiinega.
3 Mikee, anii ma tomaa kaa bagee kuwa okoo nii ma gadimani bagee yuwa kiya Israel bagee mée eebaa Kristus yaato taa. Anii Ogatamee me okoo Kristus yaato namiyaagi naaki ou see dimii mee esee ebo. Wa me ni kaa too pedeo ayaa nadooyaayaa, kisee anii Kristus ma napatagataayaa kuwa koosi, kuwa anii ma tomaa kaa bagee kuwa Kristus yaato namiyaai, kisee okoo ma, anii ma aapeka natagaai, kisee ukuwaano daamaa see gaaga.
4 Okoo miya Israel bagee, Ogatamee me idukaa kaama okoo daamaa wigintaata kaama Wa me yogaa kiyaata bagee yuwa. Idukaa kaama okoo paagoo Wa me asii-sege siyaa agiyoo yuwa deeyaabuu siwoo seta. Bedaa okoo paagoo Wa me asiino, "Anii miya kisee daamaa kiukuwawoo taapa, ikii me miya kisee daamaa naukuwawoo taai" see menaa miya aseta, okoo paagoo deewoo siyaa menaa miya Musa doodoo manta, okoo paagoo Ogatamee Waa kisee ebo ekee, kisee yaapaagee siwoo taai see menaa kuwa miya manta. Bedaa Wa me "Anii kisee daamaa kiukuwaata, kisee daamaa kiukuwaaniyaabuu taata" see menaa kuwa miya Israel bagee paagoo aseta.
5 Okoo ko Abraham ma, Isak ma, Yakub ma okoo me asii-kaba-kaba seta bagee yuwa, bedaa okoo kaama asii-kaba-kaba siwoo naadi kaama Ebo Kristus mee kabata. Waa ko se-agiyoo, we-agiyoo uduma Ebo Wodoo Eboo see Mée Ogatamee mee. Kiiboo, paamee, magiyaage kisee too iminoo miya, iminoo miya yaapaagee taano too. Amin!
6 Israel bagee okoo mée eebaa Kristus yaato taa see bagee kiya Ogatamee me petamanii okoo paagoo "Anii kisee daamaa kiukuwaaniyaabuu taata" see aseta menaa kuwa mikee uwa daaga, kuwa menaa wuutu-waatu seta see taa. Mee ko Israel bagee uduma mikee ki Israel bagee yuwa se, okoo mée gakata Wa me daamaa wigintaata bagee yuwa se,
7 bedaa Abraham me asii-kaba-kaba seta bagee okoo uduma Ogatamee me yogaa yuwa se. Idukaa Ogatamee me Abraham paagoo aseta menaa ena mee ko kisee: "Kuwa mikee a me asii-kaba-kaba seta bagee yuwa see ekaa weewoo taatagea kuwa ko Isak mee doodoo too kaata, apanaa yogaa doodoo se" see aseta.
8 Wa me aseta menaa mee kaa kaama inii nekeeniino ko kisee: Abraham wa me maa to kaa kaama asii-kaba-kaba seta bagee yuwa kuwa uduma Ogatamee me yogaa yuwa ii see deeyaa see se kiya Ogatamee me Isak mee doodoo too yoka see aseta-aseta kabawoo seta bagee kuwa too mikee ki Abraham me asii-kaba-kaba seta bagee kiyaa, see kuwa inii nekeeniyaa.
9 Mikee, Ogatamee me aseta menaa mee ko kisee: "Ni me wegata monaa da kaa Anii meeta naagoo Sara mee paayogaa yogaa ena agoo kaata" see aseta.
10 Mee too se kiya idukaa inii me bagee Isak mee wa me yogaa yuwa miya kisee. Ribka me kadapoo mee Isak wa me kadapoo too.
11 Kadapoo yiba wiya yogaa. Kabaano taa kaboo kuwa yogaa yuwa daamaa agiyoo miya, pedeo agiyoo miya peenaa ma ukuwaano taa kaa Ogatamee me yoga ena too too daamaa wigintaata. Ogatamee me wiginiyaa-wiginiyaa mee ko mée me daamaa ukuwata agiyoo kuwa kaa se kiya Wa me gaata-gaata kuwa ukuwaaniyaano see naadi kaama too mée wiginiyaa, kisee Ni paagoo nameei see mée asiyaa.
