14
1 Yinni Gusunɔ u koo Isirelibɑ wɔnwɔndu kuɑ. U koo mɑɑ bu ɡɔsi bu ko wiɡibu, kpɑ u bu swĩi ben temɔ. Sɑɑ yerɑ sɔbɑ koo du ben suunu sɔɔ, kpɑ bu mɛnnɑ bɑ n wɑ̃ɑ kɑ be sɑnnu.
2 Bwese dɑbinu nu koo kɑ Isirelibɑ wurɑmɑ ben temɔ, kpɑ bu bwese ni ko yobu tem mɛ Yinni Gusunɔ u bu wɛ̃ sɔɔ. Be bɑ rɑɑ Isirelibɑ yoru mwɛɛrɑ bɑ koo mɑɑ ben tii yoru mwɛɛri. Mɛyɑ be bɑ rɑɑ bu dɑm dɔre, bɑ koo mɑɑ ben tii dɑm dɔre.
Bɑbilonin sinɑ bokon ɡɔɔ
3 Bɛɛ Isirelibɑ, Yinni Gusunɔ u koo de i yoru yɑri, kpɑ i wɛ̃rɑ bɛɛn wɑsirɑru kɑ nɔni swɑ̃ɑrun sɔ̃.
4 Ù n kuɑ mɛ, womu ɡeniwɑ i ko i kɑ Bɑbilonin sinɑ boko yɛ̃ɛ i nɛɛ,
wi u rɑɑ sun dɑm dɔremɔ, u ǹ mɑɑ wɑ̃ɑ.
Dɑm dɔrebu kpɑ.
5 Yinni Gusunɔ u nuku kɔ̃suruɡii
be bɑ sun dɑm dɔremɔn dɑm buɑ,
mɛ mu sɑ̃ɑ nɡe bokuru.
6 Wi u rɑ n dɑɑ tɔmbu soomɔ kɑ mɔru wɔnwɔndu sɑri,
kpɑ u n tɔmbu dɑm dɔremɔ,
bɑ nùn nɔni sɔ̃ɔwɑ sere kɑ nɔrɔ.
7 Wee tɛ̃ tɔmbɑ wɛ̃re hɑnduniɑ kpuro sɔɔ,
mɑ bɑ nuku dobun kuuki mɔ̀.
8 Bɑɑ kɑ dɑ̃ɑ ni bɑ mɔ̀ sipɛrɛbɑ kɑ sɛdurubɑ
ni nu wɑ̃ɑ Libɑniɔ
nu nuku dobu mɔ̀, nu mɔ̀,
sɑɑ dɔmɑ tèn di ɑ wɔrumɑ,
ɡoo ku rɑ mɑɑ nɛ u sun bɔɔri.
9 Be bɑ wɑ̃ɑ ɡɔribun wɑ̃ɑ yerɔ
bɑ seewɑ bu kɑ nun dɑm koosiɑ,
be kɑ ben wiruɡibu kpuro.
Mɛyɑ sinɑm be bɑ ɡu bɑ seewɑ ben sinɑ ɡɔnin di.
10 Mɑ be kpuro bɑ nùn nɔɔɡiru sue bɑ nɛɛ,
wee wunɛn tii ɑ kuɑ dɑm sɑriruɡii nɡe bɛsɛ.
Sɑ kuɑ tiɑ.
11 Wunɛn bɛɛrɛ ye bɑ rɑ rɑɑ nun wɛ̃,
bɑ n mɔrɔkunu soomɔ,
wee ye kpuro yɑ wɔri ɡɔribun wɑ̃ɑ yerɔ.
Kɔkɔnu nu kuɑ wunɛn kpin yeru kɑ wunɛn bekuru.
12 Wunɛ wi ɑ sɑ̃ɑ nɡe buruku kperɑ ye yɑ bɑllimɔ,
wee ɑ wɔrumɑ wɔllun di.
Wunɛ wi ɑ bwesenu kpuro tɑbu di,
wunɛ wee bɑ surɑ temɔ, ɑ kpĩ.
13 Wunɛ wi ɑ rɑ n ɡerumɔ wunɛn ɡɔ̃ruɔ ɑ n mɔ̀,
kɑɑ yɔ wɔllɔ, ɑ wunɛn sinɑ ɡɔnɑ tɛriɑ kperin wɔllɔ,
kpɑ ɑ sinɑ ɡuuru wɔllɔ sɔ̃ɔ yɛ̃sɑn nɔm ɡeu ɡiɑ,
bũnun suunu sɔɔ.
14 Kɑɑ yɔ ɡuru winu wɔllɔ,
kpɑ ɑ kɑ Wɔrukoo weenɑ.
15 Adɑmɑ wunɛ wee, bɑ sure ɡɔribun wɑ̃ɑ yerɔ
sere wɔrun sɔɔ sɔɔwɔ.
16 Be bɑ nun wɑ kpɑ bɑ n nun mɛɛrɑ tii kɑ lɑɑkɑri bɑ n mɔ̀,
n ǹ durɔ wiyɑ mi, wi u rɑ rɑɑ de tɔmbu bu burisinɑ?
Kpɑ u bɑndu suriri?
17 U yinɑ u pirisɔmbɑ kɑrɑ.
U wusu kɔsukɑ.
Mɑ hɑnduniɑ yɑ ɡɔsiɑ bɑnsu.
18 Bwesenu kpuron sinɑ boko bɑɑwure
u wɑ̃ɑ u wɛ̃re kɑ bɛɛrɛ win sikirɔ.
