10
Be bɑ Yinni Gusunɔn mɔru
seeyɑmɔ
(I mɑɑ mɛɛrio nɑɑsu 1-4, 5:8-24)
1 Bɔ̃rurobɑ be bɑ rɑ woodɑ yi ye yɑ ǹ sɑ̃ɑ dee dee.
Kpɑ bu ye yore bu yi bu kɑ ben tɔmbu dɑm dɔre,
2 bu kɑ yinɑ bu sɑ̃ɑrobu ben ɡem wɛ̃,
kpɑ bu bwɛ̃ɛbwɛ̃ɛbu ɡem birɑ,
bu ɡɔminibu kɑ ɡobekubɑn ɑrumɑni mwɑ yu ko beɡiɑ.
3 Sɑnɑm mɛ Yinni Gusunɔ u koo bɛɛ sɛɛyɑsiɑ,
mbɑ i ko i ko.
Sɑnɑm mɛ kɑm kobu bu koo bɛɛ wɔri sɑɑ tontonden di,
mbɑ i ko i ko.
Weren miyɑ i ko i duki dɑ i kɑ fɑɑbɑ wɑ.
Mɑ ɡiɑ i ko i bɛɛn ɑrumɑni bere.
4 Bɑ koo ɡɑbu yoru mwɛɛri kpɑ bu ɡɑbu ɡo.
Adɑmɑ kɑ mɛ, Yinni Gusunɔn mɔru kun suremɔ.
U koo mɑɑ bu nɔmu doke u sɛɛyɑsiɑ.
Asiriɡibu
bɑ Yinni Gusunɔ torɑri
5 Yinni Gusunɔ u nɛɛ,
bɔ̃rurobɑ bɛɛ Asiriɡibu.
Kon bɛɛ kowɑ nɡe nɛn bokuru
te kon kɑ Isirelibɑ sɛɛyɑsiɑ nɛn mɔru yɑ̀ n seewɑ.
6 Nɑ derɑ i bwese te tɑ ǹ nɛn bɛɛrɛ yɛ̃ wɔri
te tɑ rɑ nɛn mɔru seeye,
kpɑ i tu tɑɑku nɡe swɑɑn pɔtɔkɔ
i ten ɑrumɑni ɡurɑ.
7 Adɑmɑ n ǹ dɑɑ ye, bɛɛ Asiriɡibu i ɡɔ̃ru doke.
I ɡɔ̃ru dokewɑ i bwese dɑbinu kpeerɑsiɑ.
8 Domi bɛɛn sinɑ boko u nɛɛ,
win tɑbu sinɑmbu bɑ sɑ̃ɑwɑ nɡe bwese ni nu tien sinɑmbu.
9 U mɑɑ wusu nɔmɑ doke si su wɑ̃ɑ win swɛɛ sɔɔ
n kɑ ɡirɑri Yerusɑlɛmuɔ.
Wuu siyɑ Kɑlinɔ kɑ Kɑɑkemisi kɑ Hɑmɑti
kɑ Aɑpɑdi kɑ Sɑmɑri kɑ Dɑmɑsi.
10 U sin sinɑmbu kɑmiɑ
sìn bũnu nu Yerusɑlɛmu kɑ Sɑmɑriɡinu dɑbiru kere.
11 Nɡe mɛ u Sɑmɑriɡibu kuɑ kɑ ben bũnu,
nɡe mɛyɑ u koo Yerusɑlɛmuɡibu kɑ ben bũnu kuɑ.
12 Adɑmɑ nɛ, Yinni Gusunɔ, nɑ̀ n nɛn himbɑ kpuro yibiɑ Siɔnin ɡuurɔ, kɑ Yerusɑlɛmuɔ, kon Asirin sinɑ boko sɛɛyɑsiɑ, win ɡɔ̃ru bɔbunu kɑ win tii suɑbun sɔ̃.