12 Kisee yoga ena daamaa wigintaata kaama Wa me mee apii to asiino, "Yagamee yagaaboo to mee peedi kaatagi, menaamee me agiyoo yaokagee see mée kaatagi" see aseta.
13 Kuwa yogaa wiya kuwa kaa menaa ena ko kisee: "Anii Yakub waa epa, Esau mee be" see ebeamaata.
14 Wa me kisee wigintaata kemaata inii mapea menaa wegayaa? "Ogatamee Wa me mée wigineano kuwa koopoo" see menaa kuwa wegayaa ye? Kisee menaa kuwa peenaa ma taa, iyo.
15 Idukaa Wa me Musa aseta menaa ena mee ko kisee:
"Ni me aii epa kaano ede see bagee kuwa Anii aii epa kaapa,
bedaa Ni me aii epa ekeasiino ede see bagee kuwa Anii aii epa ekeasiipa" see menaa aseta. Kel 33:19
16 Wa me kisee aseta kemaata Wa me mée wiginiyaa-wiginiyaa kuwa ko mée me ede gaata-gaata doodoo se, bedaa mée me omaago ma ukuwata-ukuwata doodoo miya se kiya Ogatamee Wa me aii epa gaata-gaata doodoo too mée wiginiyaa.
17 Mee see see menaa ena mee idukaa Ogatamee me Piraun paagoo aseta. Ebeamaata menaa ena mee ko kisee: "Anii aa ebo katuyaaga mee ko Ni me pesee agiyoo yuwa awee da kaa mée uduma deeyaabuu taano see naadi ebo katuyaaga. Ni me pesee agiyoo kuwa kaa Ni ekaa da uwoo to, magaa to uduma ogo pege-pege siyaabuu taano see naadi Anii ebo katuyaaga" see ebeamaata.
18 Kisee kemaata Ogatamee me gaata-gaata kuwa doodoo too Wa me mée ekee siyaa. Mee ko Wa me aii epa kaano ede see bagee kuwa Wa me okoo aii epa gaayaa, bedaa Wa me dimi mena eboo yakiyaano ede see bagee kuwa Wa me okoo dimi mena eboo yakiyaayaa, kisee Wa me mée yakiyaayaa.
19 Ani me kisee wegayaa kiya mée waa ena me anii aii nasiyaa menaa mee ko kisee: "Ogatamee Wa me gaata-gaata doodoo too kisee mée yakiyaayu ko 'Wa me anii nakiyaata doodoo anii se umiwoo, toowoo taapa' see gaayaa bagee naa agoo ye? Taa yoka inii pedeo ukuwamaata kaama Wa me yaai, kisee pedeo yoka, see mée gaayaa kuwa kaasee kaa ya?" see kuwa mée ena me aii nasiyaa.
20 Kiya ani me waa asiyaa menaa mee ko kisee: Aa miya magaa da kaa bagee ena yoka aa kaasee mée to? Aa kuwa menaa me Ogatamee wisineano uu ye? Ipiipii sipi agiyoo da me ipiipii sipi mée to paagoo "Aa kaasee kaa anii kisee ukuwasi naadi naipiipii sepe?" see menaa kuwa asiyaa ye?
21 Otaawee ipiipii taa see mée gaayu ko daki magaa dukuu to masegeeta kaama wa me gaata-gaata doodoo too ipiipii siyaa, se maa? Wa me ipiipii siyaa agiyoo kuwa ko noonaa ebo agiyoo kaa ukuwaano see naadi ipiipii siyaa, noonaa aii agiyoo kaa ukuwaano see naadi ipiipii siyaa, se maa?
22 Kisee miya Ogatamee me okoo pedeo kisi naadi ipiipii seta bagee kuwa gaayu ko Wa me kagoo ma, Wa me pesee ma kuwa okoo kaa awee da kaa mée deeyaabuu taano see dimii agoo kiya kiipaa se yoka naadi kaama Waa dimi mena koogo animaata toogee seta.
