6
1-2 Watum ro Kristus, maja taro ro mnan-nan to, bo weto anu nhar oh. Feto nma, anu bkyas bokyas refo maja baro ro samyoh fares, re kbe anu brok btak. Watum rAit ro anu nhar oh mefo:
-Nashana tna nno bo ro mkair to ma. Raa ro mno bo ro mkair to, kbe mkai riof to fee.
-Smot Allah.
-Raa baptis anu.
-Nmo no kʼraabis ro Tuhan re ana moo matem mtor kʼanu abyõ tna skabuk anu.
-Raa ro smot Yesus tna mhai to, kbe meen mrok masen.
-Kbe meen Allah yoo safo mana ymit kʼraa. Tna bo ro yawe reto to, meen mabo yum.
Tiwya raa mkyas bo weto beta kʼanu re nhar oh. Feto to nno bo mnan fi ku mees u to ma.
3 Anu bkyas bo weto oh. Tna soh Allah ksoh ybis to, tawe kbe anu bkyas bo ro mase renti.
4 Raa taro tiwya mhau mam wore wo mamur menohe ana mamo mhau mam wore wo maah. Ana weto tiwya moo bouum ro Allah yoo yee kʼana oh. Tna Har rAit mjin mam mhaf wana oh.
5 Tna mhar mawe bo ro Allah yawe to, moof toni. Tna ana mhar tak ro Allah ye tna minaut sawro ro Ait siwyan kʼana.
6 Tna fo, soh ana weto haberek kbor to, ana mesait mame Yesus muhrin ro ewok u. Tibyo mno re raa miwana Ait tna sret Ait masah. Soh ana weto mamo tit tna mikyak Tuhan Yesus to, kbe ana me mashana u fee saut.
7 Oom mais mroh mame tabam beta. Tabam taro to raa mkah tna tabam reto tufrok mafer mawat kʼraa ro mkah. Tibyo Allah yno bo moof kʼtabam reto. Tabam reto to mnan fi raa ro moo bouum ro mbam Allah tibyo mno bo ro moof.
8 Menohe tabam roto taro to, tufrok abumun msya bo hyoh sai. Tibyo kbe Allah yto tabam reto. Meen tis rau to, Ait yuus tabam reto. Tabam reto to mnan fi raa ro moo bouum ro mbam Allah menohe me mno bo ro moof fee.
Nhau ste bo ro meen Allah yuumto kʼanu
9 Tafoh na wojõ; jõ tkyas bo wefo menohe jõ tnaut tawe anu wefo kbe nhaf nse bo ro moof. Anu ja tufrok mafer ro mkair to fee. Tnaut tawe anu nmo mam iso ro meen nkai riof.
10 Ati ro Allah ytu srah yari to, ja yno kaket. Tna kbe Ait ynaut bombra ro moof ja anu nno. Ja anu natmof raa wAit to. Tna Allah ynaut yawe nno feto to, mnan anya msya anu nno bo moof weto kʼAit yesait ye. Nno feto yhar yawe anu natmof Ait ye.
11 Amu ksoh nwe anu nhau nno bo weto mamo snok mam wore anu nhai. Beroh nno renti afo re meen anu nkai riof ro mbam kʼAllah. Kbe meen anu nkai bo ro anu nwof tna nhaf ninaut fares reto: Bo moof ro meen Allah yuumto kʼanu.
12 Anu nhar bosi ro Allah ysi kʼanu, raa wAit. Feto to haweboh ma. Beroh nno bo ro moof mnan fi raa wAit ro matim wia. Nnaut raa wAit ro tiwya smot Allah: Tii ana weto mhau mwof bo ro Allah ysi kʼana. Ana mwof kait tna beroh smot Allah matak. Tibyo mkai.
13 Nnaut: Tiwya Allah ysi bosi kʼAbraham. Ati ro ysi bo reto, Ait yto boto ye. Allah yto boto to, ytom yasom rAit ai. Allah tait Raa ro yase. Raa roto aro mase miwer Ait fee. Feto to ysi bosi reto to, tna yto boto mkah yasom rAit ai.
14 Allah yawe,
“Kbe Jõ tno bo ro moof kʼnyõ. Tna meen tno nyõ nabe ku renti msis-sas.”
Kejadian 22:16-17
15 Tibyo Abraham yhau to, beroh ste bo ro Allah ysi reto. Ait hrowyõ fee. Tna mabo.
16 Soh raa sait yto boto to, ja ytom raa sait yasom ro yase yiwrek ait. Tna ait ro yase tait yhaf sau yawe kbe bo reto mabo ye. Ja raa mari feto mawe, “Kbe ait ybo yno tu oh!” Kbe raa mnaut maut-mroh bokyas rait reto fee. Kbe raa besboh bokyas rait fee.
17 Allah ksoh yawe ku renti ro Abraham wait weto, kbe mhar mawe Ait tait Raa ro yros tu, susu fee. Afo re ana mhar mawe bo ro Ait ysi kʼana weto to, kbe meen yno tu oh. Feto to ykyas sai fee, ysi bo sai fee; Ait yto boto ye.
18 Ait ysi bosi ye. Tna Ait yto boto ye. Bo ewok weto to, kbe mhau bau. Allah wase bo sioh to. Anu ro bsam wai kʼAit oh to, anu bhaf binaut bwe bo ro Ait tiwya ysi kʼanu weto to, kbe yno tu oh. Bohar reto to mban anu tis, misoh anu bhaf wanu. Tibyo waa ma.
19-20 Anu bhaf binaut bo ro meen mama kʼanu mbam Allah. Meen anu bhaf bse tu oh. Allah sorni bo fee saut. Bo ro yawe yno to, anu bbo matak. Soh anu bnaut bo moof weto to, kbe anu bros btak; susu fee. Bo moof weto to mnan si jangkar ro ja raa mbeak mam aya tna kapal reto mros matak. Yesus yban tis anu afo re anu bros btak ye. Ait yase re kbe yamo ykyas boyoh wanu kʼAllah. Ait yhau su ysya Allah. Yhau su ysya Allah ynan fi imam yase ro Yahudi. Tiwya soh imam retait yamo yo kʼAllah to, ait twok mam yuk ro mbau. Yesus fi yamo imam ranu ro yase, ynan Melkisedek. Yamo imam mamo snok mam hame wajin, meen yhai fee. Tna Yesus fi yamo wia yatim ykyas boyoh wanu kʼAllah.