13 Domi u ɡerumɔ u mɔ̀,
win tiin dɑm kɑ win tiin bwisiyɑ u kɑ nɑsɑrɑ wɑ.
U bwese tukunun tem mwɑ, mɑ u ben ɑrumɑni ɡurɑ.
U sinɑmbu wɔri nɡe tɑbu durɔ dɑmɡii,
mɑ u bu bɑndu yɑrɑ.
14 U ben ɑrumɑni ɡurɑwɑ
nɡe mɛ bɑ rɑ sɛ̃ɑ ɡure ɡunɔbun sokurɔ.
U ye kpuro ɡurɑwɑ ben tem mɛ sɔɔ
nɡe sɛ̃ɑ ye ɡunɔ ɡɑ deri.
Goo kun kɑ tii yinɛ
ǹ kun mɛ u nɔɔɡiru suɑ u kuukɑ ko.
Adɑmɑ nɑ bikiɑmɔ,
15 ɡbɑ̃ɑ, yɑ rɑ tii bɛɛrɛ wɛ̃
wi u kɑ ye sɔmburu mɔ̀n wuswɑɑɔ?
Sii, yɑ rɑ tii sue
wi u kɑ ye sɔmburu mɔ̀n wuswɑɑɔ?
Asirin sinɑ boko wi, u sɑ̃ɑ nɡe dɛkɑ
ye tɔnu u suɑ mɑ yɑ nùn sĩikiɑmɔ,
ǹ kun mɛ bokuru te tɔnu u nɛni,
mɑ tɑ nùn fĩɑmɔ.
16 Yen sɔ̃nɑ nɛ Gusunɔ, wɔllu kɑ tem Yinni,
kon de win tɑbu durɔbu bu woorɑ.
Kpɑ dɔ̃ɔ u nɑ u bu wukiri
sɑnɑm mɛ u wɑ̃ɑ win sinɑndun yiiko sɔɔ.
17 Nɛ, Isirelibɑn yɑm bururɑm, kon ɡɔsiɑ dɔ̃ɔ.
Kpɑ nɛn dɛɛrɑru tu ko dɔ̃ɔ yɑrɑ
yu ben sɑ̃ki kɑ ɑwĩi kpuro mwɑ sɔ̃ɔ teeru.
18 Yɑ koo ben dɑ̃ɑ sɔ̃ɔ kɑ ben tem bɛɛrɛ kpuro mwɑ mɑm mɑm.
Kpɑ mu n sɑ̃ɑ nɡe bɑrɔ wi u ɡɔɔ dɔɔ.
19 Dɑ̃ɑ ni nu koo tiɑ mi,
nu ǹ ko n dɑbi.
Bɑɑ bii u koo kpĩ u nin ɡeeru yore.
Isirelibɑn fiikowɑ
yɑ koo wurɑmɑ
20 Tɔ̃ɔ te sɔɔ, Isireli be bɑ tie bɑ yɑrɑ tɑbun di, bɑ ǹ mɑɑ somiru kɑsumɔ bwese ni nu bu kpeerɑsiɑmɔn mi. Adɑmɑ bɑ koo ben nɑɑnɛ dokewɑ nɛ, Gusunɔ, ben Yinni Dɛɛron mi.
21 Kpɑ bu wurɑmɑ nɛ, Gusunɔ Dɑm kpuroɡiin mi.
22-23 Bɑɑ bɑ̀ n dɑɑ dɑbi nɡe nim wɔ̃kun yɑni sɛɛri, ben sukum tɔnɑwɑ mu koo wurɑmɑ. Domi nɛ, Yinni Gusunɔ, wɔllu kɑ tem Yinni, nɑ yen himbɑ yi kɔ n kɑ bu kpeerɑsiɑ. Nɛn ɡem mu koo sɔ̃ɔsirɑ n bɑndɑ. Tem mɛ kpurowɑ kon kpeerɑsiɑ nɡe mɛ nɑ yi.