23 Mee ko Wa me aii epa kaa daamaa ipiipii seta bagee yuwa paagoo Waa esee ebo, Waa asii-sege nao see kuwa deeyaabuu taano see naadi Wa me kuwa apanaa ipiipii seta bagee yuwa moga pedeo kiyaano taa. Okoo Wa me asii-sege siyaa agiyoo yuwa masisi naadi idukaa petamanii kaama aii epa kaa ipiipii seta bagee yuwa kuwa gaayu ko
24 Wa me inii miya kisee bagee daamaa mée kiyaano see naadi Ni paagoo nameei see mée aseta. Inii mée noonaa Yahudi bagee kiya kuwa too se kiya noonaa mée tomaa-tomaa apanaa yuwa miya Ni paagoo nameei see aseta.
25 Mee mokoo mée tomaa-tomaa apanaa yuwa okoo kaa menaa ena idukaa Ogatamee me nabi Hosea aseta, mee ko kisee:
"Okoo Ni me bagee taa see bagee kuwa
epeekaa okoo Ni me bagee yuwa see ekaa weata,
bedaa okoo Ni me epa gaano taa see bagee kuwa
Ni me epa see bagee yuwa see ekaa weata. Hos 2:22
26 Bedaa idukaa okoo kiyoo-kiyoo tota bagee yuwa paagoo Ogatamee me 'Ikii ko Ni me bagee taa' see aseta bagee kuwa
epeekaa kiyoo tuyaa bagee yuwa okoo Toono Too Mée Ogatamee me yogaa yuwa see ekaa weatagea" see menaa aseta. Hos 1:10
27 Bedaa idukaa nabi Yesaya wa me miya mena ebo kaa Israel bagee yuwa okoo kaa menaa ena wegata, mee ko kisee: "Israel bagee kuwa uduma egataayaa naaki maakaa pikuu da kaa ea ponee eebaa kuwa see see kiya okoo eebaa taa yaato daba daagimaa pootagea.
28 TUHAN Wa me kisee magaa da kaa bagee yuwa wigintagaapi kuwa Wa me ipiipi yaukuwatagaapi, kisee moga yaukuwatagaapi" see wegata.
29 Bedaa idukaa nabi Yesaya me wegawoo seta menaa ena miya kisee:
"Pesee Wodoo Pesee TUHAN mee Wa me inii me asii-kaba-kaba bagee yuwa mée tuyaano taa naaki
inii Sodom magaa mokoo see see kiyaa,
inii Gomora magaa see see kiyaa" see wegata.Yes 1:9
Israel bagee yuwa okoo eebaa yaato me Ogatamee wisintaata kemaata wigintaata menaa
30 Kisee Israel bagee yuwa kaa yaebeamaata menaa agoo yoka eto ko inii me wegayaa menaa mee ko kisee: Mée tomaa-tomaa apanaa yuwa kuwa gaayu ko okoo Ogatamee me sikii nakiyaagi naaki ou see dimii mee okoo gaano taa kiya eto ko okoo Yesus mikee nao see gaata kemaata Wa me okoo sikii kiyaata.
31 Kiya Israel bagee kuwa gaayu ko kisee taa. Okoo idukaa kaama Ogatamee me okoo sikii, okoo miya nao see mée deegi naaki ou see dimii mee gaawoo seta kiya Musa me menaa maamaa deewoo naadi kaama Ogatamee me okoo sikii, okoo miya nao see gaano taa.
32 Kaasee kaa ya? Okoo Kristus mikee nao see dimii mee taa, okoo me 'Inii Musa me menaa deewoo siyu ko inii sikii kaapea' see dimii mee too gaawoo seta. Kisee kemaata Wa me okoo sikii, okoo miya nao see gaano taa. Okoo Ogatamee me pee-yaekeata omaa to mee badoo da kaa kepoto naadi kaama okaata.
33 Kuwa Kristus kaa ebea-ebea menaa kuwa ko kisee:
"Yeeweei, Anii Sion magaa kaa kiyoo oma ena kiyoo pe-ekeasega.
Mée me badoo da kaa kepoto naadi okaamaayaayaa omaa to mee,
mée me Wa kaa toowage-taawage naadi okaapea.
Kiya Waa mikee gaayaa bagee kuwa ego weda taa kaapea" see menaa ebeamaata. Yes 28:16