19 Adɑmɑ wunɛ, bɑ nun kɑsɑ kuɑ
ɑ kɑ wunɛn sikiru tondɑ
nɡe dɑ̃ɑ kɑ̃ɑsɑ ye bɑ ǹ kĩ,
ǹ kun mɛ nɡe wi bɑ tɑkobi sɔkurɑ
bɑ ɡo bɑ sure wɔru sɔɔ ɡe ɡɑ kpenu mɔ,
ǹ kun mɛ nɡe ɡoo te bɑ tɑɑkɑ.
20 Bɑ ǹ nun sikɑ nɡe sinɑm be,
domi ɑ wunɛn tem ɡo,
mɑ ɑ wunɛn tɔmbu kpeerɑsiɑ.
Bɑ ǹ mɑɑ wunɛn bwese kɔ̃surun ɡɑri mɔ̀.
21 I sɔɔru koowo i win bibu ɡo
kɔ̃sɑ ye ben sikɑdobɑ bɑ kuɑn sɔ̃,
kpɑ bu ku rɑɑ se bu mɑɑ hɑnduniɑ tɑbu di,
kpɑ bu mɑɑ wusu seeyɑ bu yibu si sɔɔ.
22 Nɛ Gusunɔ, wɔllu kɑ tem Yinni, nɑ nɛɛ, kon Bɑbiloniɡibu seesi n ben bweseru kɑ ben wuun yĩsiru ɡo. Bɑ ǹ mɑɑ ben yirɑ wɑsi.
23 Kon de wuu ɡe, ɡu ko nɡe dɑru bwɑ̃ɑrɑ mi ɡunɔ sɑrenu nu rɑ n wɑ̃ɑ, kpɑ n ɡu kurɑ kɑ yii te tɑ ǹ bu ɡɑ̃ɑnu ɡɑnu deriɑmmɛ. Nɛ Gusunɔ, wɔllu kɑ tem Yinniwɑ nɑ yeni ɡeruɑ.
Yinni Gusunɔ
u koo Asiriɡibu kpeerɑsiɑ
24 Nɛ, Yinni Gusunɔ Dɑm kpuroɡii
nɑ bɔ̃ruɑ nɑ nɛɛ,
ye nɑ yi, yɑ koo mɑɑ nɑ.
Ye nɑ mɑɑ ɡɔ̃ru doke yɑ koo koorɑ.
25 Kon Asiriɡibu kɔsuku nɛn tɔmbu Isirelibɑn temɔ.
Kon bu tɑɑku nɛn ɡuunu wɔllɔ,
kpɑ n nɛn tɔmbu yɑrɑ ben yorun di,
bɑ kun ben suɡu kɑ ben sɔmunu sɔɔwɑ.
26 Yeniwɑ nɛn himbɑ tɔmbu kpuron sɔ̃.
Wee nɑ nɔmu dɛmiɛ n kɑ bwesenu kpuro sɛɛyɑsiɑ.
27 Nɛ Gusunɔ, wɔllu kɑ tem Yinni,
nɑ̀ n ɡɑ̃ɑnu yi wɑrɑ koo ye yinɑ.
Nɑ̀ n nɔmɑ dɛmiɛ wɑrɑ u koo ye kure.
Yinni Gusunɔ
u koo Filisitibɑ kpeerɑsiɑ
28 Wɔ̃ɔ ɡè sɔɔ sinɑ boko Akɑsi u ɡu, wɔ̃ɔ ɡe sɔɔrɑ Yinni Gusunɔ u Filisitibɑ ɡɑri yini sɔ̃ɔwɑ sɑɑ Esɑin nɔɔn di u nɛɛ,
29 bɛɛ Filisitibɑ kpuro i ku nuku dobu ko
yèn sɔ̃ boku te tɑ rɑɑ bɛɛ soomɔ tɑ bɔɔrɑ.
I n yɛ̃ mɑ ì n wɑɑ ɡɔsɔbu sɑrɑri,
i ko i surɔkɔru ɡirɑri.
30 Sɑɑ ɡɑɑ sisi yè sɔɔ be bɑ sɑ̃ɑru bo bɑ koo wɑ bu di,
kpɑ wɔnwɔndobu bɑ n wɑ̃ɑ bɔri yɛndu sɔɔ.
Adɑmɑ bɛɛ Filisitibɑ kon de bɛɛn nuuru tu ɡbi ɡɔ̃ɔrun sɔ̃.
Be bɑ koo mɑɑ tiɑrɑ, bɑ koo bu ɡowɑ.
31 Bɛɛ be i wɑ̃ɑ wuun ɡbɑ̃rɑ kɔnnɔwɔ
i weeweenu koowo bɛrum sɔ̃.
Bɛɛ Filisitibɑ kpuro ɡesi i diirio,
domi yibɛrɛbɑ bɑ tuɑ seeye nɡe dɔ̃ɔ wiiru.
Bɑ wee sɔ̃ɔ yɛ̃sɑn nɔm ɡeu ɡiɑn di,
mɑ ben tɑbu sĩi yi bɑɑsinɛ.
32 Esɑi u nɛɛ, mbɑ sɑ ko Filisitibɑn ɡɔrobu wisi.
Sɑ ko nɛɛ, Yinni Gusunɔwɑ u Siɔni swĩi.
Miyɑ win tɔn be bɑ sɑ̃ɑ wɔnwɔndobu bɑ koo kuke kɑ bɔri yɛndu.