Yinni Gusunɔ
u koo Asiriɡibu sɛɛyɑsiɑ
24 Nɛ Gusunɔ, wɔllu kɑ tem Yinni, nɑ ɡeruɑ nɑ nɛɛ, bɛɛ nɛn tɔmbu, bɛɛ be i wɑ̃ɑ Siɔniɔ, i ku Asiriɡibun bɛrum ko, be bɑ bɛɛ soomɔ kɑ bokuru nɡe mɛ Eɡibitiɡibɑ rɑɑ bɛɛ kuɑ.
25 Adɑmɑ, n tie fiiko sɛɛyɑsiɑ bi nɑ bɛɛ mɔ̀ n kɑ kpe, kpɑ nɛn mɔru yu wurɑ ben mi, n bu kpeerɑsiɑ.
26 Nɛ Gusunɔ, wɔllu kɑ tem Yinni, kon ɡoo dendi nɡe bokuru u bɛɛ sɛɛyɑsiɑ nɡe mɛ nɑ Mɑdiɑnibɑ kuɑ Horɛbun ɡuurɔ. Kon nɛn dɛkɑ tĩi nim wɔ̃kun berɑ ɡiɑ n bu sɛɛyɑsiɑ nɡe mɛ nɑ Eɡibitiɡibu kuɑ.
27 Tɔ̃ɔ te sɔɔ,
kon bɛɛ nɛn tɔmbu yɑrɑ yorun di
kpɑ i bɛɛn sɔmunu sɔbiɑ
kpɑ i suɡu potɑ bɛɛn wĩinun di.
I ǹ mɑɑ suɡu dokemɔ
yèn sɔ̃ nɑ bɛɛ ɡɔsɑ nɑ ɡum tɑ̃re.
Yibɛrɛbɑ bɑ Yerusɑlɛmu wɔri
28 Yibɛrɛbɑ bɑ Ayɑti wɔri bɑ mwɑ,
mɑ bɑ Miɡoroni tɔburɑ bɑ ben sɔmunu yi Mikimɑsiɔ.
29 Bɑ kokɑ bɑ doonɑ mɑ bɑ dɑ bɑ kpunɑ Gebɑɔ.
Yerɑ Rɑmɑ yɑ diirumɔ.
Mɑ Sɔɔlu Isirelibɑn sinɑ boko yerukoon wuu
ɡe bɑ mɔ̀ Gebɑn tɔmbu bɑ duki yɑkikirɑ.
30 Bɛɛ Gɑlimuɡibu i wuri koowo.
Bɛɛ Lɑisiɡibu i n tii sɛ.
Bɛɛ mɑɑ Anɑtɔtuɡibu i ko i kɑm ko.
31 Mɑdimɛnɑɡibu bɑ yɑrinɑ.
Mɑ Gebimun tɔmbɑ yɑkikirɑ bɑ kuku yenu kɑsu.
32 Gisɔ mɑm yibɛrɛ be, bɑ wɑ̃ɑ Nɔbuɔ
bɑ ɡɑ̃senu kpɑrɑmɔ Siɔnin ɡuurɔ
bu kɑ Yerusɑlɛmun tɔmbu nɑndɑsiɑ.
33 Wee Gusunɔ, wɔllu kɑ tem Yinni,
u koo bu bɔɔri nɡe dɑ̃ɑ kɑ̃ɑsi.
U koo yi yi kpɑ̃ɑru bo burɑ u kɑwɑ.
34 U koo bu bɔɔriwɑ u suriri
nɡe mɛ bɑ rɑ dɑ̃nu bɔɔri kɑ ɡbɑ̃ɑ Libɑnin dɑ̃ɑ sɔ̃ɔwɔ,
kpɑ ben ɡirimɑ yu kpe.
Sunɔ kpɑo koo yɑri
Dɑfidin bweserun di